【親子好去處】大埔嘉道理農場暨植物園 Kadoorie Farm & Botanic Garden

今日同我前世情人拍住拖去嘉道理農場, 因為近近地天氣又好! (不過太好, 熱死人) 哥哥就同媽咪留喺屋企畫畫做功課!

我哋喺元朗搭64K去到嘉道理農場落車,

今日帶咗好耐冇出動既BB車,

在巴士上既乘客好好人, 見我抱住芊芊, 又要搬架BB車,

所以幫我手搬架BB車落去, 一放芊芊落BB車, 佢就醒咗

行番上少少經過安全島行過去對面就是了

可能今日真係太熱, 所以農場好少人

Photo by iPhone 5s

我差唔多12:00到, 完全唔駛排隊!

成人1位$30, 呀芊唔駛錢!

呢度有觀光巴士, 如果大家唔想行的話可以俾錢搭巴士遊覽

Photo by iPhone 5s

因為天氣太熱的關係. 我哋入場之後就去咗小食亭(素食亭),

我哋叫咗杯豆漿飲, $17有D貴,

聲稱無糖豆漿, 飲落都還OK, 唔會好似外面買的無糖豆漿超難飲

芊芊雙手拎起大大杯既豆漿, 飲得好滋味!

跟住嚟個招版笑容! 帶點蠱惑~

素食亭外吊住好多個唔同大細既松果,

旁邊見到有棵植物, 唔知橙色個D係果實定咩咩嘢,

芊芊拎起樹枝就篤落去

仲叫我去聞吓佢...

好啦, 飲完杯豆漿, 個人涼番少少....

準備去親親大自然啦

沿路見到有朋友喺度寫生

咁曬我就真係畫唔到喇

呢個邊個嚟架?! 咪就係嘉道理先生囉!

沿路行上去會有洗手間, 大家要去就依家好去喇,

如果唔係上到去要到昆蟲館先會有厠所

嚟到爬行動物觀賞台, 次次嚟親呢度都睇唔到嘢,

今日真係人好少, 所有動物都出番哂嚟, 仲好近tim!!

咁大條蜥蝪, 起初我以為係鱷魚,

芊芊以為係恐龍!

另一條爬咗上陸地!

跟住佢就爬咗入去個桶度, 唔知係咪裡面放咗嘢食

再行上條大約20級的樓梯, 就到農場小賣店

裡面賣的有書, 有天然產品及飲品,

因為太熱, 連寫緊Blog 都仲記得呢一日既熱!

