【親子行山】柏架山鰂魚涌樹木研習徑康柏郊遊徑大風坳

柏架山簡直就係陪住我長大嘅一座山，讀緊小學嘅時侯，差唔多日日放學都會同同學仔行上去，然後傾心事，講吓大家鍾意嘅女仔，依家諗番真係好小學雞。轉眼廿幾年，今日帶住兩兄妹同埋嫲嫲，一齊來個親子行山樂。

柏架山最適合一家大細及街方街里嘆個早茶之後去行，因為山腳就已經係鰂魚涌與太古交界，搭港鐵一出閘5分鐘都已經可以行到山腳! 上網碌過話柏架山有海拔532米 (用「海拔」呢個Term好似通常形容超高嘅山先會見到 ^.^)

我哋同嫲嫲喺茶記食過早餐，跟住過對面馬路就可以開始行啦! 超方便 (「柏架山道自然徑」個名咁好聽，我記得細個都未有呢個牌楝喺度)

明明係考試周，但係我都要帶埋哥哥嚟呼吸下新鮮空氣，下晝溫習就會醒神D (定係會攰到瞓着呢?)

如果人有三急可以到巿政街巿內，如果唔係都可以到「林邊屋」先去。另外如果想補及一下買番D水及乾糧，都可以到天穚通往街巿位置，在入口就有一檔士多仔。

今日重陽節，天氣超讚! 上山嘅人都超多! 個個一家大細行真係好開心

行山對呢對成日攀山涉水嘅兄妹，絕對唔成問題啦!

我仲準備咗部相機俾哥哥可以邊行邊影

呢頭話佢勁，嗰頭就已經扮行到好辛苦...

好快就見到一個大"U"Turn位同埋小涼亭，可以俾晨運呀伯喺度伸一伸

三嫲孫行行下見到日光射落嚟，就伸手做手影扮兔仔

其實咁樣先係真正放假，唔駛睇時間，想做咩就去做，無聊無聊唔駛成日催佢哋「快D快D」

久違了的悠閒，望住條蟻路都可以望成幾分鐘，大自然嘅力量噢!!!

由起點行唔駛20分鐘就去到「林邊磚屋」，前身係太古糖廠及職員宿舍，依家已經係二級歷史古迹，同埋改建為生物多樣性自然教育中心

林邊生物多樣性自然教育中心，可到這連結再睇睇 http://bit.ly/2Apgfy5

再沿路向上，會見到「鰂魚涌樹木研習徑」、「金督馳馬徑」、「康柏郊遊徑」嘅入口，不過我哋繼續向大風坳進發

但係聽嫲嫲講，「鰂魚涌樹木研習徑」下面有個戰時爐灶，又話其實穿過「鰂魚涌樹木研習徑」都一樣可以上番去大風坳，所以一場嚟到就跟嫲嫲去睇吓

行咗一陣間就會見到一個古舊破屋，睇上去好似係個廁所，不過都已經俾樹生長撞破石牆

兩個八卦細路係都要好奇望一望 (不過大家要小心，因為石牆身後係一個大破口，可以跌落去㗎！)

行行下兩個開始執起樹枝來，哥哥仲話要幫手執垃圾，好在有備以嚟，俾佢哋一人一個膠袋

好快就嚟到最大嘅二戰爐灶啦

見到有個健身設施，兩個又要走埋去做一做運動

兩個要試試自己隻腳可以放到幾高，睇吓自己筋骨有幾柔軟

想像唔到當時有幾多大個大廚喺度煮飯，個場面一定好震撼

兩個攪笑到匿埋落去，不過我發現如果呢個地方，用嚟玩伏匿匿都應該會幾好玩

咁多個爐灶，呢個係最大最大...我估個煲可以煮到成100個人份量咁多

好唔捨得離開，但係因為要趕住行上山，所以影多張相就閃

原來行得唔遠，有另外一個爐灶，不過呢個就細少少

同其他行山友的狗仔玩起上嚟

下面張相係哥哥影，真係好攪笑！隻狗好似真係個人咁邊食嘢邊望嘢咁

我哋再繼續向大風坳進發

行番出嚟就接駁番去「康柏郊遊徑」

仲會經過「漁農自然護理署-鰂魚涌管理站」

兩個開始嗌辛苦啦！

終於行到上有「噴射風」之稱的位置

呢度係是畢拿山與柏架山之間的山坳，望落去風景真靚

路過仲有超冰涼山水(不過始終唔多唔少有細菌，所以千祈唔好飲用或者用嚟擦眼睛)

我哋繼續向上進發，嫲嫲眼利俾佢搵到好多隻蠶蟲，大大條顏色仲好靚！

其實沿路都見到好多好靚好特別嘅花，只要細心睇就會見到

呢隻花未開嘅時侯好似一個個蝴蝶結咁

呢朵花超靚! 因為佢花瓣好似閃粉咁，加埋陽光射落嚟閃閃下好正

呢隻仲食緊葉呀！唔知佢係咪發現咗我影佢，所以佢突然停低咗喺度

最後終於行到嚟涼亭，可以休息一下啦！今次就唔同小朋友行上天文波波，因為再行上去睇怕要日落先行完

我哋搵咗個位坐低食下水果抖一抖

今日重陽行山，周圍都係人，真係Touch Wood有咩意外都唔怕...

呢度居然仲有一個舊式兒童遊玩設施，條瀡滑梯仲係鐵皮架！好似發現寶物咁

當然俾佢哋放電玩餐飽啦 (趁機我都可以抖一抖)

繼續向上行，就會經過野豬徑，大約行多半個鐘就可以到頂

風景超美，快D把握秋意濃，一家人就去行行山啦!

落山嗰陣仲俾我哋見到野豬呀! 頭先經過「野豬徑」以為都只係講吓唔係真

原來真係有架喎，真係好得意呀，一樣豬媽帶住幾隻豬仔

Photo by CANON 5D Mark IV, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 10分

呀劍評語: 來回整段路程都用咗5個鐘先完成，當然如果沒有到「林邊屋」及「樹木研習徑」就一定會時間起碼短番兩粒鐘，正常應該3小時內完成。而且除大風坳一段路，其他位置幾乎都有樹蔭，所以絕對係親子行山其一之選！

路線

起點：英皇道海景樓＞柏架山道自然徑＞林邊生物多樣性自然教育中心＞康柏郊遊徑＞鰂魚涌樹木研習徑＞大風坳＞康柏郊遊徑＞柏架山道自然徑＞回到起點

長度
來回 6.0 公里

難度
★★

需時
約三小時

起點交通
巴士2, 2A,77,81,99,102,106惠安苑下車。港鐵，太古城站B出口

終點交通
巴士，港鐵往各區

注意事項
帶備足夠食水，帽及防曬用品(特別經過大風坳一段)。

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。