【親子好去處】赤灣生態探索行汀角海岸「赤灣四季賞」"Tolo Appreciation"

住在巿區的細路，真的很少機會可以接觸到大自然，星期一至五連抖啖氣嘅時間都冇，所以一到星期六日都希望盡量可以帶佢哋出走巿區，自己都可以乘機休息一下(不過有陣時仲攰過番工) 哈～今次參加咗「赤灣四季賞」舉辦的赤灣生態探索行，仲可以去到我成日都想去的汀角海岸！

活動下晝先開始，所以朝早如常參加教會主日崇拜，完咗之後就直接搭307入大埔(好在教會附近已經有巴士站)

睇落好似好遠咁，其實搭咗30-35分鐘就到大埔中心，然後買少少乾糧及飲品，就轉的士沿汀角路入大尾篤

正正在汀角巴士站落車就會見到這個士多，馬路對面就係燒烤場，燒烤場隔離就係汀角海岸的入口，所以好容易搵！

如果大家買漏嘢，都可以喺度補給，絕對唔駛擔心

正等待集合時，都不停見到有好多單車友踩單車

我哋正式出發向汀角海岸步行，沿路已見到好多農作物，有木瓜樹又有香蕉樹

完全遠離大隊的一家...

因為探索未開始，我哋已經自己開始，看看周圍的花及蝴蝶

行多兩步已經離岸不遠，全程都只係行咗5-8分鐘，眨吓眼就到！

職員們先同我哋Briefing同埋分組，最後都俾哥哥恨到，可以同靚女姐姐一組，帶佢去周圍搵海洋生物

妹妹就一路拎住媽媽最近新入手的水壺，可以一邊飲水，一邊就撳掣噴水射下自己塊面降溫

行到出去沙石灘，見到一地都係貝殻，全部都係細小蟹脫出的殻，不時會見到好多小蟹從泥土下捐出捐入

因為潮漲關係，姐姐先搵海星俾大家睇，兩個細路一見到真海星就超興奮，除咗去海洋公園隔住塊玻璃睇之外，今次算係第一次咁近距離見到海星

原來海星真係知道自己反轉咗，然後識得自己鯉魚翻身(事後同大家分享先發現自己孤陋寡聞)

其實我自己都唔記得係咪第一次見海星...所以好多時甚至我咁大個人都係同小朋友一切發現新事物，自己好似從新活多次一樣

哎吔...佢想自己爬上嚟走佬呀！

然後靚姐姐繼續帶倆小周圍發掘新奇得意的海洋生物

好多平時不起眼，即使我們經過都唔發現的事物，在這裡大家卻很花時間去觀察欣賞。這就是我們都巿人的生活，所以有機會大家也要學習一下慢活

然後我哋開始一齊觀察小蟹仔，原來單單呢個紅樹林都已經有十幾種唔同的蟹

我自己就最鍾意呢隻「拜佛蟹」因為佢對蟹鉗，有陣時會鉗鉗下嘢食，突然會舉高對鉗做出拜佛咁嘅動作

小朋友對小蟹掘出來的洞很有興趣

遠望住佢哋三母子(女)真係覺得自己好幸福，要珍惜...要記住

唔好以為下面兩隻相好易影...其實我捕咗佢好耐！

兩個突然扮起蟹上嚟...哈～

小朋友們到最無邊無際的地方是最開心不過，沒有規則沒有管制，做自己喜歡的事...除咗叫佢哋唔可以捉蟹仔

由靚姐親自操刀，幫我哋影咗張全家幅...唔該哂

仲陪住兩件呢度去嗰度去，真係辛苦哂！

最後都係攪到個PatPat濕哂...(不過已經比我想像的少)

最後壓軸居然係發現呢條「鹹魚」，多數係有人釣魚，魚上釣後被海浪打到魚絲都纏住了，卻成為了蟹仔的大餐

要非常靜慢慢等，佢先至會行出嚟！

終於見到佢出嚟開餐啦

最後職員仲送大家每人一個小小海龜環保袋，真係超卡娃咿呢！

Photo by CANON 5D Mark III, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 9分

呀劍評語: 小朋友真的很需要親近大自然，從小就要讓他們去感受，自己去發掘；無錯，可能這個道理人人都知道，但係一到星期六日，唔係真心個個父母都做到。一於嘗試走出去，辛苦一次咁多，很攰的返到屋企之後，你會覺得一切也是值得的，慢慢你仲會好似我咁上埋癮㗎！

日期
2017年9月17日

時間
14:00-16:00

地點
汀角具特殊科學價值地點

對象
親子及公眾 (年齡介乎6-65歲)

費用
全免

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。