知道今日要入嚟元朗, 下晝多咗個空檔要諗吓做咩好
我就近近地帶佢哋去「陶氏休閒生態農莊」摘士多啤梨!
啱啱喺通利出血買咗部鋼琴俾呀仔練琴用(因為屋企嗰部壞咗)
離開通利後我哋就咁向大榮華方向行, 喺泰豐街搭33號綠Van
到咗流浮山迴旋處之後再向深灣路行多陣
同司機講「陶氏」或「羅氏」有落
沿斜路行落去直入, 中途會經過羅志強種植園(羅氏士多啤梨園)
可能因為今日天氣關係, 所以一個人都冇, 連老細都唔喺度!
本來諗住嚟羅氏摘士多啤梨就算, 個場細細哋留兩個鐘就走
但係一個人影都冇, 我哋唯有繼續行, 去入少少既陶氏玩!
去到陶氏大門口, 都覺得唔係好對路! 都仍然係冇咩人, 不過都好在有人Serve!
我哋其實都知道今日天氣麻麻地, 就係諗住咁就唔駛同人逼!
結果就如我預期一樣, 咁啱有個團啱啱離開, 就真係得番我哋...
既然嚟到又冇人, 芊芊又瞓著咗, 我哋先買棵草俾哥哥餵吓羊先
睇住哥哥餵羊, 見到佢心地都幾善良!
因為佢拎住棵草, 會平均分俾3隻羊, 唔會剩係餵死一隻! 佢驚另外嗰兩隻會冇得食
我上網睇到以前既圖片又有兔仔又有好多隻羊
但係今日嚟只係見到3隻黑羊仔...
剩番最後一條草, 哥哥諗緊俾邊隻羊好呢?!
餵完羊就餵佢自己! 坐係張大吊長椅上慢慢嘆(芊芊仲未起身)
眼望去個士多啤梨園都冇咩士多啤梨...
上面有間小屋, 本來人少少想問吓負責人可唔可以俾我哋上去
但係最後都係唔想煩到人, 冇問到...
好大個火龍果園! 好得意, 全部用車軚"郎"住D葉
俾哥哥近距離望吓D果實係點生出嚟!
俾佢從植物的生長過程睇到生命既奇妙!
跟住同佢入咗去個農田度睇吓其他蔬菜! 有唐蒿, 有白蘿蔔, 有生菜...
我有九成都唔知係咩嚟, 全部都要靠農夫姨姨幫手解畫!
我哋呢一代可能有好大部份朋友都未必對每一種蔬菜都好清楚認識
真係要惡補一下!
哥哥對蔬菜就冇咩興趣, 反而一路都留意住口濕濕淋淋泥土裡既蟲蟲
離開咗個菜田, 去到另一邊見到好多哥哥叔叔喺度爬樹
原來呢度係開放咗俾爬樹會定期嚟呢度練習!
過咗成個鐘, 妹妹終於瞓醒啦! 可以俾媽咪抱住瞓, 人影都冇隻, 又靜又涼爽! 瞓得勁舒服
一起身就將預先留起一半既草拎俾芊芊去餵羊!
到依家佢都仲係好驚餵羊! 要媽咪陪住去餵
不過跟住哥哥主動去陪妹妹餵之後
妹妹開始冇咁驚啦!
可以自己拎住棵草咁行近近去餵隻羊
餵完羊羊之後! 我就去準備兩個籃仔同交剪!
芊芊幾醒神, 一叫佢望鏡頭俾我影番張相, 即時俾反應!!!!!
我哋一早準備咗帶哂水鞋! 果然落到田度周圍都係水氹
呢個哥哥著住對鞋行, 因為唔拎起隻腳同小小心心咁行, 差D踢到D水落我哋度
所以俾我鬧咗餐同埋我唔肯陪佢剪 >.<
芊芊剪到士多啤梨個樣幾開心!
芊芊周圍話俾我知邊度有...有陣時話咗俾我知之後跟住行近D睇到原來有少少爛
跟住就話「噢...爛咗」佢個樣好得意
最後我哋唔係摘咗好多, 因為真係可能天雨關係, 所以D士多啤梨都唔係太靚
勉強地摘咗10粒過吓口癮!
跟住當然係拎去洗同埋.....
現場就解決哂佢啦! 偉大既老爸老媽當然俾哂佢哋食啦! 因為佢哋好鍾意
但係佢哋兩個都好乖, 每人都拎番一粒出嚟請我同媽咪食
之後抱埋妹妺上去俾佢坐吓呢個吊椅就差唔多要走啦!
喺呢個時侯...估唔到太陽居然出咗嚟!!!
喺我哋臨走既時侯都可以睇到日落, 真係好開心!
天氣真係驟變, 話變就變! 你睇吓日落曬到佢哋眼都矇埋!
我哋行番出去迴旋處度搭K65去屏山
途中仲見到呢棵咁靚靚既木棉花樹! 佢哋兩個就梗係要...
執番幾塊靚花瓣!!
下一站>>CLICK HERE!
【飲飲食食】元朗 屏山 唐 Tong's road house seafood + grill
Photo by CANON 5D Mark III, Len | EF 35mm f/1.4L USM
呀劍評語: 羊只有3隻, 士多啤梨田只有2塊, 賣有機菜只有一小檔, BBQ, 單車, 遊樂設施乜都冇!
陶氏休閒生態農莊 簡介
原址流浮山陶家村，除著時代發展，其實以荒廢了很久很久。老闆花了半年多時間，從廢堆中清理出自己、兄弟們的童年回憶，銳意打造為一個休閒生態農莊。配合近年政府致力發展流浮山為元朗的一個主要旅遊景點，而大事整理！地方開揚、背山面海，觀星、望月、睇日落至清幽！ 或可遠眺后海灣大橋及蛇口繁盛璀璨燈影。
地址
元朗 流浮山 深灣路 (榮真學校後面)
入場費
全免(場內活動個別收費)
電話
2266 0003
網址
www.yl.hk/tosbbq/
電話
2266 0003
網址
www.yl.hk/tosbbq/
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
05 Aug, 22
【親子好去處】西園 Saiyuen 「Green Summer 綠活之夏」 Green Summer is Coming to Town！
邊個話露營係秋冬活動，熱辣辣一樣可以去Camping，遇上西園今年的「Green Summer 綠活之夏」,哥哥同呀芊又可以夏日炎炎玩個夠。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。
18 Jul, 21
【親子好去處】帝景酒店 x 麗都灣 消暑平價の選 玩足2日1夜
想當年仲記得自己第一篇好去處文，都已經差唔多有成7-8年，其實嚴格嚟講都唔可以叫做文，因為嗰陣文字未發育的我，根本就冇諗過要寫咩分享文，其實我只係寫日記。
12 Jul, 21
【親子好去處】盛夏森林 Splash N' Forest 親子濕身玩水派對
今年好矚目的消暑活動「盛夏森林」 ，周圍都見到佢哋廣告，集玩水、美食、音樂於一身，呢個暑假點都要去玩先似放緊暑假。