【親子好去處】GLP Day 全力愛日親子原野派對

這天跟呀妹參與了在園藝農場的「全力愛日親子原野派對」，但正所謂「打波先嚟落雨」，全日活動雨都落過不停，真係有諗過離開的念頭，但最後心諗，其實可以藉呢個機會跟呀芊一齊學習，如何將逆境轉化為正能量

今次活動每位報名費$40，可惜媽咪跟哥哥臨時有活動要去，所以只有我跟芊芊

起程去烏溪沙站時個天仲好地地

去到集合點先同今次主辦單位賣下廣告先!

整蠱做怪係都要將個手指公指向下

大會安排咗旅遊巴在烏溪沙站接送大家到農場

坐咗大約10分鐘車程就到園藝農場

一去到已經俾Watoto的歌聲吸引咗去，佢哋唱咗幾首歌之後，再到GLP合唱團演出

我哋先喺度睇咗陣表演，之後就開始落起大雨上嚟(其實之前都已經一直落毛毛雨)

好在醒目的我早已準備雨褸俾芊芊(可惜太自以為是的我就冇帶遮俾自己)

結果我哋好狼狽咁走咗去攤位裡面避雨，感謝Watoto攤位的職員Ison哥哥，可以俾我哋兩個留在帳篷底下

我哋坐低食少少嘢(上車前買咗少少麵包飲品，驚現場買會好貴，一般家長心態 ^.^)

跟住睇睇天文台個APP，見短時間都應該唔會停雨，心情突然一沉，哪些「早知唔嚟」、「不如諗吓點走」、「真係好掃興」等字即刻浮哂面

正想縮沙走佬之際，諗起自己寫過的Blog話「落雨駛乜驚」，「落雨都可以照玩」等字句，於是就諗即使落住雨，都要試吓玩落去，順便教下芊芊「生活中一定會有不如意的事」

所以我只好下定決心，問職員姐姐借咗把遮，就同芊芊衝出去玩

雖然玩嗰陣真係超呢咁Hea，芊芊就行入攤位旁邊做手工，我就拎住把遮喺佢後面「揼」雨

義工姐姐好細心好有耐性咁教小朋友做手工搖鼓

芊芊完成後都覺得好靚好鍾意!

然後再到隔離做動物面具

由於大部份人都走哂，所以我哋都唔駛排隊又可以繼續玩啦

有好多唔同動物面具揀，見到有蛙蛙芊芊就一定唔駛諗!

玩玩下都已經唔記得咗係落緊大雨

你睇佢幾咁開心!!! 仲一路叫住話要戴住個面具

睇嚟我哋都已經克服咗落雨嘅問題，跟住即刻又去玩彩繪石頭

小朋友可以設計一顆專屬的石頭

畫畫下仲要求叔叔上顏色喺自己手指上印落石頭上面

大家的石頭都放喺呢度吹乾

雨越落越大，但係GLP及Watoto無懼風雨，再一次出嚟表演

我哋仲買埋棉花糖同燒賣邊食邊睇

直至差唔多四點，大會提早咗完結活動，我哋都搭專車返回烏溪沙站番屋企lu

好在臨走前都見到少少動物

大家睇吓條片有幾大雨!!!

Photo by CANON 5D Mark IV, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 7分(天氣好會俾9分)

呀劍評語: 一直有留意Watoto的演出，今次跟「全力愛」這個團體合作，於園藝農場舉行活動，這個地方也是我一直想去的。如果天氣好好，相信會是更開心的一天，當然落住大雨我哋都留守到最後，結果也跟芊芊上了一課，即使遇見唔理想的事，也要嘗試克服它去轉化為正能量

《「全力躍動・世界大同」GLP Day 全力愛日親子原野派對》

日期及時間

2017年11月12日 12:30pm – 5pm

地點
園藝農場新界西貢十四鄉井頭村131號

費用
免費入場（不需門票）

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。