真係城巿綠洲！喺樂富呢個地方居然可以搵到一個大草坪，玩完又可以行幾步落番去樂富廣場High番個Tea，今次真係要推介俾大家！
水庫草坪真係買少見少，因為好多都俾政府封咗
但係今日去呢個樂富海水配水庫草坪就仲去到！
我哋今早起身慢吞吞咁起身再落街食個早餐
約咗朋友喺樂富圖書館門口等！
由港鐵站行出嚟轉左向樂富廣場上斜咁行
行到盡頭就會見到有條樓梯
樓梯轉彎位就會見到呢個咁大嘅指示牌
上到去接埋D朋友仔就沿住聯合道對面嘅富安街直上山
沿途見到右手邊有一條樓梯，仲插住好多塊警告牌喺度，有電電好驚！
行山必備/指定動作：執樹枝！
哥哥好開心周圍跑跑跳跳！
行到呢個位置會見到水庫入口
但係有鐵閘封咗！喺呢個時侯以為咁黑仔連呢度都俾政府封埋
但係我喺facebook見到有人11月先嚟過！
不過大家唔駛驚...原來只要轉左繼續行就可以去到
喺呢個時侯提提各位右手邊有個公廁，大家如果人有3急就去咗先
轉左再行前兩步就會見到呢個水庫閘1960(老過我呀)
再行前2分鐘就會見到一個大轉彎位同埋有條小斜路行落去
原來係一個小涼亭，涼亭俾樹包圍，我哋都去到時都見有兩個人喺度瞓緊覺
轉埋呢個彎行上去就見到大草坪啦
呢度個正確名稱叫做「樂富配水庫休憩花園」
嘩Waaaaa！真係好大喎
以我估計差唔多有三分二個正規球場咁大
今日1月1號正直冬天，但係見到草坪嘅草都好靚！
最重要係我成日講嗰樣「最緊要少人！」
喺我連舖地下都未預備嘅時侯
就即刻掉個足球出嚟俾佢哋玩，唔好阻住我哋Set場！
呢個草坪最特別地方係中間分出3條磚路
哥哥之後就走去爬樹！同朋友仔執樹枝，呢度仲有幾棵樹斬咗可以玩梅花樁
我哋喺大樹下舖咗地墊野餐！
媽咪朋友送咗D小禮物俾小朋友一齊玩
芊芊見到有條已死甲蟲跟住執支樹枝去「了」佢
媽咪們晒冷！喺呢D時侯通常女人都會將平時唔會做俾老公食嘅嘢做出嚟同大家分享
小朋友就最開心不過！唔駛做，又食又拎！
總括我帶住兩隻嘢周圍去咁多地方
最開心笑得最真實就係在大自然遊玩！
即使去甚麼甚麼嘉年華之類活動，當玩完機動遊戲之後停落嚟
歡笑都跟住一齊停落嚟，留低嘅就只有倦意同埋扭計
相反每次嚟到大自然，佢哋一來可以自動波自己去玩去探索
二來唔會見到佢哋話攰
第三一定唔會出現嘅情形 －扭買玩具扭玩呢樣嗰樣！
呀芊你實在太靚我只有放哂咁多張相！
哥哥同呀芊喺度玩掟飛標！(芊芊你做歪口歪面)
呢個係咩姿勢呢？少林功夫定醉拳
喺呢度最麻煩一樣嘢就係去廁所
小朋友輪住話去廁所，我要帶佢哋去完一個又一個
2016第一日梗係要嚟番張全家幅！
喺呢度可以望到過去隔離，我估係水庫天台卦！
除咗周圍跑就只有周圍跑！一個大地方任佢哋跑走跳...一個字「爽」
跟住仲拎住部相機影螞蟻，搵小昆蟲！
唔知佢哋喺度講乜？芊芊好似鬧緊哥哥咁
連我都瞓咗喺草地度倒轉同佢哋影相，加埋今日咁好嘅天氣真係好舒服！
玩到三點幾我哋就準備落番山
上山落山都只係十五分鐘
落番嚟樂富廣場就去茶木High番個Tea
下一站>>CLICK HERE!
【飲飲食食】樂富 樂富廣場 茶木‧台式休閒餐廳 TeaWood Taiwanese Cafe & Restaurant
全部都好好味！！！！！
Photo by CANON 5D Mark III, Len | EF 24-70mm f/2.8L USM
呀劍評語: 唯一唔方便嘅地方都係去廁所，每次都要行差唔多5-10分鐘來回
樂富配水庫休憩花園 簡介
樂富配水庫休憩花園位於廣播道附近，擁有一片自然草地。連接樂富公園, 花園可供遊人散步休憩。公園内的山坡上亦有塊小墓碑。
地址
香港九龍樂富富安街
開放時間
早上七時至下午六時
免費
交通
港鐵「樂富站」B2出口，沿指示牌步行約15分鐘。
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
05 Aug, 22
【親子好去處】西園 Saiyuen 「Green Summer 綠活之夏」 Green Summer is Coming to Town！
邊個話露營係秋冬活動，熱辣辣一樣可以去Camping，遇上西園今年的「Green Summer 綠活之夏」,哥哥同呀芊又可以夏日炎炎玩個夠。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。
18 Jul, 21
【親子好去處】帝景酒店 x 麗都灣 消暑平價の選 玩足2日1夜
想當年仲記得自己第一篇好去處文，都已經差唔多有成7-8年，其實嚴格嚟講都唔可以叫做文，因為嗰陣文字未發育的我，根本就冇諗過要寫咩分享文，其實我只係寫日記。
12 Jul, 21
【親子好去處】盛夏森林 Splash N' Forest 親子濕身玩水派對
今年好矚目的消暑活動「盛夏森林」 ，周圍都見到佢哋廣告，集玩水、美食、音樂於一身，呢個暑假點都要去玩先似放緊暑假。