【親子好去處】太子道西一日遊懶人包花墟公園 + 園圃街雀鳥花園(雀仔街) + 大坑東遊樂場

真係大熱天時想去個街都要轉軚，但係又想小朋友可以放吓電，不過其實只要花點心思，行程都可以好精采滿足！

花墟公園 Fa Hui Park

天氣真係好悶熱，成個天空都好似俾保鮮紙封住咁

我哋今日嚟咗屋企附近嘅花墟公園放電！佢最大特色就係四圍嘅紅磚，嚟玩都覺得自己去咗睇文物咁！

其實呢度真係歷史文物嚟㗎，以前呢度係花墟批發巿場及花墟村，但係一場無情火災...去到1957年先再重建為公園

不幸嘅事即刻發生，本來帶咗件新玩具(以物易物換來的)嚟玩，點知俾哥哥一玩就整爛咗！

所以我同妹妹行開唔睬佢，行埋一邊自己玩！呢度應有盡有，搖搖板，瀡滑梯，打韆鞦必有...

就連老人家運動嘅設施都有！(芊芊連呢D都唔放過，實行咩都要掂吓)

老遠望到自己最Like嘅韆鞦，當然要去玩吓！

哥哥終於學識自己打韆鞦Fing上去，唔駛下下要人推...

公園地方都好空曠，所以可以好放心咁俾小朋友周圍跑跳

哥哥收拾心情出番嚟玩啦，同妹妹一齊玩轉聲筒，小朋友真係很天真，即使玩過無數次，當聽到聲音傳過來，仍然覺得很新奇！

公園人唔算多，可以盡情好似包咗場咁玩！

嚟到公園右手邊係幾個球場，今日見到一大班姐姐喺度打緊排球！

遊樂場同球場中間夾住一條長樓梯，我同哥哥試吓跑上去望吓先

忽然見到有個魚雕像，真係...(無端端多舊魚)

大熱天時仲要行咁多級樓梯真係攞人命

原來上面係一條跑步徑，仲有一支大炮遺址(怕行樓梯的話可以唔駛上嚟！)

沿住跑步徑我哋行番落去

唔駛航拍都可以影番一張高炒公園Shot

喺球場那邊有小士多，不過都幾貴(雖然平過7仔)，例如一罐可樂都要$7

其實行幾步番去大坑東遊樂場，那邊的士多真係全港最平，只賣$5，係凍冰冰㗎喎！

當我哋打算離開之際，突然殺出一隻程咬金，就係呢隻龜仔！(都有手掌咁大㗎)

