華德福由哥哥出世到依家都會周不時聽見同認識一點點，今日帶小朋友到林村的一家幼兒園走走玩玩，同負責人邊講邊玩再知道多一點，我都好希望這個理念能不多不少影響香港的傳統教育制度。
童年共學樂園是一所華德福幼兒園，提供常規課程、工作坊及些藝術節慶活動等，仲有不定期舉辦園遊會。這裡是一個共學小天地，今次前來參與兩個工作坊活動，有土窰Pizza 及札染布Workshop，跟平時去的農場菜園又有唔一樣的感覺。
幾個推崇華德福教學的媽媽合辦呢一個共學園地，希望可以俾同樣唔希望自己小朋友在傳統教學下成長的家長，帶同小朋友一齊喺度享受共學之樂。
其實地方就同普遍見到的三層丁屋一樣，屋前有一大個園地，設有些遊樂設施(部份還在進行施工) 兩個一嚟到就即刻喺大草地度掘沙同打韆鞦
我就先入屋睇過，粉紅色牆加上全部玩具設備都係木製，一入嚟個感覺已經超 Warm 非常舒服。
善美姨姨仲佈置咗一個好溫暖的娃娃家，俾到場學習的小朋友一個小天地
開放式廚房，可以製作午餐及方便各樣活動及工作坊進行
環境真係好安靜好舒服，幾乎除咗小朋友歡笑聲，其餘就聽不到任何聲音，好似世界呢一刻停頓咗，今日唔駛趕時段、跑景點、排隊玩，安安靜靜輕輕鬆鬆咁，就處於這裡慢活一個下午
呀哥、芊芊同埋表哥已經自動波咁周圍玩，呢度沒有太多的玩意，但剩係呢個韆鞦已經夠佢哋玩到唔捨得走。
整個韆鞦都係人工親手造，每塊坐板都高低不一，傾斜角度又不一樣，佢哋玩到可以自創花式，瞓哂喺度咁玩都得。(韆鞦好穩陣，大家可以放心)
呀芊已經唔係坐喺度玩。
玩玩下攪到左右打圈搖...
真係冇佢哋修...當然太危險時我都有叫停佢哋。
不過呢種歡笑聲同埋見到佢哋玩到咁開個樣，就無所謂啦！
我哋冇一定的時間開始，只係俾小朋友玩到夠，又差唔多時間肚仔餓，呀芊就喺屋裡面搓麵糰準備定做 Pizza的材料，
善美姨姨先示範咗一次俾小朋友睇，跟住佢哋就拎起小鋸開工了。
哥哥第一次拎起把鋸去鋸木，起初都有D擔心，因為一向論論盡盡唔諗後果嘅佢，次次都總會有幾次大鑊嘢發生。
確實有陣時要相信孩子，放手讓他去作，不過話口未完呢個呀哥一鋸到攰攰地冇咩力，跟住就忘記哂善美姨姨教的姿勢，求求其其跪喺度用手扶住就鋸，所以放手還放手，都係要喺側邊旁住，哈哈～
平時玩起上嚟傻傻更更，瘋瘋癲癲咁，估唔到兩老表一齊認真地鋸木時，都幾 Man 㗎喎！正所謂男人的浪漫，如果依家有碟豆腐火腩飯食就真係 Perfect Match 囉！
呢頭講完男人的浪漫，嗰頭呀芊搓完麵糰，就走埋出嚟一齊鋸！反而呀芊鋸得有板有眼，有姿勢有實際，鋸得仲快過兩個男仔！
估唔到今日做 Pizza 前都來了個小體驗 (其實之後無論做 Pizza 或者玩札染布，佢哋一有時間就走出去鋸木，話要做一個玩具俾自己)
我好鍾意呢個土窰，真係好Raw 好有特色。我哋都將頭先預備咗嘅柴枝放入爐裡面
然後一齊不斷放柴枝入去燒，等個爐可以 keep 住200度高溫，先可以放個 PIzza 入去焗
等緊個爐慢慢燒，小朋友又把握時間去玩
周不時哥哥就會番嚟睇一睇個火，幫手加一加柴枝，有陣時個火會熄咗，我哋就幫忙一齊撥番起個火
同時屋裡面媽咪同呀芊就繼續準備做 Pizza 的材料
全部都係即時製作超級新鮮㗎！
粉糰都已經發起了，小朋友齊齊各就各位，開始抹少少麵粉喺枱上面，開始要製作自己專屬的 Pizza
呀芊搓嘢手勢真係有番兩度，就算唔食得都睇得下。
兩個男仔就好似以為自己喺度玩泥膠咁
究竟呢餐靠唔靠得住呢？
大家都搓得7788，開始都有個餅型！
用刀小心批走多餘部份
呀芊呢條係咪丹麥條呢...
