親子遊樂

【親子好去處】鯊魚冒險島 @黃金海岸酒店 (足本 Full Version)

17 Mar, 17

去過黃金海岸咁多次!諗番起對上一次在黃金海岸酒店玩已經是6年前了,嗰陣Hysan只係得一歲唔夠,今次再嚟已經帶咗一件芊芊,得知上年12月新增設主題客房,而且仲新開咗個以鯊魚為主題的室內遊戲室,所以我哋就嚟咗呢個全新開幕既「鯊魚冒險島遊樂場」玩番個下晝



鯊魚冒險島收費為50分鐘一節,酒店住客$100/ 非酒店住客$150(以上收費為一位成人及一位小童),至於訂了主題客房的我哋就獲免費玩一節50分鐘


就連換鞋區都設計得特別靚!

  
芊芊「哥哥,等埋我呀!」


我最深印象係呢段入口的一小段路,用了投射裝置將海底影像射在地上,佢係一條Animation,真係見到D小金魚喺度游來游去!


兒童洗手間就在入口旁邊! 十分乾淨舒適

 


以鯊魚為題的Playhouse唔多,相信除咗恐龍之外,鯊魚就係小朋友另一至愛 。


場內設計到好似海底一樣,小朋友一入去就經已好開心周圍跑,裡面有個好大嘅海盗船同鯊魚造型的裝置。







呢條透明瀡滑梯好刺激,而且仲發現有個好處,就係當有D BB仲細個,佢哋唔敢瀡落去,呢個透明位可以俾媽咪好放心咁睇佢小朋友喺裡面情況


呢個鯊魚口簡直係打卡位!小朋友爬到最頂瀡過旋轉瀡滑梯,由呢個大大鯊魚口瀡出嚟! 佢哋兩個扮俾鯊魚咬,妹妹直情演得入型入格!


適合較細的小朋友遊戲區




另一邊仲有攀石牆,小朋友玩嗰陣要小心D,唔係驚佢跌落嚟,係驚佢跌落嚟壓親其他人,哈~



兩個嘢好似放監咁! 講飲講食冇興趣,但係講玩就幾攰都即刻醒哂!





唷噓~~



 


彈床係妹妹第二最愛啦(打韆鞦係第一!),屋企張床都就嚟俾佢跳爛!唔該你喺度跳飽佢




如果驚太細小朋友唔啱玩,呢度都有個BB小天地,裡面有齊所有訓練大小肌肉嘅玩具,如果拖住個細又唔知大個件出邊玩成點,呢個潛水艇造型嘅BB空間有大大個窗口可以俾你見到出面小朋友一舉一動,十分放心!





玩到咁上下我哋就去參加手工藝工作坊,這個工作坊係主題房間包埋,配合房間主題做出兩件小作品(當然Walkin或者普通房間住客也可參加,不過就會係做其他手作)
 

酒店客人需要$100/其他客人則$120,這個主題客房並不包括在內,需要額外付費


看看小朋友的製成品幾靚! 大家可以選擇自己鍾意既手作去完成
 

隔離仲有張迷你乒乓波枱可以俾小朋友玩


至於電車主題房間的我哋會做兩件小手作,一件係木製電車模型,另一個係設計環保袋 。


多謝酒店預先為我兩個小朋友預備的小禮物!

  

兩個都好有心機跟住姐姐一個一個步驟咁完成,估唔到雞手鴨腳的芊芊,人仔細細都可以唔駛媽咪幫手自己砌好架木電車!我哋讚佢嗰陣仲陰陰咀笑咗出嚟
  








跟住再設計電車主題環保袋,哥哥真係畫得超美!我覺得定番個價都有人會買(至少仲有我呢個顧客)






芊芊畫完就急急腳再跑番去玩,無限次瀡滑梯同跳彈床,因為呢個時侯六點幾,大家都去咗食Buffet,我哋好似包咗場咁!之後哥哥完成埋個手作再加入,剛好另有一家人喺度玩,哥哥同芊芊都有個對手一齊喺度玩伏匿匿!真係玩到癲哂...


 



剛才工作坊兩個小朋友的製成品




Photo by CANON 5D Mark III, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分


呀劍評語: 同一般Playhouse唔同,以鯊魚及海盜為主題,地方很大又唔多人(因為在場朋友多為酒店住客) 而且新開幕還很乾淨,而且又有手藝工作坊,喪玩完之後又可以文靜地做吓手工! 真係真心推介

鯊魚冒險島遊樂場 簡介
全情投入無盡海洋,走進海底世界的懷抱。在接待處鯊魚先生的帶領下,你可以走進互動的海底投影,透過動作引出栩栩如生的海洋生物。好靜的小朋友可選擇在海盜作主題的手工藝閣內製作自己的作品,而身手敏捷的小朋友則可挑戰室內攀牆。鯊魚形狀的障礙園區和配備小型吊橋、舷窗和攀爬設施的海盜船極具真實感,再加上適合舉辦生日派對的貴賓房,整個樂園叫小朋友們流連忘返。

地址
屯門青山公路青山灣段 1 號

開放時間

10am至10pm(每節50分鐘)

收費

酒店住客: HK$100 / 50分鐘
非酒店住客: HK$150 / 50分鐘
* 以上收費為一位成人及一位小童
* 凡預訂於「酒店優惠」網頁內所列出的住宿計劃,可免費暢玩乙節


內設特色主題手工藝工作坊(每節50分鐘)

收費酒店住客$100/ 非酒店住客$120
*訂購主題客房住宿計劃可享有該主題特設的手工藝工作坊


*詳情請參閱主題客房計劃內容或遊覽以下網址: 
使用設施前,需向職員預先登記


電話
2452 8888

網址
https://www.sino-hotels.com/hk/gold-coast/


(以上資料更新至文章當日)





RELATED POST