【親子好去處】黃大仙草原主題牛池灣公園 Ngau Chi Wan Park

想去大草地玩吓? 佐敦谷? 迪欣湖? 中山紀念公園? 其實唔一定去咁遠! 牛池灣公園你又去過未?

我哋一早去稻香飲咗個靚茶, 就出發去牛池灣公園, 我哋搭港鐵去到彩虹站

A2出口直行到專線小巴站, 搭16A/ 16B/ 16S都冇所謂! 視乎你去牛池灣公園邊個平台

16A 坪石 > 牛池灣豐盛街, 豐盛街紀律部隊宿舍 (可到豐盛街西面中平台)

16B 坪石 > 曉暉花園 (可到豐盛街西面低平台)

16S 坪石 > 峻弦 (可到豐盛街西面高平台)

我哋搭咗16A(只需$3.4)去到紀律部隊宿舍落車(只需5分鐘), 其實行上去都只係要15分鐘

對面就已經係牛池灣公園既中平台

中平台設有兒童遊樂場, 緩跑徑, 大草地, 涼亭等!

環境好舒服, 非常少人!

牛池灣公園既地標, 就係身後呢六隻牛牛雕像

芊芊先拎咗Bubble出嚟吹, 我就喺度呼吸吓新鮮自由空氣....最享受唔駛同人逼唔駛排隊既時侯

原本應該係個小水池, 但係見到冇水, 就同芊芊行咗上去同牛牛影相

不過影影吓有個小朋友行過同佢媽咪講「乜可以上去架咩? 唔俾架喎?」哈哈, 跟住覺得有少少尷尬都係落番嚟, 攪到自己好似XXX咁!

我哋喺附近兒童遊樂場玩, 呢樣玩吓嗰樣又玩吓, 玩咩都唔駛等, 爽丫丫呀!!!

每層平台都設有太陽能收集器! 我估係夜晚時侯供應番公園內既燈光, 真係好環保

之後我哋就喺涼亭度休息, 小朋友就繼續喺草地上玩, 之後陸續有些人嚟喺草地上野餐!

我同哥哥就織咗隻草蜢玩, 但係哥哥話「似咩?!」

佢哋兩個仲玩到除埋對鞋周圍跑! 瞓埋喺個草地度, 自由自在無得輸!

玩玩吓有隻蜥蝪仔喺草地跑跑跑停低咗喺度, 我哋即刻慢慢一步一步行近佢同佢影張大頭!

喺中平台都玩咗差唔多2個鐘, 之後我哋就順邊行埋上去高平台同低平台望吓

喺中平台分別有樓梯往返高低兩個平台

上到嚟高平台發現又一個世外桃源! 一個起大面積既大草地!

不過草地範圍內有多塊大石, 所以小朋友喺度跑都要小心D!

同樣設有洗手間及兒童遊樂場, 緩跑徑同一些長者設施唔少得!

遊樂場都唔算太細, 足夠俾小朋友喺度放電

玩玩吓突然落咗幾秒雨, 哥哥好醒目匿埋咗喺遊樂設施下面, 跟住個個小朋友見到都一窩蜂跟住跑去避雨

真係唔匿唔知道, 個個小朋友嗌出嚟話原來呢度有好多蝙蝠, 起初嚇親我以為真係有, 原來只係....

呢隻大河馬都算係牛池灣公園地標之一

(從兒童遊樂場影向大草地)

俾佢哋兩個喺度放咗陣電! 都差唔多要走, 最後我哋就落埋去最低平台

我哋穿過中平台沿樓梯向下落到低平台!

低平台沒有任何草地, 只係一個比較簡單既公園, 同樣設有遊樂設施, 不過適合較少的小朋友

見到有多個雪榚筒放咗喺地上, 應該係因為舖地的木板撓起了, 所以小朋友要小心點

除咗高平台嗰隻河馬之外, 原來低平台都有呢樣怪怪的Monster! 有好多隻腳仲著住唔同既鞋

最後我哋就咁喺低平台離開牛池灣公園, 行番去曉暉花園綠Van站搭番落去彩虹港鐵站

到三點三再嘆一嘆個大家樂下午茶就番屋企lu

Photo by CANON 5D Mark III, Len | EF 24-70mm f2.8L USM

呀劍評分: 9分

呀劍評語: 又一隱世公園, 遊樂設施大草地樣樣齊, 每一層平台都設有洗手間, 低層設有汽水機, 非常方便!

牛池灣公園 簡介

公園佔地約四公頃，由四個平台組成，一個位於豐盛街東面，另外三個(高、中、低)位於該條街道的西面。位於東面的平台提供體育設施，包括射箭場和籃球場；而位於西面的三個平台則提供休憩設施，包括緩跑徑、太極園、長者健身角、兒童遊樂場、健身站、迷宮花園和水牛雕塑水池。

地址

九龍黃大仙牛池灣豐盛街71號

開放時間
每日上午6時30分至晚上11時

網頁
http://www.lcsd.gov.hk/tc/parks/ncwp/index.html

電話
2322 9437

電郵
[email protected]

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。