親子戶外

【親子好去處】西園 Saiyuen 「Green Summer 綠活之夏」 Green Summer is Coming to Town！

05 Aug, 22

邊個話露營係秋冬活動，熱辣辣一樣可以去Camping，遇上西園今年的「Green Summer 綠活之夏」,哥哥同呀芊又可以夏日炎炎玩個夠！


Green Summer is Coming to Town！今年西園舉行「Green Summer 綠活之夏」，由導師帶領同小朋友一齊玩好多綠色活動，包括「田野香草醬」、「心意種子再造卡」及「葉脈書籤」，俾小朋友感受大自然之餘，亦可以製作出唔同嘅東西，培養佢哋嘅環保的意識。

真係有好耐冇去過西園玩啦！睇番舊事啲相，原來對上一次嚟都已經係5年前，大家可以回顧一下......

西園 Saiyuen @14/4/2017
https://bit.ly/3oIWZFZ

西園 Saiyuen @9/12/2017
https://bit.ly/3znTjyD


我哋入西園真係好熟路，二話不說嚟到碼頭搭個慢船，呢個呀芊竟然冇再話頭暈啦，記得以前佢一上船就會嗌頭痛頭暈，攪到有一次坐郵輪嘅機會都冇咗！希望不久將來可以再有機會上郵輪玩啦～


入到去長洲行個圈飲飲食食掃個街當食lunch，之後就去碼頭右邊搭駁艇，如果唔識搭就爬番我舊文，只係每位$10搭單程，大約5至10分鐘就到長洲嘅另一邊


落船後有種好熟悉嘅感覺，好似返番去鄉下咁，一條直路轉左，沿住路邊指示再上一條斜路就到，約十分鐘路程。






我記得之前嚟過西園，住過蒙古包、觀星營，今次我哋將會入住印第安營

當時去西園都有經過印第安營區，不過只係為咗打咭，但係今年終於有機會入去瞓啦～


呢個就係我哋今晚嘅屋企啦！呀芊期待咗呢日好耐，今日終於願望成真啦～


住喺印第安營區，感覺自己都好似變咗做印第安人咁，哈哈～～


外面看上去好似唔係好大，但原來入到嚟超有空間咁。


而且床都要係床褥嚟㗎，而且仲有冷氣，今日天氣超熱，我一入到嚟都唔想出番去，即刻就想瞓番個晏覺。


每個營裏面都獨立13A插頭同埋兩個USB


襯活動未開始，我哋周圍去行吓睇吓有咩玩，呢個攀架設施係我之前未見過，應該呢兩三年先起好，啱啱好喺樹蔭下，唔駛驚曬到燶。


連大人都上到去，小朋友跳嚟跳去，玩伏匿匿捉伊人真係一流！


仲有個滑輪飛索，兩個玩完又玩玩唔停！


仲有繩網同搖搖板。




第一個綠色活動「心意種子再造卡」正式開始


芊跟住導師一步一步去製作再造卡


呢個步驟要最小心，因為好容易就會整爛㗎啦！


不過有導師陪住製作，絕對唔成問題，仲好順利咁做好每一張再造卡。



之後我哋就開始第二個活動「葉脈書籤」


佢哋見到導師的葉脈書籤好靚，就好想自己都擁有一張。


芊就好努力咁一直用牙刷......刷......刷......刷......


