一年一度嘅盛事UBS HK OPEN今年我哋又嚟啦，呀劍家同Golf真係好似好有緣份
今次我哋去到上水鐵路站坐UBS提供的穿梭巴士，唔駛5分鐘就到達香港哥爾夫球會，今年亦設有中環IFC同九龍塘鐵路站穿梭巴士，供入場朋友往來香港哥爾夫球會
今次於十二月舉行(上年係十月真係熱到死)，天氣真係好到不得了！
我哋大約2:00去到現場，準備好哂要玩番夠本，今年仲多咗好多嘢玩
我哋行行吓見到一個膠樽造型的回收箱，好得意呀！兩個好奇望到實一實
首先我哋嚟到Information Centre，只要裝咗UBS Engage in Hong Kong個App同authorize埋就可以得到一頂官方帽，今日咁好太陽，戴帽遮一遮就最適合不過
一望無際嘅Golf場景真係好正
比賽進行中，我哋在附近只係睇咗一陣，跟住就急急腳去咗Kids Zone玩
邊行邊感受這個環境，覺得自己好似去咗外國咁！
我哋嘢都未食，就第一時間去玩吓每個贊助商的攤位遊戲，呢個礦泉水品牌的攤位我哋上年都有玩，今年仲增設咗VR，可以企喺滑浪板上面玩滑浪Game
這個VR鏡對芊芊嚟講太大了吧...哈哈
仲有好多POPS俾我哋拎住嚟影靚相！
大草地仲提供大電視俾大家坐喺草地上觀賞球賽
然後我哋嚟到Junior Art Hub，今年多咗好多嘢玩，唔單止沙畫DIY同彩繪，今次仲有部單車畫玩，不過實在太多人參與，所以我哋先登記，到4點再番過嚟玩！
然後同上年一樣，有個Golf Zone可以俾小朋友體驗一下打哥爾夫球，分別3種唔同打法
芊芊就冇咩興趣，走咗去玩沙池！
哥哥一次比一次打得好，我都諗緊好唔好俾佢試吓去學打呢？！
真係識得扭身喎！
跟住去另一邊試吓推球入洞，排喺佢前面個女仔同Hysan差唔多大，但係超勁真係一桿入洞
最後一個小遊戲就係要將球打入去5尺前面的呼拉圈
算係最難最難玩的一個，每個小朋友打完都要自己去執番個波俾下一個小朋友
唔好以為剩係得Golf玩，吹氣遊樂區點少得...小朋友又可以喺度放吓電
玩到差唔多，喺去Junior Art Hub之前都要醫醫個肚，我哋要咗個四人份量嘅野餐禮籃 Picnic Hamper
呢個野餐禮籃真係超豐呀，全部食物由酒店提供㗎，真材實料冇得頂！我哋拎咗出去後面的大草地慢慢嘆
野餐禮籃裡面仲附送地𥱊，我哋搵咗棵樹，喺附近掀開地𥱊，將D食物攤開哂出嚟
一望無際嘅大草地，真係超寫意！
兩個一邊食嘢一邊跑嚟跑去，自由自在地周圍玩。
其實小朋友爬嚟爬去跑嚟跑去，從來都唔係錯，只不過係香港居住地方太細，結果造成俾大人日日鬧，甚至整親撞親好危險！你睇吓哥哥跑到草地中心，好似變咗隻蟻咁！
其實望過去更遠嘅地方，真係非常大！但係成個地方得我哋幾個人喺度，好似包咗個場咁，簡直就皇帝級享受！
呢度仲有好多款啤酒飲，真係爽呀！
跟住我哋番到去Junior Art Hub一齊製作沙畫，同埋面部彩繪！沙畫的製作方法，原來只要將預先製作好的圖畫，撕開貼紙再選擇你想要的顏色嘅沙，用匙筆起倒落去上面，沙就會自動黏貼咗喺上面，原來出到嚟個效果都幾靚喎！
同上年一樣有個自助油顏色區，最啱2-3歲小朋友玩，因為有沙畫同埋其他嘢玩，呢個區變咗冇人吼了
仲記得哥哥由細到大都唔鍾意俾人彩繪，直到上年嚟過UBS之後，姐姐幫佢畫咗隻靚靚金魚喺塊面度，又畫過番尋味！所以今年嚟到已經諗定想畫咩...
