親子戶外, 親子室內

【親子好去處】新都會廣場 歷奇公園

29 Jul, 18

葵芳新都會廣場的歷奇公園在7月31日全新登場,真係親子界大喜訊!點解?我哋已經玩夠樓下一式一樣的膠公園。


今次呢個歷奇公園,係源自芬蘭6.5米高大型遊樂設施,而且有一3.5米超高戶外滑梯。




最緊要就係免費嘛!以後媽媽們Shopping可以有藉口啦,呀仔呀女都可以嚟免費放電。


呢個遊樂場有好多特色設施,包括滑梯、鞦韆、氹氹轉、健身設施等 。


而且設計仲好得意,全部都係巨型蔬菜,包括南瓜、茄子同青椒。


好似呢個親子鞦韆,可以足夠一家四口一齊坐。



不過鞦韆都有限制架,只可以一個成人、一個兒童同兩個幼童坐咋!所以我哋一家四口超哂標,所以坐下打打咭,之後俾番佢哋玩好別。


除咗適合3歲以上,連大小朋友都可以上去一齊玩㗎。



大型遊樂設施有各式各樣攀爬設施,最啱俾小朋友練吓手腳協調。





終於唔駛再玩膠滑梯啦!



達3 .5米的超長滑梯,速度感高好刺激。





呢條茄子造型的滑梯好卡哇咿呢!




總共有5條特色滑梯,有長有短,有高有低,啱哂任何年紀嘅小朋友。





仲有好幾個新式氹氹轉,唔單上橫向式轉,仲有直立式,好似個洗衣機咁快速旋轉。



呢款五人氹氹轉有4個座位同1個站立位,好講求合作性,互相平衡,可以一起互動。





少咗個人就即刻偏重一邊喇!



另一邊仲有樂器敲擊的遊樂設施。




小朋友可以一齊合奏一曲!



最後呢個由英國引入的最新設計,Crossover遊樂場同健身運動的設施。



有卧式,手部及動感單車,而且大人小朋友邊玩,仲可以以動能叉電,對家長嚟講真係天大喜訊,電話冇電可以嚟呢度叫小朋友幫手叉一叉,真係同時達到叉電又放電既效果。





呢位小妹妹上錯車,仲唔快D落番嚟!



歷奇公園旁邊仲有水機,大家玩之餘記住都要補充水份呀!





除咗歷奇公園之外,商場露天廣場的另一邊係都巿農莊,由即日起到8月26日(逢星期六、日),仲有個「低碳生活農墟 ‧ 巿集」





仲有田園耕作體驗同埋工作坊,真係好適合一家大細,可以話打破傳統商場行街Shopping嘅做法。




可以同好多巨型蔬果打咭,哈哈~








暫時於八月份的4日、18日,會設有田園耕作體驗,各位大小朋友都可以去體驗感受一下。




今日我哋參加咗「Kombucha健康茶醋工作坊」,除咗話俾我知平時飲可樂,其實有幾恐怖同唔健康,仲教識我哋製作健康茶醋,原來飲落去就幾似可樂喎!


參加辦法:MP VIP Club會員憑100積分,並即場下載新地商場手機應用程式及讚好新都會廣場Facebook及Instragram,即可換領「都市農耕體驗」入場証一張。每場名額20個,先到先得,換完即止。





Photo by Sony A7III FE 28mm F/2

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10


呀劍評語: 香港終於可以多番個似樣有創意的公園遊樂場,唔再係一式一樣的紅黃藍膠滑梯。而且空間好大,可以俾小朋友任跑任跳,真正放電之選。

地址
葵芳新都會廣場L5

開放時間
上午10時至晚上7時

(以上資料更新至文章當日)





                 

RELATED POST