親子戶外

【親子好去處】坪洲一日遊

22 Mar, 18

難得一個假日好天氣又唔駛趕溫書做功課,沒有任何計劃之下,我哋即興入咗坪洲走一走,呼吸一下新鮮空氣,感受吓簡樸生活。


我哋即興到連船期也沒看,就搭港鐵到中環碼頭,怎知道真的錯過一班船,要等過下一班快船。(不過上帝早有預備,又俾我哋遇上另一個活動,消磨了呢個鐘頭)



夠鐘上船開心出發,媽咪買咗兩支甜筒慶祝一番。



快船只需26分鐘,真係超快。

對上一次到坪洲已是大專年代,有十幾廿年冇踏足過。


相比起長洲、南丫島等,坪洲來得更平正,更舒服。




今日天氣超好,睇嚟一陣可以考慮去踩轉單車。





嚟玩都順便教吓小朋友我哋依家身處何地,離香港島有幾遠。




同埋當然要睇睇地圖,睇吓條路點行,上網搵吓有咩好去處。



人煙稀少的地方真係心情都舒暢D。



好喜歡呢種生活節奏。





落船後直向「天后宮」方向行,然後轉右行入永安街。





最先行到的景點係秘密花園「牛皮廠」懷舊店,


Photo Source: Umagazine

在坪洲上的工廠遺址之中,保存得相對好的算是「勝利合記石灰窯廠」,但隨着英泥技術引入香港,逐漸取代石灰,灰窯廠相繼關門大吉,遺址被列為三級歷史建築。


其次就是「大中國火柴廠」,但後來一次火燭,以及打火機的發明,也都遭相同命運。


最後要講的是這「牛皮廠」,由於香港在戰後引入人造皮,加上生產成本上升,最後同樣逃不了倒閉的結局。廠房已變成廢墟,屋頂已塌陷,剩下廠房破落的外牆,遺址被列為三級歷史建築。





不過「牛皮廠」現被活化成一個秘密花園,充滿藝術文青氣息。

穿過呢條四面塗鴉的走廊,用懷舊紙杯製作成藝術品的天花,到了另外一個戶外空間。





這裹盡是單車軚、籃球框、舊風扇、爛銅爛鐵等,以廢物利用創作的藝術品。



這件藝術品大部份是盛載着從世界各地得回來的物件。







就算自認不懂欣賞藝術的朋友,都可以到前來打打咭。



我最鍾意呢張巨型櫈,企喺隔離自己好似變咗小矮人咁。







一事一物組成埋一齊就變得好美。



沿石梯行入去,又到另一個藝術景地。




睇落去好似雜亂無章咁,但係卻係亂中有序,抑或有心,或者無意,總之你認為係咩就係咩,藝術就係一樣可以令你跟其他人一齊談論起來的東西。



跟小朋友一邊欣賞,就一邊研究互相討論覺得似D乜。

就係咁又促進大家溝通,又可以幫助小朋友發揮創意,俾佢哋知道藝術不一定并并有條,整整齊齊。




行番出嚟先發現原來石牆內有個跟剛才櫈叠櫈的藝術品一樣的模型。











在這「牛皮廠」竟然存在着一個民宿。



呢度只設有一間房,足夠2個人住。

房間設於閣樓,但地下周圍已充滿藝術風。



若俾我用衣架去扭來扭去,一定唔知會變成點。




房間就在一樓,雖不是高床軟枕,但頗有情調喔。






樓梯都幾長幾高,上落時都要比較小心。








睇住呀哥幫呀妹影相,就覺得呢個畫面好得意,唔知第日大個可唔可以影番一張相同角度的相呢?




離開秘密花園後,我哋行出永興街,遇上一家懷舊精品店「古珀玩」,在門外已經俾這半折老爺車吸睛。

估佢唔到原來掀開係一個汽水雪櫃。



店內擺設非常簡單,似係展覽多過銷售,其實佢哋都唔算係真懷舊,應該話係舊物新造。




不過仍然令人回味好多兒時回憶。







正正在「古珀玩」對面就係「祺森冰室」。






等咗幾分鐘就有卡位,可以入去醫醫肚。



所有人入嚟坪洲必食之選,因為好多人都慕名而來食佢嘅蝦多士。




我睇番網民介紹相片,店內依家光鮮企理,看來係生意興隆才改頭換面,雖然裝潢很美,不過卻失了懷舊風味。







叫了三個Order,粟米豬扒飯係呀哥點的,




呀芊來個吉列豬扒手打烏冬,




當然少不了這份蝦多士,




先試這個蝦多士...腦內只有一個字「粉」,覺得裡面充滿粉漿,蝦肉不多,真的不外如是。




至於手打烏冬就一點也不像手打,只屬普通烏冬質感,不彈牙又太「林」,豬扒屬正常。

粟米豬扒飯的粟米汁也很稀,而且偏鹹。


有讀開我文的朋友仔,都知道我這份人向來不嘴刁,不過呢度實在令我有點失望。





兩個只係掛住睇「賭聖」。

相信坊間有好多老店,人客聞名風至後,往往食物質素就會每況愈下,想搵一間又出名但又保持到好味道的,真係買少見少。




食飽過後我哋繼續隨意的走,睇見其實坪洲都仲有好多家唔同特色的茶餐廳,希望下次再嚟可以發掘其他好味道的冰室。


所有事都發生在一個小島之上,行兩步就見到遊樂場;

再過兩步又見到變電站、警崗、街巿等。





本聽聞這裡有家「超記瓷器」,打算去同小朋友一齊設計番隻中國傳統式碗碟,

不過今日「摸門釘」,經對面「德興士多」老闆娘告知,原來「超記」一家去咗遠行,要下個月先番嚟,所以唯有下次再嚟搵佢啦!