果然最靚嗰張都係導師嗰張，不過最重要係小朋友嘅體驗，俾佢哋知道一塊樹葉原來都有咁嘅用途。


最後仲有「田野香草醬」，我哋先去香草園，搵吓有咩植物可以用嚟做醬料先。


導師帶我哋去搵迷迭香去做材料。


我哋剪咗部份出嚟，準備番入活動室去製作香草醬啦～


首先要印乾晒所有迷迭香。



然後要將所有葉拆出嚟


跟住要俾啲心機同力去磨碎佢啦！


一個冇力就另一個去接力


落埋橄欖油、少少鹽少少胡椒粉。


落埋橄欖油、少少鹽少少胡椒粉，話咁快就攪掂啦～


西園活動好多，除咗有今次「Green Summer 綠活之夏」的靜態活動外，其實仲有好多招牌歷奇好玩嘅活動。


哥哥先嚟玩「樹頂走廊」，佢對上一次玩都已經係5年前，今次比上次更不猶豫走去著上裝備。


人大咗都大膽咗，已經非常熟練，好快咁跟教練做咗個模擬訓練。



呢張相就好經典，五年前同一個地方同一個人同一個動作，只係棵樹同人都有咗好多，哈哈～


準備要開始行啦！


我早知佢今時唔同往日，所以我一早就已經叫咗佢唔好走咁快，因為我影都影唔切！


簡直就係駕輕就熟，一下就已經行咗去第三段


去到獨木橋啦～前後搖嚟搖去佢真係一啲都唔驚～～


仲可以好自在地隨時望鏡頭俾我同佢影相


最後要去飛索扮泰山飛落嚟啦～


另外臨食晚餐前仲玩咗兩個小遊戲，係今次嚟先有的全新遊戲。


呢個遊戲叫做「木梯球」


玩法只要將手上的木梯球(用繩連繫着每邊各一個球的)拋到對面的木梯，最高階的為三分，最低階的就只有一分，每人有三次機會，累積最高分者為勝出。


呀芊連贏咗幾次，開心得佢！始終呀妹運動細胞好過哥哥。


然後到國王棋，連我都覺得呢個遊戲好好玩。


每人有士兵五個 (即五條木柱)，然後中間放置的就係國王，大家只要將手上的六條木棍拋去擊倒對方的五個士兵柱，連最後一條木棍去擊倒中間的國王就為之勝出。


當然大家未必可以一擊即中，完全善用手上的所有木棍，因此對方將被擊倒的士兵柱，拋去你方的範圍，然後同樣用自己手上的木棍去打倒它們及對方本身有的五個士兵柱，如此類推，直到有人可以擊到中間的國王！


玩咗成個晏晝，已經超肚餓了，我哋就去準備BBQ啦，職員一早已幫我哋預留場地，用房間號碼記低燒烤爐的位置。


哥哥主動幫我們燒雞翼


好似燒得幾好睇，似模似樣喎～(但最後拎到番去發現未熟囉)


呢個呀妹就即係識得食 (佢都有幫下手包金菇蔬菜嘅～)


燒完嘢食食到飽飽，就梗係番房沖個靚涼，再......打機啦～


第朝起身食個豐富早餐



種類都好多，包你食得飽一飽！




餵飽自己後，活動又未開始，就梗係去餵吓羊，親親大自然啦～







第二朝嘅重頭節目就係玩「沿繩垂降」，仲記得以前佢哋因為年紀太細，所以嗰陣時仲未玩得


就連呀芊都可以玩得啦～


垂降的地方係在西園的外圍，跟住教練步行幾分鐘就到達


啱啱嚟到活動地點，芊芊就開始有啲驚喇，因為要垂降嘅地方都有成幾米高





不過都已經嚟到，要勇敢玩埋落去㗎啦！


哥哥第一次玩，但係都算落得幾快，可能都係因為佢比較大個，佢明白安全措施已經做好，可以玩得非常安全


我目測佢好似大概5分鐘都已經落到地


輪到細個啲嘅呀芊，對於佢嚟講當然會比較驚


所以佢都落得比較慢，不過佢完全冇退縮過，仍然勇敢繼續玩落去，我覺得佢已經好叻女㗎啦！



就去到地面嘅時侯仲可以望鏡頭影番張相


呀芊好好笑，一完成後，媽咪走去攬住佢讚佢叻女，佢即刻大釋放喊咗出嚟，不過都係少少幾滴啫，唔係真係大喊，但係我覺得呢個考驗係對佢成長一個好大的幫助，證明自己已經長大咗啦！


為咗獎勵佢就即刻請佢食番支雪榚啦～


之後就再接住玩另外一個活動「馬騮上樹」


芊芊嘅心臟已經強大咗啦，雖然把口就話少少驚，但係佢都想繼續玩


以前呀芊細個都玩過，不過半路中途就會要落番嚟，未敲到個鐘～


哥哥玩先，做個好榜樣俾妹妹睇




又係輕而易舉咁爬到上去敲響個鐘


輪到呀芊開始爬啦，雖然慢咗少少，但係佢都係冇停過，一級一級咁爬咗上去，今次仲...



今次仲可以敲到個鐘㖭呀～



去到中午我哋簡簡單單咁食個杯麵同波仔飯


之後就去咗玩一玩射箭


佢哋兩個講咗好耐話想玩射箭，今日終於俾佢哋兩個等到喇～



最後我哋發現原來西園外圍都有個小沙灘，所以我哋都打算去玩一陣，之後先至離開


穿過「魔鬼森林」有個鐵閘，按頭先橫額上的密碼，解開密碼鎖，步行若5分鐘就到小沙灘


沙灘不算大，而且沙石都比較多，所以我覺得都可以俾佢哋玩玩水





今次旅程好開心，玩過好多唔同活動，又上天又下海，又有動又有靜，我真係好希望可以再有機會嚟玩呀！


Photo & Video by Sony A7III iPhone11 Pro

想跟我去體驗其他活動，快D報名親子團，同埋留意專頁公佈詳情啦！http://goo.gl/forms/CNZMEPoMIWkouK8o2

西園農莊 Saiyuen

西園位於長洲西南角，園内十一英畝土地劃分多個主題營區。亦設衆多戸外活動丶自然空間。

西園農莊管理有限公司
 (852) 2666  9556
 (852) 2666 9557

(以上資料更新至文章當日)


Facebook專頁: 呀劍萬帥 kimfamilytravel

Blog網誌 : www.kimfamilytravel.com

                 

搜尋

標記

近期文章

文章分類

分區活動

舊文重溫

RELATED POST