【親子好去處】元朗第二屆廈村鄉文化美食嘉年華

有一日在電腦前無所事事Click到在元朗有個美食嘉年華，我見星期六都入開去不如順路去睇睇有咩玩，點知有意外大收鑊！

我同芊芊在元朗警署搭K65去流浮山方向到廈村，大家又或者可以搭西鐵去到天水圍然後轉搭K65或K75，不過超多人排隊上車唔駛諗有得坐！

見到大大個吉祥茶樓就好落車，已經見到一個二個大紅Booth就是了。

原來呢個廈村鄉文化美食嘉年華今年只係第二屆

佢一邊係小攤位遊戲，另一邊係乾貨美食！

我哋先去玩吓先，好簡單嘅代幣換購程序...哈哈，好似去咗大陸A貨迪迪尼樂園咁！10蚊先得1個幣好貴呀...100蚊就13個金幣又好似太多，最後揀咗個中間50蚊，玩6次過吓癮就算數

玩之前梗係睇吓人玩取取經先，如果唔係「乍」一聲咪用完D金幣。

原來掉彩虹雖然一個金幣玩一次，但係原來一次可以換到10個小金幣掉，咁都差唔多...起初仲以為一個金幣值10蚊就咁掉出去，幾驚中咗伏...

呢個超難玩囉...要每個圈掉中一支汽水樽

呢個射槍同射箭都唔駛預芊芊

估佢唔到，芊芊居然3個波掉到1個入筒冇彈番出嚟中咗個細獎

最後我哋剩番一個金幣，我哋揀咗番去掉彩虹，因為好似換10個幣去掉冇咁快玩完，但係點知我拎咗兩三個幣同芊芊一齊掉，居然俾我掉中咗個大獎，我都未試過中頭獎但唔係好開心，一來我唔識呢隻咁大嘅公仔，二來要拎住佢周圍行，點攪呀...

你就開心囉...

本來諗住入去吉祥茶樓食個下午茶，點知今日唔開喎！

隔離呢間士多就有開，不過我哋最後都係唔太肚餓，反而去攤位掃街睇吓有咩食

呢幅壁畫巧靚靚呀！今日除夕啱哂，雖然係新曆，但係都勁有新年氣氛！

呢度簡直就好似一個小小年宵花巿咁，咩都有得賣有得食

而且所有人都好有人情味，大家見到我拎住咁大隻公仔都叫我可以放喺佢度先，轉頭番去拎，經過見到嘅人又好似街坊咁口吻，問我玩邊個攤位贏...真係好開心

話哂呢度都係一條村，古舊建築參觀就一定唔少得啦！我哋跟住人行入去睇吓有乜東東

穿過大門見到一大班鄉親父老喺度開會

我哋繞過隔離度門再去周圍睇

感覺好似自己番咗鄉下咁，話時話自從十幾歲之後都冇番過去！

行到嚟呢度見到個真係百分百嘅「公園」

撞啱導賞進行中，我又八卦去聽吓嬸嬸講吓呢度嘅歷史先

原來以前呢個位置係一家小學，依家已經變咗做校友會

後園見到有個小草地，又走去瞓吓跑吓！

行番出嚟我哋決定要搵吓嘢食啦！

我哋見到呢檔賣砵仔糕的好有特色

全部都係迷你版細細件，有差唔多12款唔同味道，20蚊可以任揀6件

放埋一齊5顏6色好靚呀，雖然食落去每一種味道都唔係話好濃好重，但係我覺得都好有Gimmick

雪凍凍食落去就梗加好食！

仲有好多唔同嘢食，如果喺度掃一條街都夠哂飽！板燒牛仔粒好正呀

最後逛多陣就離開啦，我覺得場地細細唔多人好好行，決定下年一定要帶埋老婆同哥哥嚟多次

我哋過番去對面馬路搭巴士去天水圍西鐵站就搭車番屋企啦！

Photo by CANON 5D Mark IV, Len | EF 24-70mm f2.8L II USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 10分

呀劍評語: 可以話係隱世年宵，簡直係食玩買好去處！最緊要人少少又好行，而且仲有歷史文化導賞，予玩樂於學習，出年值得再嚟！

廈村鄉文化美食嘉年華 簡介

由厦村鄉舉辦第二屆元朗廈村鄉文化美食嘉年華，屆時厦村廣場將設置數十攤位：除咗有美食、攤位遊戲、仲有表演同埋免費鄧氏宗祠導賞團﹗

地址

厦村鄉鄧氏宗祠外廣場

日期
29/12/2016-2/1/2017 (已完結)
21-27/1/2017 (農曆年宵花巿)

時間
上午十時至晚上十時

免費入場

交通

體育路去到欖口村路，再轉入欖堤東路盡頭就到448農莊
(免費泊車，車位有限)

查詢電話
6282 8832

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。