其實係一個媽咪同囡囡養的，佢哋帶龜龜嚟散散步

一次簡單公園之行，因為龜龜嘅出現即刻變得不一樣

我最喜歡就係行程當中出現的變數，經歷到的總會同別人不一樣

相比之下去商場展覽，人人都是一樣的經歷！

兩個繼續喺度篤隻龜個龜殻！而且仲同龜龜小主人做咗朋友，一邊玩龜一邊有講有笑

其實另一方面可以俾佢哋感受多些不同的人事物，呢個都係我最鼓勵的

░░░░░░░░░░░░░░░░░░░░░░░░░░░░░░░░░░░░░░░░░░░░░░░

園圃街雀鳥花園(雀仔街) Yuen Po Street Bird Garden

離開咗花墟公園之後，我哋就過到對面嘅雀仔街睇雀仔！

上次嚟過太匆忙所以隨便看看便走了，今次可以慢慢散住步行吓睇吓

仲記得細細個嘅時侯，對動物跟本冇咩觀念，唔知道每種動物有分公乸，以為狗就係男仔，貓就係女仔

仲要以為雀仔得一款(麻雀)，所以我決定在自己囝囡細細個嘅時侯，帶佢周圍睇接觸多D唔同事物認識多D

上次嚟都唔留意，原來裡面的攤檔賣住一捆一捆的草蜢！好嚇人呀

每次嚟我都會諗唔知第日老咗會唔會自己都養番一籠雀呢？

一場嚟到梗係要探吓佢哋嘅朋友仔鸚鵡啦！

咁耐冇見覺得你又靚仔咗喎！

呢隻全灰帶紅尾的鸚鵡好靚！佢仲冇鏈縛住...真係好有靈性好乖

呢隻大咀鸚鵡好得意，睇住佢食瓜子，原來真係唔駛用對爪都食得到！

其實睇雀仔又實乜去海洋公園，近近哋去雀仔街咪得囉！

由雀仔街行過嚟只係5分鐘路程, 點解又介紹公園？其實大家真係有所不知，呢個地方除咗玩其實係下午茶嘅好地方！

成個大坑東遊樂場由三個足球場, 跑步徑(不同大小)同一個欖球場組成

我要介紹就係呢個小食亭，佢同其他一般小食亭有咩唔同？一個字「平」！

呢間小食亭都非常齊全咩都有, 同埋價錢都唔貴! 老闆係伯伯婆婆夫妻檔睇舖, 好親切好友善!

西瓜波番皂泡一定唔少得啦! 呢款咁懷舊既士多仔真係買少見少

小食亭對出都有幾張枱櫈放喺度, 自己製造一個高檔High Tea環境, 聽吓雀仔唱歌, 吹吓涼風! 食番隻雞脾嘆番罐可樂, 真係人生樂事!

可樂($5); 雞脾($11)

魚蛋燒賣不在話下，仲有極懷舊嘅滋滋冰，有提子同益力多味！

High 完 Tea太陽出嚟, 仲可以去草地放埋佢哋僅餘嘅電

成個球場都冇人, 任踢入射唔嬲!!!!!~ YEAH

其實呢個球場地方好大, 就算球場範圍外都有好多草地, 所以其實一家大細都可以落到嚟舖張墊喺草地上野食! 而且人又唔多, 去又方便，場內兩側都有好多小木櫈同靚靚樹木!

不過有點可惜, 呢度唔俾踩Roller, 單車, 玩搖控飛機(搖控車冇問題), 同埋唔準帶狗仔嚟!

始終地勢唔高, 所以都唔俾放風箏! 何況風都唔會夠大啦

近界限街同大坑東道交界有一座建築物, 整座都被藤樹包圍住, 感覺好似去咗天空之城咁，原來係個蓄洪池!

踢完波放吓飛機, 喺大坑東遊樂場就燒咗2個鐘時間又俾佢放到電喇

Photo by CANON 5D Mark III, Len | EF 24-70mm f2.8L USM

呀劍評分: 9分

呀劍評語: 每個地方看似簡單，其實自由組合埋之後都可以變成一日豐富的親子行程！

花墟公園簡介
公園內設有洗手間及更衣室，4個球場

地址
九龍界限街101號

開放時間
每日上午7時至晚上11時

電話
2741 4044

░░░░░░░░░░░░░░░░░░░░░░░░░░░░░░░░░░░░░░░░░░░░░░░

園圃街雀鳥花園(雀仔街) 簡介
園圃街雀鳥花園屬中國式庭園建築的主題公園，位於重建範圍內的康樂街，俗稱「雀仔街」，向以售賣鳥類寵物聞名，吸引大批本地愛雀人士及遊客。為了保留「雀仔街」的特色和風貌，故決定在園圃街興建這個雀鳥花園。花園內除休憩設施外，並設有七十個雀鳥檔位給「雀仔街」的販商繼續經營。

地址
九龍太子太子道西（入口處於界限街及園圃街）

交通
從港鐵太子站B1出口，沿太子道西向旺角大球場方向步行15分鐘。

開放時間
每日上午7時至晚上8時

電話
2302 1762 (辦公時間內)

░░░░░░░░░░░░░░░░░░░░░░░░░░░░░░░░░░░░░░░░░░░░░░░

大坑東遊樂場簡介
1條480米長的緩跑徑, 1足球場, 1欖球場, 小食亭, 洗手間及更衣室

地址
九龍深水埗界限街 63 號

交通
太子地鐵站從 A 出口離開
→經運動場道 (途經 "嘉康中心"), 轉左至通菜街
→ 經通菜街 ( 途經 Shell 油站 ), 於界限街行人輔助線過馬路後轉右
→ 沿界限街至大坑東遊樂場南面入口

石硤尾地鐵站從 B1 出口離開
→沿窩仔街 (途經 "萬寧" 石硤尾分店), 轉右至棠蔭街
→沿棠蔭街直行 (途經 "聖道中學"), 於轉處到達大坑東遊樂場北面入口

開放時間
每日上午7時至下午6時

電話
2777 8946

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。