講環保日日都講，但係真心以行動證明一切嘅朋友又有幾多，今日真係嚟參觀一下深水埗區的一家樓上餐廳，佢哋實行咗一個叫「社區雪櫃」嘅行動
呢個社區雪櫃就係位於深水埗大南街同石硤尾街交界，一棟唐樓入面上一層就到㗎啦！唔係專登搵其實都冇咩可能會Walkin㗎
喺唐樓門口鐵閘就貼咗餐廳個招牌喺度！要入閘上去就要Call餐廳職員落嚟開門俾你
沿樓梯上嚟都黑，所以行路都要小心D！門口上面掛咗個霍格華茲9 3/4月台招牌，我諗老闆應該好鍾意Harry Potter
門外都有電話號碼，萬一上到嚟摸門釘都可以打電話俾老闆
一入到去真係覺得古典味濃，不過地方唔大，店內坐到十多人，左邊有梳化同埋書櫃，可以喺度坐低睇吓書咁，好有屋企Feel
負責人都十分喜愛英式風格，知道呢度有時會舉行各類不同的活動，好似十二月就有個「漫漫步茶會」可以俾參加嘅朋友嘗嘗正統英式High Tea，不過我今次嚟就冇呢個機會，因為如果唔預約的話，walkin都應該唔會有位
好啦好啦...今次嚟嘅目的係睇吓佢哋點樣做個社區雪櫃，順便教育一下小朋友人哋點樣做環保，不過...
呢個雪櫃會唔會細咗少少...當然環保事無分大小！都要欣賞佢哋有這個誠意去實行
「社區雪櫃」食物分享站，大家都可以隨時上嚟放低及取用任何食物
大家當然唔好求求其其帶D過咗期又唔食得嘅嘢嚟，雪櫃裡面多數都係D儲存期較耐同埋全新未開封的食物
相信呢個地方可以俾到一班愛閱讀愛英式生活的朋友們聚集，同埋可以藉住呢個雪櫃彼此分享，我個人覺得呢個「社區雪櫃」意義比實際用途要大
一個小小機會俾佢哋睇到其實喺香港，真係有好多有心人實行環保，雖然目的唔係話要幫助好多窮困家庭，而旨在培養大家互相分享的精神！
希望下次有機會上嚟食嘢嘆下茶啦
Photo by CANON 5D Mark IV, Len | EF 24-70mm f2.8L II USM
呀劍評分: 6分
呀劍評語: 概念係好，但係實際幫助未必好大，因為都係熟客仔自己交換嘢食多，幫到真正有需要嘅人我諗未有好大成效，不過始終有好過冇，多個途徑讓人認識環保，珍惜食物！
地址
深水埗大南街202號閣樓(港鐵深水埗站 A2 出口, 步行約7分鐘)
Papillon 簡介
位於深水埗的書店café，提供舒適環境予客人邊閱讀邊「歎茶」，書室會不時舉辦讀書會或文藝工作坊，另可預約作私人聚會。
營業時間
星期一至日: 15:00-22:00
電話
6204 7863
6204 7863
(以上資料更新至文章當日)
Facebook專頁: 呀劍萬帥 kimfamilytravel
Blog網誌 : kimfamilytravel.blogspot.hk