可以開始加料啦，班貪食鬼梗係有幾多加幾多。
呢種咁悠閒的生活真係我夢寐已求，小朋友可以專心做自己喜愛的事，沒有忙忙碌碌，沒有限時限刻，更沒有功課壓力，如果條件許可我都好想自己小朋友接受呢種教學模式。
小朋友親手將 Pizza 放入土窰中燒
有少許空檔時間，呢班細路又走番去鋸木揼釘，因為佢哋好想自己親手造一件玩具俾自己
放喺土窰裡面燒，唔知係我唔為意，定係真係燒得好快，真係好快就燒好出嚟，可以開餐啦！
芊芊個丹麥條 Pizza 有D燶燶地！不過佢都好開心，因為係自己親手做。
另外媽咪同芊芊都做咗一個長方形的 Pizza，就放咗入去焗爐焗。
色水一定點都好過入土窰燒的，不過土窰燒出嚟嘅 Pizza 就真係好香！
善美姨姨仲煲咗蕃薯糖水俾我哋，D蕃薯仲係隔離屋 Auntie 塊菜田新鮮摘出嚟㗎，好好飲呀！
個個都食到 LamLam脷！
食完又開工，今日原來只預期小朋友鋸柴枝去燒火，依家反而變咗主要項目
睇住佢哋係咁鋸鋸鋸，就覺得佢哋好 MAN，好男人喔！
最後從屢次失敗又成功，終於做出屬於佢自己的玩具船 (無錯，佢話係一架船，哈哈～) 點都好啦，始終佢都獲得好大滿足感。遲下有機會再帶佢哋嚟製造木製的玩具車 (因為都要花一整天去完成)
呀芊一於少理，男生們去咗鋸木頭，佢就繼續玩韆鞦。
女生始終都係女生，仍然喜愛玩這些小玩意
在下一個活動未開始之前，大家都在屋內玩玩
敲敲這個小木琴，跟普通塑膠截然不同，敲出的琴聲都超清亮
不知在那拿來一個小木製熨斗，女生就是喜愛做家務，為何媽咪不是這樣
細細個訓練多D，記住大個要識做至好。
最後善美姨姨預備好一切材枓，我哋又再圍埋一齊去做札染
大家小朋友都先揀一塊小布，然後用雪條棍同橡筋將不想染色的部份夾好
小朋友都專心聽姨姨講解
哥哥大功告成
我都做好咗一個！
顏色都已經預備好，不過只有哥哥一個留低繼續染，另外兩個夾好布之後，已經又走咗出去玩
好靚呀！
大家都染得好靚，每人都可以擁有一條自己的手巾仔，下次有機會再試下其他色先！
差唔多日落時後，我哋跟住善美姨姨到隔離鄰舍家外，的菜田採摘農作物。呀芊掹咗條咁大咁長嘅白蘿蔔出嚟喎，媽咪就喺另一邊摘咗兩大斤菜，都只不過係$30！而大蘿蔔都只係$20，好平呀！
總結全日的活動，實在慢活了一個下午，由開始到結尾，大家都沒有刻意要看鐘，很隨意的到甚麼時侯就去做甚麼，小朋友邊玩邊做，唔似平時屋企或者出街玩，成日俾媽咪嗌住個名。在童年共學原地，佢哋都可以自由自在隨意生活，「真童年 ‧ 真生活」。
Photo by CANON 5D Mark IV, Len | EF 24-70mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
呀劍評分：10分
呀劍評語：華德福的教學模式的確對於我哋呢班由細到大接受傳統教學的家長們係比較難適應，但係真正認識它們的教學理念後，其實某程度上都會很認同，只不過係依家個社會教育制度越嚟越扭曲同崩壞。當然大家都要有一定的資金先可以讓自己小朋友到外國函接，不然也只能好似我咁，於課餘時侯帶小朋友接觸感受一下就是了。
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
05 Aug, 22
【親子好去處】西園 Saiyuen 「Green Summer 綠活之夏」 Green Summer is Coming to Town！
邊個話露營係秋冬活動，熱辣辣一樣可以去Camping，遇上西園今年的「Green Summer 綠活之夏」,哥哥同呀芊又可以夏日炎炎玩個夠。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。
18 Jul, 21
【親子好去處】帝景酒店 x 麗都灣 消暑平價の選 玩足2日1夜
想當年仲記得自己第一篇好去處文，都已經差唔多有成7-8年，其實嚴格嚟講都唔可以叫做文，因為嗰陣文字未發育的我，根本就冇諗過要寫咩分享文，其實我只係寫日記。
12 Jul, 21
【親子好去處】盛夏森林 Splash N' Forest 親子濕身玩水派對
今年好矚目的消暑活動「盛夏森林」 ，周圍都見到佢哋廣告，集玩水、美食、音樂於一身，呢個暑假點都要去玩先似放緊暑假。