【親子好去處】荃灣愉景新城 + 城門水塘郊野公園蝴蝶節

今日係一早已經計劃定,仲約埋我好朋友一家去,由綠色力量攪既蝴蝶節,就位於城門水塘郊野公園! 當然平日都可以自己去,但係如果就咁去睇蝴蝶可能自己又唔識搵, 冇其他節目又怕有D悶,所以揀呢日去,人唔算係太多,玩攤位遊戲都係排幾分鍾隊,算OK!

我哋一早食完早餐,跟住就坐朋友車去荃灣愉景新城,

係個度泊車,之後坐的士入去城門水塘小巴站落車,

點知係愉景新城經過見到有得意動物餅(愉快動物餅)既POPS,即刻隨手影咗幾張過過癮!

只係逗留數分鐘跟住我哋就把握時間上城門水塘啦,

其實嚟之前我都唔明個蝴蝶節係可以係咩地方,我係度諗唔通成個山都叫做蝴蝶節,

之後上到去要行山,跟住覺得不妙,要行幾耐先到? 然後見到個遊客中心入去問一問,佢話行多10分鐘就到,咁都冇咁驚,

原來行過遊客中心後會橫過引水道,跟住行樓梯就會上到活動地點,

一個好大既草原平地,佢哋就係個度擺攤位啦,有唔同既遊戲俾你儲印仔,之後可以換小禮物!

我一去到就首先去報名導賞團,有人帶住我哋去搵蝴蝶好D,

不過因為多人,佢每半個鐘開一團15-20人既導賞,我哋就要等到2:00個團,

唔緊要我哋玩吓玩吓D攤位,已經到我哋!

你唔好以為我支鏡zoom得好近,其實係隻螞蟻超級的大!!!

本來以為今次唔係行哂個城門水塘,就見唔到馬騮,

居然有一隻走咗過嚟食蕉!所以Hysan同芊芊見到好開心!

導賞團開始,先帶我哋行上山,我哋就見到有個外國人,睇佢個樣應該係專家,

佢翻開番樹葉,有條好靚既蟲係度,我即刻走埋去影咗相先,

之後導賞團見到我都跟埋過嚟,個導賞職員完全被忽視了!哈哈,

跟住再行有個蝴蝶園,我起初都唔明佢點可以圍住D蝴蝶,

原來佢哋專登係個個area種D係蝴蝶最鍾意既植物!所以係呢個範圍好容易就見到靚靚蝴蝶

我哋其實之前沿路上山見到人哋手拎住一個黃色靚靚folder, 原來仲有一個extra task!

因為佢有不同既導賞,當你離開咗個平原繼續上山,沿路有好多track point,

聽佢哋介紹完都會有一個印仔,要聽齊哂咁多個先可以換到一個靚靚既蝴蝶folder!

我拎住9張印仔紙,一路同D職員講,我幫D小朋友拎,個個職員都好好人都唔駛我聽哂就幫我蓋印,

最後睇完蝴蝶回程既時侯我行先過佢哋,抱住芊芊(因為佢瞓咗)搵哂所有點印哂佢,最後蓋齊9張紙換到9個folder!

Photo by CANON 5D Mark III, Len | EF 35mm f/1.4L USM; EF 100mm f/2.8L Macro IS USM

呀劍評分: 6分

呀劍評語: 行吓山真係幾好既, 不過今日天氣勁熱, 所以如果怕辛苦既家長就唔好去啦, 如果講睇蝴蝶呢度唔係最理想地方,我諗鳳園會仲多過佢!

呀劍貼士: 在小巴總站起點個度就有個大士多, 裡面有厠所, OK的! 起行前換哂片去哂廁所先, 如果開始上咗山之後, 廁所就只有一個個的流動廁所, 如果去大就真係麻煩D同臭D, BB換片就只可以行埋一邊, 冇計啦, 想親近大自然, 去便便就係冇咁方便架啦! 行完回程之後去士多食番件冰菠蘿真係正, 的士都好易截!

城門水塘簡介

相信很多人都唔會陌生, BBQ, 睇馬騮(本人覺得不宜, 依家D馬騮好惡), 影相, 行山, 大家都好熟! 所以都唔駛點介紹

地址

城門水塘郊遊徑

交通

1.荃灣地鐵站轉乘82號專線小巴, 到達城門水塘菠蘿壩, 我一家大細又BB車所以搭的士方便D!

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。