「德興士多」都有售賣唔同特式傳統糕點。





沿路繼續向前行,就見到「麵包舖」,佢真係叫「麵包舖」㗎。


無花無假的「麵包舖」,最出名的係即製芝麻餅,老闆娘見我哋專程嚟買,就即刻將其他客仔的先俾過兩件我哋(因為個客仔遲到仲未去拎)



當然有其他唔同中式糕點及西式麵包。





熱辣辣的兩大件芝麻餅。





雖然味道不錯,不過都幾熱氣,大家食過一定要飲番杯涼茶。




網上推介景點大致上都行得八八九九,眼見前面有家單車舖,結果就給小朋友租咗一架腳踏車,等哥哥可以載着妹妹周圍去。



一個鍾意踩,一個鍾意坐低扮公主,真係好唔駛爭。


呀妹都好眼利,發現車身後面有個閃電標誌。





起初大家都好擔心哥哥控唔控制到,就連呀妹都要緊握扶手,以免炒車。(滴汗...)





越踩越順...可以放心俾兩兄妹相處一下(其實係我同媽咪終於可以獨自拍下拖)



第一站先去到東灣,

落車休息一下,

望下大海,

來個跳起打咭。



然後向小橋進發踩去大利島碼頭。







一邊玩一邊長大...每次跟他倆影合照,就覺得自己又老了一點。



將近去到小橋,沿岸邊一直踩,旁邊都是些船塢。


又要講多一次「天氣真的很好唷!」


天氣好影出來的相也超美。



跟這個大鏟泥車合照,感覺都幾有型。


在小橋上慢踩,離遠已見到左邊一個小石島,右邊見到一個小碼頭。








附近仲有好多居民自製玩樂設施,其實未知係咪放喺度俾大家公用(因為未有發現這些玩具有主人)






這個小小島話有機會可以見到中華白海豚...喔!





停留在這裡讓小朋友玩一玩吧!






攀上石山打打咭。





係時侯表演一下輕功水上飄俾小朋友睇...當然係講緊塊石頭飄啦!





於是兩個不斷練習,希望可以做到石塊在水面上彈跳。




石灘上仲有個打咭位,多數是村民用石頭搭出來的心形石堆。




俾哥哥搵到一塊堅心形石塊。



其實坪洲真係幾藝術風...就連一個小小的廟都充滿色彩。(這個叫仙姐廟,要來求恩緣的)




然後我哋再出發到最後一站「南灣」。



看見這棵佈滿青苔的樹,呀哥話好似Harry Potter裡的樹,哈哈~

向南灣進發,會遇見這個「手指山」,希望下一次再到坪洲的行程,除了到「超記」造碗外,就是要行一行這「手指山」。




南灣車路的盡頭就是已荒廢了的小屋,這裡也有一個公共廁所。








就這樣來回玩了差唔多兩小時,回去還出租車總共(第一小時$60+後每小時$50) $110。


最後在這「溫馨小食」再Tea一Tea,

本打算吃個豆腐花,

卻一早賣光!




不過環境也舒服﹐所以沒豆花食也沒甚麼。





但係我哋點了這個「炒腸粉」,原來都超好味!所以有失必有得。









一家人聊聊天,邊玩玩,不跑景點,不趕時間,這樣的時光真係勝過在床上睡個半天。





本以為行程就完結,見還有大半小時才有快船,結果再入小巷走走。



遇上這兩家小店也值得分享一下。






「Herb Garden」這裡賣的小手飾、精品公仔都好靚。





呀芊搵到「冰河世紀」的鼠鼠。



老闆娘醉心於製作皇冠飾物,她找了個珍藏跟呀芊來張合照。




人載佢又要載...本來很高貴的后冠,變得...




載在媽咪的頭上,真係成個高貴咗又靚咗!



來到店的後門,也有不少寶藏。






另外要提一提這個「陸日小店」,同樣係好有特色,裡面售賣的都很特別。






真係忍唔住手的話,好容易就會大出血。










差不多時侯,我們就坐17:50的快船回程了。











Photo by CANON 5D Mark IV, Len | EF 16-35mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10


呀劍評語: 超悠閒的一天,一家四口到離島舒暢的自由玩樂,有些時侯沒有計劃,沒有行程,一齊順其自然的四圍走走,真正的休息。

古珀玩

祺森冰室
地址:坪洲永安街3B地下
營業時間:逢星期二至五8:00am-4:00pm;逢星期六、日8:00am-4:30pm;逢星期一休息
Facebook: keesumcafe

麵包舖

Herb Garden

陸日小店
地址:坪洲永興街27號地下
營業時間:逢星期六、日 12:30-6:30pm
Facebook: sunsatstore
Instagram: sunsatstore

(以上資料更新至文章當日)




                 

RELATED POST