親子戶外, 親子生活

【親子好去處】銅鑼灣 第27屆閱讀嘉年華 @維多利亞公園 Victoria Park

28 Nov, 15

今日星期六天氣真係好到不得了，秋高氣爽除咗適合行山，一家大細去個大草地玩都很不錯，而且今日嚟維園有呢個閱讀嘉年華，有得攤喺個大草地度睇書玩吓攤位遊戲真係爽


啱啱先去完皇室堡同Peppa Pig影完相

上一站>>CLICK HERE!
【親子好去處】銅鑼灣 Peppa Pig 冬日冰雪樂園 @皇室堡Windsor


過條馬路就嚟到維園參加閱讀嘉年華

見到個咁大嘅噴水池嚟番張合照先



行到球場對住草地嘅入口已放咗幾張Poster喺度

由隔離進入大草地就OK


可能時間仲早所以未算好多人

我哋入到嚟都唔知應該由邊度開始行起先好

所以我哋望一望就由最近嘅左手邊開始行起


呢度有個攤檔擺放咗好多本圖書喺度

不過全部都只係賣嘅，當然都唔介意大家喺度打書釘啦

芊芊一行埋去就見到自己鍾意嘅Pegga Pig圖書

講真都唔平㗎成$105一本好薄薄嘅書

掀埋都唔夠10頁


離開書檔，那邊廂就好多攤位遊戲

大部份都係由唔同嘅中小學負責


我哋第一個到停留嘅係一個假荷花池

只要釣起荷花池中嘅字牌然後過去另一位哥哥答佢簡單嘅問題

就可以蓋一個印，儲齊10個印就可以去禮品換領區度換禮物


之後喺唔同嘅攤位贏咗唔少小禮物

佢哋每人贏咗一支珍寶珠同橡皮糖(當然有老爸幫手啦)


之後我哋就去舞台前坐低一邊食糖一邊欣賞表演





舞台對出即成個大草坪嘅中間位置

係一個自助閱讀區

草坪上放咗幾個英文字母造型的書櫃

櫃上放咗好多本唔同嘅中英文書

大家只要過去揀自己鍾意嘅書就可以在附近慢慢睇

但係唔可以走太遠或者拎埋本書走咗

佢哋只有幾個職員喺度用靠對眼𥄫住邊D人拎咗同埋要記得還書

不過今日天氣太曬...雖然秋天有涼風又干燥

但係始終好曬，想睇書都睇唔到！




不過我哋都一人揀咗一本圖書坐咗埋去旁邊個閱讀區度睇咗陣

如果唔係點叫嚟咗閱讀嘉年華呀！






跟住我哋再過去其他攤檔度玩

呢個攤位有個好得意嘅姐姐著住好似大富翁個紳士！




佢俾咗本自製嘅簿仔，仲喺簿仔度開咗兩個洞，封面有兩鬢鬍鬚

其實畫完之後我仲以為佢唔知點樣好似玩「東南西北」咁可以睇番頭先簿裡面畫嘅嘢

但係最後畫完都唔知做咩！就咁㨂本簿仔喺度跟住摺埋少少就話個facial係笑緊...

