【親子好去處】元朗八鄉大江埔村復興農場

早排拎住本農場書睇吓香港仲有咩農場, 跟住見到呢個「復興農場」就好想嚟, 因為佢寫住有鼠睇, 同埋有一大片草地....點知今日去到發現....

今日要嚟既呢個地方可以話有點神秘！一陣再講點解 ~ ~ ~

今日係同老婆既結婚6週年紀念，本來諗計劃咗今日係去一個農場，但係諗起今日係週年紀念，冇理由去農場架！

於是一早起身就睇吓邊度好玩，本來有諗過不如唔番教會一次，去迪士尼啦！但係老婆又話早d講可以去買平飛，

跟住我就話去迪欣湖啦然後可以到酒店裡面食tea, 點知打去book枱又話full哂，

如果就咁去迪欣湖真係好似冇咩做，所以諗吓諗吓好晏就決定番咗教會先算，

出門口既時侯呀仔問我，唔係去農場咩(因為之前應承過佢)，完咗教會之後都未諗到咩新既地方，所以我哋決定買個外賣然後打的入去呢個農場，

呢個農場叫復興農場，以前都見過呢個名，但係一直都冇打算去，諗住去哂d出名既先，大家睇吓呢條link就發覺好正！

http://the-sun.on.cc/cnt/lifestyle/20120408/00481_002.html

左手邊會見到有條小路

在小路口向後影番頭先落車既地方

點解話神秘，因為起初入到去都唔知行邊條路，只係大概知係一個天德宮落車,

跟住我打電話俾農主，原來唔駛去到天德宮，只係前少少度見到有個復興農場個牌落就ok,

跟住行1分鐘度就到門口，但係去到之後唔係好似呢段新聞咁介紹，門口感覺就好似一個農村屋企，好細！

其實我週中都打過電話去問問，當時電話裡的男人態度好差，好唔想接待我哋咁，

但係佢又話「你鍾意嚟咪睇吓囉」，講到明話「冇嘢玩架」本來我真係唔想嚟，

沿小路行入去, 見到兩旁有D菜田

嚟到復興農場個門口喇

但係本書度介紹佢哋有飛鼠睇，所以先入嚟，入嚟既時侯見到個農主，係個女人！

原來聽電話的男人係佢個仔，唔係做農莊的(唔怪之得咁差)，

佢哋其實已經冇再開放俾人入嚟玩！農主已經退休湊孫了，

相中既草原俾龜食哂，剩下一片沙地！

我哋首先settle down先，農主人開咗個冷風機俾我哋，我哋係張枱度食咗個lunch先

芊芊瞓緊覺仲未起身，狗狗好胃食，一路望住我哋食既嘢

哥哥見到咁大隻龜又想行近佢又要驚...

之後同Hysan去周圍參觀，雖然呢度真係冇咩玩

同開心農場相比同樣農場亦係主人家，但呢度更WILD & RAW龜係周圍行，狗都係周圍行，得一隻惡d係鎖住，

滑梯同韆鞦都有蜘蛛網，睇得出好耐冇人玩，

過咗前面個沙地有個木閘，入咗去睇有好多驚喜好開心，首先可以見到刺猬！即迷你箭豬，

Hysan都唔敢掂，驚俾佢拮親！

最奇怪係見到好多大龜，但係佢哋條頸好長！未見過咁長既龜頭(我知你笑緊！)

然後仲有個好靚靚既荷花池！又有好大棵仙人掌，

有隻好靚既雞呀!

本來真係有飛鼠，但係我哋打開塊布，農主人話佢哋係晚間先活動，所以依家都係瞓緊覺，所以最後都係睇唔到！

農主人話本來仲有好多唔同種類既青蛙，但係佢話上年冬天佢哋凍死哂，好慘！

仲有隻鸚鵡，但係佢話上年都瓜埋，Hysan問咩叫瓜咗，主人話佢上咗天堂LU! :P

然後有個好大既鯉魚池，真係我見咁多最大條既一次，

另外有好多兔仔，隻隻都唔同樣，好可愛！

哥哥即場畫低佢所見到既動物!

盾臂龜同小朋友一齊打千秋

Shutter Speed | 1/100 s

Aperture | f/5.6

ISO/Film | 400

然後等芊芊起身食埋飯之後，再一齊睇多次所有嘢就離開農場，

跟住我哋搭602唔駛半個鐘就番到元朗落車番屋企，

夜晚再去食個好好味既Lam Tei Grill 晚餐嚟慶祝結婚週年紀念，

番到屋企一齊去睇番d相，老婆同工人敘述番都好開心，希望佢都鍾意今日呢個行程啦

Photo by CANON 5D Mark III, Len | EF 35mm f/1.4L USM

呀劍評分: 7分

呀劍評語: 雖然冇咩玩，農主人都去做自己嘢，我哋自己坐吓行吓，唯一可以加分真係可以見到更多既動物，好新奇！刺猬BB同兔仔真係好得意！中途有2隻盾臂龜打交，隻狗去勸交咬其中一隻龜隻腳，真係好攪笑！仲有成個環境剩係得我哋一家, 好似去探一個農村朋友咁, 好悠閒好輕鬆好舒服!

呀劍貼士: 其實佢唔知會唔會再俾外來人入去，如果佢肯俾你入你就望吓呢個貼士啦，個厠所都係好農村，但勝在人哋全家都係用呢個，所以都仲可以坐得同乾淨，另外自備食物同水，因為佢真係咩都冇，我見佢有個大雪櫃都有少糧飲品，我估佢都會賣俾你，如果太怕悶就真係唔適宜去，因為行一圈睇哂d嘢就冇嘢做架啦！

復興農場簡介

唔知佢將來點，如果係今日既簡介就只可以講，係一個自家式農場，本來的3萬幾地租咗俾人，勝在多動物睇！冇嘢玩！講完

地址

元朗八鄉大江埔村114號

交通

巴士 54/ 77K/ 251M
紅色小巴 18號
綠色小巴 602號於大江酒房下車，步行5分鐘至農場
巴士及18號線小巴於大江埔站下車後步行10分鐘至農場

電話

9621 7239

網址
facebook 復興有機耕作體驗農場

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。