佢本身又話要畫Spiderman又話要畫白兵，結果最後怕醜唔敢同姐姐講想要咩，就俾姐姐自己揸主意畫咗D彩虹Pattern就算
相反妹妹唔知頭唔知路，第一次彩繪喺塊面上面，佢同人哋講話Spiderman，佢諗住姐姐只係畫喺手(因為上次佢去澳都畫咗兩隻Elsa & Anna喺手度)
點知呢個姐姐好快手咁落咗手喺佢塊面度
實在太利害畫得太似！我唔敢俾太大反應，同埋我拎走咗枱上面塊鏡，因為我驚芊芊見到自己個樣就唔肯再俾姐姐畫
最後畫完佢自己照鏡望到都有D怕醜但係又有D開心，估唔到佢第一次彩繪就咁夠膽
跟住哥哥就走咗去玩另外一樣嘢「單車繪畫」，個原理就係唧少少顏色落去單車前面個盤度，跟住坐上單車準備踩，每踩一下前面個轉盤就會高速旋轉，D顏色就會周圍咁飛，最後做成一張藝術畫
選擇自己喜愛嘅顏色！
寫番自己個大名，放定張畫紙喺度，跟住就開始踩啦！
只要輕輕踩就已經可以令前面轉盤高速旋轉了！芊芊未夠高踩到腳踏就唯有職員哥哥幫幫手
估唔到佢哋兩個揀嘅顏色都係一樣！
跟住哥哥見到妹妹塊面畫得咁靚，又走番去叫姐姐幫佢畫個面，大家估唔估到佢面上畫緊係咩？
係「白兵」呀！不過唔講以為係熊貓Hahaha
白兵同Spiderman一齊嚟張世紀大合照先
今次球賽唔單止有親子區，仲有Band表演，我哋都喺度欣賞咗一陣
超輕鬆的表演！唱嘅聽嘅都一樣咁Relax
大家都好隨意坐喺草地上面，有D拎住杯啤酒邊吹水邊聽歌
芊芊就同媽咪喺度睇人唱歌，哥哥就走番去玩沙，玩到成個身都係，不過Golf場嘅沙同海灘唔同，係靚好多同埋唔黐身，所以大家都可以放心俾小朋友落去玩
差唔多5:30，大會安排咗幾班巴士來往中環九龍塘及上水，我哋都開開心心咁離開球場去搭車番屋企
總結今次旅程真係玩得好開心，地方超大，人又唔多！又可以當野餐活動，決定每年都要嚟！
番到屋企，發現跟野餐禮籃的幾個哥爾夫球，原來係白朱古力嚟㗎！嚇咗一跳，一心都以為係玩具紀念品...多謝UBS
Photo by CANON 5D Mark IV, Len | EF 24-70mm f2.8L II USM
呀劍評分: 10分
呀劍評語: 今年比往年辦得更好，除咗親子區多了很多遊戲，而且仲有咁豐富嘅野餐禮籃！真係超級無敵開心，最緊要係這遍大草地，真係好似置身喺外國，雖然只係幾個鐘，但係都已經好Relax，真係希望出年有機會再嚟，而且要一早嚟玩足全日！
香港高爾夫球公開賽 簡介
「香港高爾夫球公開賽」是香港體壇歷史最悠久的比賽，也是亞洲頂級的職業高球賽事之一。這項比賽始於1959年，歷屆選手猛將如雲，包括九位大滿貫賽事冠軍（九人共囊括27項重要賽事的冠軍）得主。 Source: http://www.discoverhongkong.com/tc/see-do/events-festivals/sports-and-recreation/hong-kong-open-championship.jsp#ixzz3pb7Sl9iq
地址
粉嶺香港哥爾夫球會
開放時間
日期: 2015年10月22日至25
交通
港鐵上水站有免費穿梭巴士直達
3626 8604
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
05 Aug, 22
【親子好去處】西園 Saiyuen 「Green Summer 綠活之夏」 Green Summer is Coming to Town！
邊個話露營係秋冬活動，熱辣辣一樣可以去Camping，遇上西園今年的「Green Summer 綠活之夏」,哥哥同呀芊又可以夏日炎炎玩個夠。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。
18 Jul, 21
【親子好去處】帝景酒店 x 麗都灣 消暑平價の選 玩足2日1夜
想當年仲記得自己第一篇好去處文，都已經差唔多有成7-8年，其實嚴格嚟講都唔可以叫做文，因為嗰陣文字未發育的我，根本就冇諗過要寫咩分享文，其實我只係寫日記。
12 Jul, 21
【親子好去處】盛夏森林 Splash N' Forest 親子濕身玩水派對
今年好矚目的消暑活動「盛夏森林」 ，周圍都見到佢哋廣告，集玩水、美食、音樂於一身，呢個暑假點都要去玩先似放緊暑假。