【親子好去處】屯門 T · PARK [源

自T · PARK [源 · 區] 開幕受邀請參觀，今日帶埋幾個家庭一齊再嚟多次! 大人細路都玩得超開心

以團體報名的上限人數已增至為15-50人，可於一個月至半年之前開始預約，不過唔可以預約[源 · 區]免費穿梭巴士，需要自己Book車出入!

雖然要自支車費，但係如果你想以個人報名(最多7人並需於30日前)，真係唔知可以幾時先預約到，真係星期日至六日日都Full哂!

T · SPA [泉 · 源]

10:15am-11:30am

12:30pm-14:00pm

14:30pm-16:00pm

16:30pm-18:30pm

T · PARK [源 · 區] 導賞 Guide Tour

10:30am-12:00pm(廣東話)

12:00pm-13:30pm(英語)

14:15pm-15:45pm(廣東話)

15:45pm-17:15pm(普通話)

17:15pm-18:45pm(廣東話)

今次再到T · PARK [源 · 區] ，落咗車穿過入口見到同上次已經唔同，[源 · 林]靚咗好多，仲有個嬉水噴水廣場，如果夏天熱辣辣嚟到嘅時侯玩真係啱哂

仲有個噴得好高好高嘅噴水池，兩個都話要同噴水池影張相，好似喺個頭度噴出嚟咁

又一次成功帶團！同大家影番張相留個念先

同上次一樣，導賞團開始之先，集合在[源 · 廳]先聽職員介紹，然後就分批去進行導賞活動，喺介紹前播放嘅影片，居然見到呀劍一家(係上次獲邀請參觀時的片段)，特別係好多個鏡頭都見到呀芊，真係攪笑！

大家可以先下載T · PARK [源 · 區] 的APP，因為一陣參觀嘅時侯都可以用APP去解碼QRcode

今次我哋冇跟導賞團，反而自己周圍逛逛，去一D我哋上次未去過嘅地方

係呀，有未去過嘅地方㗎，因為上次獲邀請參觀時[源 · 區]係未正式開放，所以有幾個地方都未預備好俾公眾參觀，其中一個就係呢個足浴區，就喺大噴水池隔離，大家可以赤腳走入淺水溫泉池，水溫都幾熱㗎！不過就欠缺咗D遮蔭設施，烈日當空坐低PatPat都幾熱㗎！

不過我哋都搵到個陰涼位坐低舒舒服服咁浸

佢哋兩個就梗係當嬉水池咁玩多過當溫泉浸腳啦

浸咗一陣間，我哋就再向[源 · 湖]出發，一路向前直行，聽講可以欣賞好多雀鳥！

沿路仲有好多靚花睇！當然忍唔住又要停低影靚相啦

繼續行大約5分鐘就見到盡頭！

呢度就係[源 · 湖](其實有少少跌咗眼鏡！乜原來咁細) 同埋真係要自備望遠鏡先得，不過今日行過嚟都只係見到一兩種雀鳥

常見鳥類有只有板上的幾種！

沿路行番出去，入番大樓參觀其他地方！上次喺[源 · 點]，D電腦全部都未玩得，今次終於有得玩啦，兩個好開心走上去篤篤篤...