我買咗包椰青水飲, OK喎, $10一包, 好清涼好好飲

即係圖中右手邊上面數落嚟第三及四排

芊芊拎埋購物籃當自己喺百佳Shopping

小賣店裡面仲有D地方介紹農場, 長櫈就得2-3張, 所以冇咩位坐,

不過都係志在入嚟涼吓冷氣

你睇吓幾曬，芊芊都熱到話要擔傘呀！

在小賣店隔離就係大肥豬既地方，原來呢度六隻大肥豬都有名，佢哋三公三乸

我哋以前嚟一係好多人圍哂喺前面逼唔到近d睇，一係就d豬入哂去瞓覺

今次又冇人又多豬, 仲有咁啱係佢哋開餐既時侯

我問芊芊佢哋係咩呢，你哋估呀芊點答？

睇完大豬Pat之後我哋就落斜路入去屋裡面避一避暑！

裡面有冷氣有大風扇，可以順便抖一抖

一入到去我哋就見到鹿啦！

起初佢瞓緊覺，匿埋咗係樹蔭下底

跟住隔咗陣，我哋再等一等，就見到佢起身

仲向住我哋呢邊行過嚟，真係好興奮！

呢個角度睇佢好似隻牛，又好似隻狗仔！

繼續向前行見到幅壁畫又真係畫得幾靚！

跟住我哋行到中間，見到蝙蝠呀！以前我哋嚟咁多次都好難睇到佢哋

今次因為冇咩人逼住，所以睇得好清楚！

芊芊見到d咩咁遠跑過嚟話我知呢？

原來係隻超大既野豬！

真係唔捨得離開間屋，因為實在太熱！

所以我哋即刻又去到另外一間屋，

不過今次冇冷氣！係～溫～室～

兩邊門口都棟咗呢兩塊大木牌！

仍然係一個人都冇！

我唔知係呀芊自己搣斷咗條辣椒定係佢喺地下執！

如果係佢搣，嘉道理希望你原諒佢，細路女唔識世界

中間有D木枱木櫈喺度俾人休息，

但係咁熱真係快d離開呢度好過！

早過農場收檔時間！

跟住我哋向山上進發，首先梗係見到好靚靚既Famingo

幾乎次次見到佢哋都係單腳瞓緊覺！

哎吔，跟住見到條好大既鱷魚呀

佢應該係瞓緊覺！但係佢對眼都唔合埋既，好驚囉！

感覺佢好似太肥！定係佢啱啱食咗隻龜落肚

再行高d我哋見到鸚鵡呀，不過佢哋唔叫又唔飛！

佢哋對面個鄰居就唔同，好嘈咁歡迎我哋探佢

之後嚟到爬蟲館，都係諗住入嚟嘆陣冷氣咋！

裡面有好多標本同埋講吓蟻既歷史！

如果真係有咁大隻蟻真係嚇死我！

成個館應該得呢缸嘢裡面既昆蟲係真，佢真係似塊枯葉！

去到爬蟲館呢對面有其他雀鳥同埋又有一隻鹿喺度！

唔係好明點解要將呢幾雀仔同隻鹿放埋一齊？

最後終於行到最高呢個地方啦！有貓頭鷹睇呀

乜貓頭鷹唔係日頭瞓覺架咩？

睇嚟我下次再嚟一定要參加導賞！

轉個彎就落山，沿途會見到個大雞場！

不停有雞叫...我以為太陽出嚟佢哋先會嗌

落到山腳，差唔多近小賣店，有其他雀鳥同埋爬行動物屋！

裡面太黑影唔到！都係d蛇同蛙既標本多！

呢度係豹貓既屋企，但係今日我點搵都搵唔到佢哋！

最後落番去藝舍坐吓！

點知今日冇開，冇得入去涼冷氣tim！

藝舍上面有個靚靚小型荷花池

最後我同芊芊番去小賣店休息吓，同埋餵芊芊食飯，旅程就結束啦！

下一站>>CLICK HERE!
【親子好去處】錦上路紅磚屋

Photo by CANON 5D Mark III, Len | EF 24-70mm f/2.8L II USM

呀劍評分: 8分

呀劍評語: 嚟過幾次, 今日最開心, 因為人少! 同埋見到好多動物, 仲好近!! 不過老實講, 我覺得比起以前少咗好多動物, 我覺得農場要再增加多點設施及動物, 如果唔係好難會吸引人再嚟!

嘉道理農場 簡介

嘉道理農場暨植物園於1956年成立，當年的目標是向貧苦農民提供農業輔助，幫助他們自力更生。從1960年起，透過植林、樹林的自然生長和防治山火的工作，本園已轉變成主題植物園。從前一片貧瘠的灌木林，現在已變成茂盛的樹林，供遊人參觀及欣賞。

地址

新界大埔林錦公路

開放時間
09:30-17:00
請注意下午 4 時後，本園謝絕遊客入場。

休園日
http://www.kfbg.org/chi/farm-closing-days.aspx

乘搭公共交通工具

乘搭東鐵/巴士
於大埔墟或太和站下車，轉乘64K巴士往元朗西方向，約20-25分鐘到達一段大斜路最頂處，於嘉道理農場暨植物園門前的巴士站下車。

乘搭西鐵/巴士
於錦上路站下車，轉乘64K巴士往大埔方向，約15分鐘到達一段大斜路最頂處，於嘉道理農場暨植物園的巴士站下車。

乘搭巴士
選乘行走大埔至元朗西的64K巴士，於嘉道理農場暨植物園的巴士站下車。

駕車前往本園
駕車前往本園由九龍/沙田經吐露港公路前往
駕車出獅子山隧道或大老山隧道後沿吐露港公路，駛往粉嶺方向。至大埔北在康樂園迴旋處轉左入林錦公路，再駛約10分鐘便到達一段大斜路，上斜方向更由單線變為雙線行車。嘉道理農場暨植物園的停車場入口就位於近斜路頂的左方。

由上水/粉嶺前往
沿粉嶺公路駛至石崗/康樂園出口，於康樂園迴旋處第二個出口轉左入林錦公路，再駛約10分鐘便到達一段大斜路，上斜方向更由單線變為雙線行車。嘉道理農場暨植物園的停車場入口就位於近斜路頂的左方。

由九龍經大欖隧道（3號幹線）前往
駕車出大欖隧道後靠左駛至八鄉出口（收費亭後第一個出口），轉入八鄉路，再前駛幾分鐘於錦上路交匯處轉右，一直前駛至林錦公路交匯處，轉右入林錦公路，至石崗迴旋處出口轉入林錦公路（往大埔方向），前方為一段大斜路，再駛約5分鐘，嘉道理農場暨植物園就位於近斜路頂的右方。

由荃灣（荃錦公路）前往
沿荃錦公路一直駛至石崗迴旋處，由出口轉入林錦公路（往大埔方向），前方為一段大斜路，再駛約5分鐘，嘉道理農場暨植物園就位於近斜路頂的右方。

由元朗前往
沿錦田公路駛往八鄉方向，至石崗迴旋處，由出口轉入林錦公路（往大埔方向），前方為一段大斜路，再駛約5分鐘，嘉道理農場暨植物園就位於近斜路頂的右方。

電話

2483 7200

網址
www.kfbg.org/

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。