【親子好去處】YHA 賽馬會摩星嶺青年旅舍

自從上年去過YHA昂坪戴維斯青年旅舍的兩手fing-fing去露營2.0，就希望喺會藉完之前再揀多個地方去，於是本身打算去完2.0，梗係嚟番個1.0，但係天氣實在太熱，於是我哋就Book咗YHA 賽馬會摩星嶺青年旅舍，不過始終想舒舒服服玩番晚，所以都係瞓番住宿營舍嘆冷氣

我哋喺堅尼地城買好哂餸就準備上山去，因為夾唔啱Shuttle Bus的時間表，所以我哋都係打的上去，差唔多$60埋單

去到旅舍閘口，閘口係鎖上的。原來要叫職員出嚟開門，我覺得有少少唔太方便，因為有陣時職員望唔到的話就要傻傻咁企喺出面等 (可能之前曾經有唔安全事發生過卦)

今日天氣欠佳，所以周圍都落雨濕濕

有其他朋友都訂了兩手FingFing 1.0(想知係咩睇番官網介紹) 其實我哋上年都去咗昂坪的戴維斯營，那個屬於 Version 2.0，不過今年夏天太熱，還是住有冷氣營舍比較好!

我哋先入 Office Check 個 in 先

接待處開朝7晚12，真係完全唔驚夜晚有事唔知搵邊個!

呢度有哂大家一切所需，喺休憩室嗰有好多儲物櫃提供，如果大家冇帶鎖，都可以喺度買番個! (不過如果喺度住一晚有房的話，都唔太需要用儲物櫃，只係方便D唔駛下下走出走入)

本土紀念品當然唔少得

成個營舍都有免費WIFI提供，不過每個位置都要登入一次

宿舍都有提供DIY早餐，價錢唔算貴

出邊仲落緊毛毛雨，我哋拎咗房匙，職員又同我哋Briefing完之後，我哋都留咗喺度休息一陣

可能大家最擔心係附近冇7仔，因為呢個營地喺摩星嶺都比較「山卡啦」

不過呢度咩都有! 杯麵波仔飯都有，唔驚會餓親!

呢個營地都有好多唔同團體或者外藉朋友入住，見到周圍佈置都好文青好年輕呀!

YHA真係遍佈世界各地，一張會員證可以用喺唔同地方，每年會費$150，如果過期前續會可以慳番$40!

一於喺度捉下棋玩下層層叠

之後我哋就入房放低行李先，房間企理好舒服! 我哋住的係家庭房，有一張雙人床再加碌架床

3-4個插蘇位，絕對夠用!

有冷氣、蚊燈、風扇

我哋今次嚟即使落雨濕濕，但係都冇咩蚊喎!

雨勢開始減弱，又未開始預備晚餐之前，當然慢活一番! 傳說中270度超級無敵大海景真係冇得歎

聽職員講今朝有好多記者朋友上到嚟影「遼寧號」，原來呢度真係睇得好清楚! 知道「遼寧號」訪港，不過好似唔係人人可以上到去參觀，同埋上得去又唔俾影相，依家喺度見到(雖然遠咗D)，但係都好開心!

我今日冇預備到Zoom Lens所以只好遠遠的望着，再Google張相俾小朋友睇

(資料圖片from Google) 係咪同我見到的差好遠呢...哈哈~

入咗營一段時間，原來都只不過過咗1個小時多...其實平時自己真係太匆忙，所以今次可以好好的跟小朋友享受親子時光

雨開始停落嚟，小朋友當然要盡情玩踩水氹啦!

雨過天晴!!!

依家睇「遼寧號」就更加清楚喇

營舍有公用洗手間，十分乾淨唔臭!

仲有風筒提供

然後參觀一下飯堂

環境好舒服好乾淨，廚房都係大家共用

每張枱上面都有唔同的棋盤，喺度邊食邊玩棋又唔錯喎

廚房有多個電子煮食爐，大家都唔駛太擔心唔夠用，因為大家食飯時間都唔同，其實都真係好夠用唔駛爭。

所有碗筷都有提供，簡單調味料都有(糖、鹽、豉油之類，都是上手住客用剩的，但很乾淨安全)

大人去煮嘢食，小朋友可以去休憩室玩

地方夠大又好舒服

剛才提過的儲物櫃，不過都係透明的，所以貴重嘢都係跟身好

呢度咩棋都有，仲有好多書睇

剩係呢幾個大豆袋，小朋友已經好鍾意

小朋友都有屬於自己的玩法

隻臭腳邊個架呢?!

休憩室內仲放置一張氣墊球枱，小朋友對眼即刻發光

有得玩唔駛同人爭又唔駛排隊! 玩得超開心

天氣越嚟越好!!! 或者聽朝瞓醒起身可以見到超美的大海景

到咗晚餐時間! 開飯

到咗入夜之後，整個營舍都變得好靚

我呢個創意多多的老爸，夜晚食完飯之後我就同小朋友來個小小探險隊，每人拎住唔同款的電筒，由營舍的270度大海景可以搜索昆蟲

一嚟就發現隻小蜘蛛，佢哋就已經好興奮，個蜘蛛網真係好靚!