睇吓玩咩先，原來就係篤番[源 · 湖]可以見到嘅雀鳥資料！

佢哋搵到每一隻雀鳥都好興奮咁要話俾我知，叫我同D雀仔(Mon裡面的)影相

呢個世代嘅小朋友唔通真係要睇虛擬影像？冇得睇真真實實嘅雀仔？

跟住我哋上咗去[源 · 景]，同上一次都唔同哂！呢度放咗好多Recycled Products，全部都好有意思

呢幾張車軚造成嘅櫈上次都見過

身後呢個似係屏風嘅設施其實係木地板所造成的，真係好利害！本來可能係別人搬屋將要拆掉去堆填區的東西，搖身一變可以造成咁型嘅裝置

呢張由好多漫畫紙張合成嘅大枱好有型！

仲有牛仔褲布車出嚟就梳化套！

我哋喺呢度逗留咗好耐，唔駛匆匆忙忙跑景點，今次真正舒舒服服咁去欣賞風景

我最欣賞係呢張用工業用的油罐造成嘅櫈，真係好想屋企都放番幾張！

大家又估吓前面呢幾張木櫈係點嚟嘅？

貼士係灣仔碼頭....唔係水餃呀，原來堅係灣仔碼頭前身嘅防撞木，將佢哋翻一翻新又可以俾個新嘅生命佢

然後我哋就坐低俾佢哋兩個畫吓畫！

就連支筆都得意過人，起初以為係好多條草放喺度裝飾用，原來係個筆套

喺[源 · 景]落番嚟我哋就去餐廳醫醫肚！經過呢個污泥夾又同佢影番張相先

今次嚟餐廳終於開咗啦，叫做[源 · 茶]，坐位唔算多，不過足夠預約咗嘅遊客享用

同樣所有座位嘅傢私都滿有環保概念

餐廳提供的食物款式唔多，有意粉／螺絲粉／Pizza等等，全部都係預先包裝好放入微波爐叮熱俾你食，仲有沙律，三文治及其他飲品等

全部都唔算貴，都係$20-$40不等

我哋專登坐開咗，去咗個好有特色嘅地方食嘢！

就係呢個由幾條木砌成嘅座位！

味道唔算特別好食，但係我覺得都還可以！如果大家覺得唔夠，都可以自備食物入[源 · 區]

最特別一樣嘢就係呢度啦！有個自助洗碗區，推行環保教育，所有食客都要自己親手洗自己碗！(唔怪之得嘢食咁平啦...哈哈) 但係我好欣賞呀，尤其係依家D小朋友一定要學識

哥哥妹妹喺屋企都有練開功，所以洗碗對佢哋嚟講冇難度

食完嘢又未夠鐘去[源 · 泉]浸Spa，一於走上去[源 · 臺]欣賞一下風景

由[源 · 茶]對出的大露台轉左或右到盡頭，就會見到樓梯直上就是了

一望無際就係呢D啦！對住成個後海灣真係見唔到盡頭！風景靚都不得了，秋天嚟到仲好涼爽大風，真係好想就咁喺度瞓個晏覺

影相景點又出現啦！就係同身後嘅焚化爐影番張相先！

由[源 · 臺]望番落去[源 · 林]都幾靚

[源 · 泉]呢一段就要Skipped咗啦！因為係唔俾拍攝㗎

估唔到離開前俾我哋見到靚靚日落同埋呢道咁長嘅彩虹，所有家庭見到都好開心，好似為今次旅程畫上個完美句號

本來擺好哂位同彩虹影靚相，點知媽咪把遮中途走位，攪到兩個眼都掹唔大...

大草地就梗係用嚟跑跑跑同跳跳跳！

最後穿過[源 · 林]就出番去門口上車離開了～

仲有呢個靚靚嘅荷花池，加上日落照落去嘅陽光顯得特別靚！實在好值得推介俾所有一家大細，希望大家都可以有機會到訪參觀一下！

Photo by CANON 5D Mark III, Len | EF 24-70mm f2.8L USM

呀劍評分: 10分

呀劍評語: 一個又好玩又多嘢學嘅地方，必定係假日親子好去處！最緊要係免費入場！

T · PARK [源 · 區] 簡介

T · PARK [源 · 區] 標誌著政府為了社會利益而致力實踐香港「轉廢為能」策略的決心。這座污泥處理設施更展現一個願景，為積極鼓勵並提升市民對廢物管理、資源回收和循環再用建立正面態度。T · PARK [源 · 區] 不僅是一座污泥處理廠，透過其休閒和教育設施，它更是一個學習和體驗香港綠色文化的地方。

地址
屯門曾咀稔灣路

開放時間
星期一、星期三至日上午 10 時至下午 7 時

交通
乘專用穿梭巴士

聯絡電話
2910 9700

網址
www.tpark.hk

電郵
[email protected]

費用: 全免

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。