【親子好去處】中環 One Piece Summer Carnival @中環海濱活動空間Central Harbourfront

最近成個七月真係一滴雨水都冇，日日熱到就嚟中暑，幸好受到邀請今日嚟到中環海濱參與One Piece Summer Carnival，可以同哥哥一齊濕身解暑！

今日我狠心留低妹妹喺屋企，同哥哥兩個嚟到搵路飛！

(因為場內活動主要適合6歲以上小朋友)

等哥哥放學之後我哋就搭港鐵去到香港站穿過摩天輪就嚟到入場位置(其實在龍和道都有一個入口，那邊才是正門，大家都可以由金鐘穿過添馬公園過嚟)

哥哥，今日一定要盡情放開哋癲番日！

活動去到8月7日咋，大家睇完我介紹後就快D過嚟玩啦

場外有現場售票，也有預售換票，不過大家也可到網上預購門票

入到場之後我哋先去換番條泳褲，做足哂準備功夫，更衣室有冷氣開放也有沖身設施！

現場都有提供儲物服務，只需$20就可以無限次存取物品，職員會用一大黑膠袋裝好你的包包，然後掛上手帶號碼以便確認！

我哋喺未開始玩之前就先去同7米巨型Luffy影相先！我叫哥哥埋去佢旁邊影，就俾大家睇到Luffy究竟有幾巨型

咁多遊戲玩邊樣先呢？就揀Luffy旁邊既滑水天梯先啦！

每個人都會獲發一個靚靚黃色透明水泡！等一陣可以坐住個水泡滑落去，哥哥咁瘦就算坐落去我諗個Pat都會掂地～哈哈

好緊張呀！我哋其實冇考慮過玩唔玩到就傻更更咁衝上去

唔知點解企喺度望上去嗰陣唔覺，當我邊行上去望番落地嘅時侯先至覺得好高

上到去準備要瀡啦！我起初都以為冇乜水，仲拎住部手機拍低哥哥點瀡落去

到自己隨後瀡落去...嘩！原來會連人帶水泡成個拋起，瀡到地之後D水仲好似個浪咁瞌埋嚟！

不幸嘅事就發生...我部手機濕哂！我即刻抹番乾佢，但係已經太遲，發現個Speaker冇聲(其他功能正常)，所以只能夠用whatsapp同人溝通lu！

我心情當然低落咗少少，但係哥哥仍然好開心話要即刻再玩多次！

今次我又搵埋呀劍萬帥的朋友仔嚟一齊玩！佢哋到場之後再一齊玩多幾轉，佢哋就High High，我就玩到個心都跌咗出嚟，真係超級刺激！

同Nami Robin影相，真係大到不行了，個鬼馬哥哥就去搵Nami同Robin個Pat同埋...唔好提喇

最後梗係叫番佢正正經經咁影相啦！

入場都冇幾分鐘已經個人散咗一半，年紀大機器壞！都係要抖一抖同埋調節吓壞手機嘅手情

佢哋就去咗隔離個「前進號水手訓練區」俾佢哋兩個跳餐飽！

好似迷宮咁兩個你追我逐！行到最高仲可以瀡番落嚟

追咗幾個田圈哥哥都開始冇氣！(唔係啩只係啱啱開始仲有好多嘢未玩㗎喎)

場內亦有些設施係只供成人參與，我因為玩咗好幾次滑水天梯，真係叔叔不行鳥！所以我只係望吓人哋玩就算

跟住我呢個貪玩嘅老爸，嗰頭先話不行了，呢頭就忍唔住想挑戰吓自己

所以去咗玩障礙賽，如果連過4關就可以得到小禮物！當我仲以為自己好有機會過哂4關，點知～

玩咗咁耐真係要回一回氣，我哋行入去Popup Store打個轉睇吓有咩正嘢買先！

基本上你諗到嘅都有得賣，就連你諗唔到嘅都有得賣！

Luffy頂帽呀！但係我想要佢對橡筋手多D，如果有我一定買番對，咁就可以坐喺屋企伸長對手番公司做嘢～

店內好細心設有商品數量圖，等你唔駛慢慢搵，又或者可以快D死咗條心！

Popup Store外有各人形紙板，仲有Chopper喺度陪你影靚相！

除咗水上玩樂設施，今次我最期待就係可以見到呢隻特大版別注烈陽號，仲大過上次Times嗰隻！我仲問有冇得行上去㖭...