然後好快再同Hysan講「拜拜，下次見」我即刻呆咗喺度

不過算啦重點都不在結果，見到Hysan都享受個過程就冇所謂啦



呢個遊戲幾得意，先喺摩天輪度揀一架車仔

車仔上面貼有國旗，然後將車仔放喺左邊的枱上面，枱面係一張地圖

跟據你揀的國家用木棍(木棍端上有磁石)於枱底攝住枱上嘅車仔

將車仔帶到去所屬國家咁就贏㗎啦


跟住哥哥去咗玩摺紙，仲摺咗朵蓮花tim！



妹妹對摺花冇咩興趣，所以我就帶佢去玩其他攤位遊戲

嚟到呢個由中學生同老師一齊合作預備嘅攤位

佢並唔係一個檔仔咁排隊喺裡面玩

而係好open的要一關一關咁玩總共要闖4關儲齊所預備的假扭蛋

最後仲可以拎到7個印，所以之後好多人都排隊留喺度玩

因為可以好快就儲齊10個印就去玩禮品














之後哥哥見到又想玩一次！我覺得呢個設計真係好好！

小朋友每一關唔難過，好容易就去到下一個關，讓他們很有成功感！

而且設計出來的紙皮扭蛋木











喺呢個攤位真係拎咗好多嘢

最後個姐姐仲俾咗兩張水印貼紙哥哥tim

超細心仲搵水幫佢貼埋！無奈哥哥對手太幼...「閱讀嘉年華」圍唔到一個圈！





妹妹另一邊繼續好努力咁玩其他攤位遊戲






跟住玩到差唔多我哋就中途去遊樂場嗰邊俾佢哋放吓電

因為媽咪今日帶埋其他小朋友嚟玩但係仲未到

其實由細到大嚟咗維園咁多次，居然未嚟過呢個遊樂場玩

原來D設施都唔錯㗎喎！



哥哥最鍾意就係周圍爬嚟爬去








人如其名，芊芊就最鍾意打韆秋

幾乎去到每一個遊樂場點都要玩一次

今次哥哥仲幫手推佢tim...









頭先玩緊嘅算係啱小小小朋友玩去到遊樂場

之後就帶哥哥去番個啱大少少嘅小朋友場玩

但係中途遇見有個石頭池，裡面超多石頭仔...

估唔到除咗沙池都可以做一個石頭池俾小朋友玩

最驚小朋友一個唔覺意拎上嚟掉人





嚟到呢邊另一個遊樂場，發現都幾有設計喎！

一見到就係呢個好似青馬大橋嘅設施





跟住見到有水機哥哥就要貪得意走去飲

似係想玩多過係去飲，當然妹妹就跟埋去話「我又要」



玩咗咁耐係時侯醫醫個肚

我哋外買咗幾樣嘢食就咗上去近山上嘅涼亭慢慢食



食完之後我哋又番去草坪搵媽咪繼續玩

因為實在太多攤位，真係要玩哂都有難度

不過我幾欣賞嘅係好多攤位都係俾學生去負責

大人或老師只係從旁幫手！

呢度有個講故事地方，由小學生負責拎住塊紙板講耶穌故事

雖然佢講緊嘅時侯都係一路幫住塊板，同聽故事者冇咩溝通

不過佢哋咁勇敢面對陌生人去講已經好叻





場內其他攤位都幾特別幾好玩！

我哋最後都係玩多半個鐘度就離開啦

離開前梗係拎住頭先蓋咗印仔張紙去換禮品啦









換禮品超攪笑，當你俾咗手上蓋滿印嘅紙仔佢

佢哋好幾個人就先叫你拎出環保袋或書包

然後手一乍一乍掉好多嘢入你書包，有糖有文具有零食....真係乜都有

我哋大家都滿載而歸超開心！之後仲過埋對面個中央圖書館睇咗陣書！

本來想入去玩具圖書館玩，但係原來要早一個星期用電話或親身嚟預約

唯有下次再嚟過！




Photo by CANON 5D Mark III, Len | EF 24-70mm f/2.8L USM
想跟我去體驗其他活動，快D報名親子團，同埋留意專頁公佈詳情啦！

呀劍評分: 7分
呀劍評語: 起初以為係一個以閱讀為主嘅活動，但係原來都只係一個勁多攤位遊戲，載歌載舞表演的大集會！無錯中間確實係有一個供人借書就地以讀的區域，不過書唔多，供人看書的地方唔多，如果做到俾人借書去不同樹蔭下閱讀咁就好！

第27屆閱讀嘉年華 簡介
由教協舉辦一年一度的大型閱讀推廣活動，「第27屆閱讀嘉年華」，將於2015年11月28日（星期六）於香港維多利亞公園中央草坪舉行。活動免費開放給公眾參與，特別適合香港中小學生，以及作為親子動。


地址
香港維多利亞公園中央草坪

活動時間
11月28日星期六上午10時30分至下午4時30分

 對象
公開予所有人士參與，適合親子及中小學生，欲參加遊戲攤位的人士需要先行經學校索取遊戲券

免費入場

電話
2780 7337


(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

搜尋

標記

近期文章

文章分類

分區活動

舊文重溫

RELATED POST