【親子好去處】天水圍綠田園

綠田園呢個地方在網上都睇過好多次, 今日第一次嚟! 帶咗部相機出嚟但係居然唔記得張咭, 結果全日用iPhone影相!

今日係芊芊2歲生日, 我哋一路都諗唔到做D咩去慶祝, 其實我今次就唔想去D咁難去既地方, 就算簡簡單單係樓下元朗公園野餐都冇問題, 因為最緊要芊芊開心,

跟住我隨口講話去天水圍個綠田園, 老婆又覺得OK, 於是就決定咗去喇!

呢個地方其實一路都係等有一日真正得閒可以由朝玩到晚! 不過原來3個鐘都好夠玩Hahaha...

我哋本來諗住搭車去到天瑞跟住就轉的士, 但係芊芊心情好差, 係輕鐵一路嘈, 所以我哋落咗車之後就諗住慢慢行過去,

其實芊芊應該要瞓覺, 但係一路都唔肯瞓, 我哋行咗幾步見到M記係天瑞邨度攪Event,跟住我哋就入去拎咗個汽球,

Hysan大個咗,因為佢好想要頂帽,但係我哋叫佢自己去問M記姐姐拎,佢一句話OK即刻閃咗去拎!平時一定會話唔好,怕醜唔去

本來以為好快就到, 點知最後都行咗成粒鐘, 但係其實又開心喎,

因為我哋沿住排水道的單車徑行, 見到好多白鷺, 同埋又好舒服!我哋去到之後差唔多3:30,

Hysan已經急不及待要去玩, 我同佢去玩小型賽車(要自己踩個隻),$30玩15分鐘,俾咗錢之後佢哋會搣張電線膠紙寫低係幾點開始,其實方法都好OLD SCHOOL,

之後佢哋要靠人肉去望每個小朋友張紙係幾點開始, 跟住話俾佢哋知夠鐘, 有D職員怕怕醜醜, 仲好後生仔,唔敢大聲同我個仔講夠鐘,我梗係唔出聲由得呀仔踩咗陣haha...

跟住我哋去隔離既水池玩船仔,我問Hysan夠唔夠膽自己落船玩,佢好快就答我OK,

相比起佢以前細個乜都話唔敢試,依家真係叻咗好多!船就$30玩10分鐘,

如果親子落船就要$40,都係同頭先一樣啦,換咗個後生仔睇檔,跟住又係人肉咁記住每架船話咗幾耐,所以佢哋其實應該玩咗有20分鐘都有!哈哈...

跟住再行咗去竹枝林度玩,佢就叫做音樂竹林,即係想講當你穿入去既時侯D竹bingpang個陣好似演奏緊咁,一來一回有D無聊就離開了!

然後我自己忍唔住想試吓玩個人肉波(係我自己咁稱呼呢個遊戲)居然Hysan又夠膽同我入去玩喎,

我哋排一個就到,我哋入去之前見到隔離波有個小朋友玩到流鼻血,我有少少驚!

一開始真係企都企唔穩,我當然專登爬爬爬,等Hysan好高咁跌番落嚟,

我見佢冇咩事,跟住越玩越勁,都未夠鐘我已經冇哂力喇....

Photo & Video by iPhone 5S

呀劍評分: 9分

呀劍評語: 遊戲好好玩! 有少少似錦田鄉村俱樂部, 不過貴咗D, BBQ未試過, 所以唔知質素, 因為我覺得呢D罐頭燒烤場, 嘢食都唔方好, 如果我錯大家記住話我知!

呀劍貼士: 我建議大家可以入嚟玩2-3個鐘, 如果想BBQ出番去幫襯D 好食BBQ場!

天水圍綠田園簡介

備有蓋及露天燒烤場, 演講室, 空調雅座, 腳底按摩徑, 單車出租, 釣魚場, 高大熱帶植物佈置的植物場.

地址

新界天水圍沙江圍側（天華路及天影路交界）

交通

到達天水圍後再轉的士, $14.5 - $30 內就到達 ( 乘的士最近有 - 天華邨 / 天頌苑 / 天瑞邨 / 天恩邨 )

電話

2472 6848, 24726797

網址
http://www.yl.hk/green

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。