既然冇得上去就唯有離遠咁同佢Selfie！哥哥扮出有型Pose，但係你似個奸角多D喎

場內職員很熱心的幫我同哥哥影番張相！原來有個最佳攝影位置，我哋就企喺「X」上面同烈陽號合照啦

今次大會都設有兒童專區Kids Zone！當然要繼續俾哥哥入去放電啦

場內總共有4個吹氣設施，適合唔同年紀小朋友玩

大烏龍嘅我只係一心諗住嚟玩水，唔記得咗幫佢帶對襪，不過$10都好合理！

(溫馨提示：場內所有消費都係要用DoDo咭，所以買嘢飲買嘢食同買呢對襪都要先去增值，不過最低增值面額只係$10，唔駛逼住你一定要增值好多錢用唔哂！值得讚)

(不過又唔係全部要用DoDo咭，因為有幾部汽水機放喺度大家可以用八達通買飲品都得)

Kids Zone外設有2個攤位遊戲，一於試吓自己眼界先，睇吓仲係咪寶刀未老！

𤓓爆嘅片段大家可以Skip咗佢，都係睇吓小朋友玩好喇！

最後去鐵人滑梯度無限Loop咁瀡瀡瀡...

我哋由3點玩到6點，真係玩完好似俾人打咗一身咁，成個散哂！但係真係好爽

最後梗係要同偶像Luffy影番張型仔相，望住呢兩張相真係覺得自己充滿正能量！

天都開始黑，我哋都要慢慢「懶」番屋企，大家唔好以為咁早閂門喎，仲有全夜通Night Pass可以放工同班同事嚟癲㗎！

今次仲得到咁多紀念品，真係好開心！哥哥玩攤位遊戲嘅時侯仲拎到個獎牌禮物㖭

當然獎牌要送俾今次冇得去玩嘅芊芊公主啦！

Photo by CANON 5D Mark III, Len | EF 24-70mm f2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 9分

呀劍評語: 老實講，識玩一定係玩全日通，因為你一定玩到唔夠喉，要無限Loop再玩好多次，真係好Crazy！好爽好正！唔嚟癲番日真係對唔住自己

One Piece Summer Carnival 簡介

首個海賊王Action Game 搶先登陸香港今個夏天，草帽小子約定香港粉絲！各位《One Piece 海賊王》粉絲應該也很了解，我們未來海賊王路飛跟他的草帽小子一伙，所到之處總離不開刺激緊張、展現身手的動作場面，還有一場又一場狂歡樂透、吃個痛快的盛宴派對！7月8日起，人氣動畫大作《One Piece》中的「前進號」、「烈陽號」將暫時駛離「偉大航道」，停泊在香港島中環海濱區，連續31日舉辦首個大型《One Piece》主題Action Game。

地點

中環海濱活動空間

活動日期
2016年7月8日 – 8月7日

費用
基本入場費:$50

全日通 Day Pass
周一至五成人$400 小童$200
周六日及公眾假期成人$500 小童$300

全夜通 Night Pass 每日6:00pm開始可享全日通同等優惠
(只限現場發售)
逢星期一至五 $250
逢星期六、日 $350

其他活動單次收費，請參閱官方網頁
http://www.onepiececarnival.com/help.php?action=index

12歲以下的遊客：免費進場，但同時必須有大人或監護人陪同，如無監護人陪同，活動主辦單位有權拒絕其進入遊玩。

電話
6989 1836

電郵
[email protected]

網頁
www.onepiececarnival.com

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。