對於大人嚟講微不足道的小昆蟲，但小朋友的世界卻是似找到珍寶似的

哥哥發現不同大大細細的蝸牛! 仲留意到佢哋個蝸牛殼係唔同轉紋

行行吓見到有田雞跳過....兩個不死心誓要搵佢出嚟

靚菇都搵得到!

見到水管上的水滴，因為感覺好似啫喱仔，所以佢哋都好新奇要用手指點下佢

雖然頭先走甩咗隻，依家俾佢哋再發現一隻乖乖的坐喺度等影相

見到咁多隻小蝸牛，終於發現隻超巨大的

最後諗住完成探險旅程番入房，點知喺我哋房門口，有隻大大的草蜢仲好青綠色好靚

沿途撞見其他住客，佢哋啱啱切好西瓜食，順便請呢3個小寶每人食一塊，當係完成探險的小獎勵

到咗第二朝，真係陽光普照! 好正呀...呢D景色及自在環境真係住酒店好少會遇得見

我哋煮好早餐就拎出去坐, 喺呢個270度大海景之下嘆早餐

嘆完早餐之後，大人去咗洗碗碟，我哋就入番休憩室玩!

之後我哋就執拾好行李，先交還被鋪同房匙，然後我哋出發上摩星嶺探險

大家都知道摩星嶺係咩地方啦，不過我哋膽大包天，帶住幾個小朋友就趟上山

因為昨晚落雨濕濕，所以好多地方洞穴都仲係水氹滴水

我呢個爸爸用有限的小知識介紹下摩星嶺俾小朋友知道扮導賞(因為以前後生都嚟過幾次私影)

不過最好唔好俾人聽到啦! 如果講錯就笑死人

呢棵最出名的一支獨秀樹，隔咗幾年再上嚟真係呢個樣唔同哂

大家記住上嚟要著長褲，因為好多雜草同多蚊!(幸好今朝上到嚟又唔算多蚊)

哥哥執起支樹枝話第時我老咗就會執番枝俾我用，佢話因為可以慳錢唔好買，心諗真係多謝哂! 不過都要讚自己教導有方

超多草蜢!!!

最後上到嚟呢個最出名的炮台，撞啱又有班人喺度私影!

行咗一個小時多，天氣實在太熱，我哋番去營舍，入冷氣房休憩室再玩氣墊球，我就繼續欣賞一下這無敵大海景!

因為我哋預約咗下午2點的穿梭巴士，所以有少少時間我哋再去踢吓波(就在露營地附近的大草地)

剛好屋企發現有包吹波膠，所以帶嚟玩埋佢! 不過真係太臭太膠太化學，玩埋呢轉都係唔可以再玩，係咁咦俾佢哋試一試，其他都係我吹番!

唔好誤會呀妹做核突嘢，只係佢兩隻手拎唔住所以用個身Hold住! 唔好以為我喺度教壞小朋友呀! 哈哈~

喺接待室對面其實有間電視房，不過一場嚟到我當然唔鼓勵大家入嚟睇電視啦

呀妹尋日影咗一張類似的，今日哥哥又話要我幫佢影番張....唉!

最後搭穿梭巴士落番去堅尼地城港鐵站，我哋搵個地方食埋Lunch+Tea就散Band啦!

Photo by CANON 5D Mark IV, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 8分

呀劍評語: 跟到大酒店過一晚，有另外一番風味，我覺得跟小朋友總不能下下舒舒服服飛嚟飛去嘆世界，有時都要同佢哋一齊捱下苦(其實只係大人覺得)，流下汗食吓普通嘢，唔會有其他節目配套，全部自己計劃旅程，真係純享親子時光! 總結呢兩日一夜漫活之旅，真係覺得時間好似停留咗喺度，各媽咪都問點解仲未夠鐘走既?

YHA 賽馬會摩星嶺青年旅舍
置身旅舍270度的觀景台，維多利亞港和青馬大橋美景盡收眼底，海景雙人房更讓你盡享日落景致。附設各種桌上遊戲的休憩室，是三五知己玩樂暢聚的好地方。沿旅舍旁的梯級拾級而上，便是已被列為二級歷史建築物的摩星嶺炮臺軍事遺跡群，遠足之餘可順道瞭解香港歷史。旅舍提供免費穿梭巴士來往堅尼地城港鐵站。

費用：$220-$1,440

地址：香港薄扶林摩星嶺徑123號

營業時間
開放時間 :上午7:00-午夜12:00
入住時間 :下午3:00
退房時間 :中午12:00

電話：(852) 2817 5715

電郵：[email protected]

其他詳細資料
https://www.yha.org.hk/zh/hostel/jockey-club-mt-davis-youth-hostel

總辦事處地址: 九龍深水埗深旺道富昌商場1樓118號舖 (南昌鐵路站A出口)

開放時間
星期一至五：9am - 7pm
星期六： 10am - 5pm
星期日及公眾假期：休息

電話：(852) 2788 1638

傳真：(852) 2788 3105

電郵：[email protected]

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。