親子遊樂, 親子旅行

【親子好去處】香港公園 玩沙池 透明滑梯

10 Sep, 17

今日機緣巧合只得我跟芊芊兩個去Hea一個下午,完了教會聚會後我就帶佢去遊叮叮河。本打算去到中環就搭車番歸,但係呢個囡唔想咁快番屋企,所以叮叮去到金鐘站時,我即刻『丁』一聲諗起,不如去香港公園玩沙玩瀡滑梯,呀芊一聽見有沙玩就即刻Say YES! 


香港公園可能大家仲熟過我,所以今日全程拍片(只係簡單隨便影了幾張),輕輕鬆鬆拍住拖,唔駛成日叫呀芊停低影相!



當然經由Pacific Place乘扶手電梯上到公園,經過噴水池,穿過小橋流水。我哋第一個景點去溫室參觀


當然最主要係想涼涼冷氣 ^.^ 溫室內已經佈置了好多中秋節傳統燈籠





這層還有個輕觸式互動遊戲,尋找動物咭對對碰(睇片)



然後再往上層,到熱帶植物展覽館,勁多仙人掌(睇片)



離開溫室再到觀鳥園睇雀仔(睇片) 不過唔止雀仔咁簡單,而係超大雀!





穿過觀鳥園行多兩步就會到兒童遊戲區,最先見到就係沙池! 個個小朋友都即刻除鞋跳入去玩



沙池中有4個掘沙設施(有一個壞咗),沙池中的沙都算乾淨,唔會有好多落葉,唔怕『桔』腳!



溫馨提示:大家可以自備掘沙工具俾小朋友玩



呀芊一個自得其樂,有沙萬事足! 




簡單一個掘沙器已經夠小朋友玩大半個鐘




旁邊都有其他遊玩設施! 呢個穿梭機型的設施值得一影!



好戲在後頭! 除咗玩沙,當然要嚟玩呢條今年新出爐的瀡滑梯啦。

知道早排剛推出的時侯已經有好多爸爸媽媽帶小朋友嚟SIR,這個滑梯又長又夠斜,好有速度感(當然你係要慢的話都可以控制得到 ^.^ )



這個滑梯只適合5-12歲小朋友,不過玩玩吓途中都見到有D哥哥姐姐差唔多成廿歲都玩,當然跟住有職員過嚟話啦!

起初冇咁多人玩,可能食Lunch過後,細路潮開始愈嚟愈多,園內職員都要嚟看守秩序! (好在我哋已經啱啱玩完)






公園內唔同層數有適合唔同年齡小朋友的設施




呢幾個咁得意的垃圾筒,有唔同顏色的八爪魚同青蛙,以前好似唔多覺眼,唔知係咪新架呢?



最後行過去視覺藝術中心,你以為有嘢玩!? 唔係,其實係因為大熱天時,玩完就可以順便行入去涼陣冷氣,同埋裡面有部經濟汽水機,可以買包嘢飲坐低抖下! (唔駛捱公園內tuck shop貴嘢)



沿路番去Pacific Place離開,諗住入去茶具博物館的兒童遊戲區玩陣,點知原來已經冇咗成年....OMG!



Photo by CANON 5D Mark III, Len | EF 24-70mm f/2.8L USM


想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2

呀劍評分: 9分


呀劍評語: 香港公園可能大家都去過,但係玩咩先玩咩後又有冇計劃過?知唔知道視覺藝術中心有部經濟汽水機呢?又有幾多個冷氣位可以歇一歇?

開放時間
尤德觀鳥園
每日上午9時至下午5時

霍士傑溫室
每日上午9時至下午5時

公園餐廳
每日上午11時至晚上10:30時

公園(戶外設施)
每日上午6時至晚上11時

茶具文物館
星期一、三至日:上午10時至下午6時聖誕前夕及農曆新年除夕:上午10時至下午5時星期二(公眾假期除外)、農曆年初一及二休館

羅桂祥茶藝館
星期一、三至日:上午10時至下午6時聖誕前夕及農曆新年除夕:上午10時至下午5時星期二(公眾假期除外)、農曆年初一及二休館

樂茶軒
星期日至五上午10:00至晚上8:00星期六上午10:00至晚上10:00下列假期休息:農曆年初一至初二每月第二週的星期二(公眾假期除外)

視覺藝術中心
星期一、三至日:上午10時至晚上9時中秋節、冬至、聖誕前夕、新年除夕及農曆新年除夕:上午10時至下午5時星期二、聖誕節及翌日、元旦日、農曆年初一至三休館

備註
香港公園體育館 - 場地保養日 香港公園體育館於每月第 一 及 第 三 個 星期 一 上午 七 時至下午 一 時暫停開放,以便進行場地保養工作(公眾假期除外)。如該日為公眾假期,保養工作則順延至下一個工作天進行。 香港公園兒童遊樂場 場地保養日 

香港公園兒童遊樂場 - 於每星期的星期一 上午 七 時至下午 一 時暫停開放,以便進行場地保養工作。



(以上資料更新至文章當日)






RELATED POST