親子戶外

【親子好去處】河邊有隻羊 RiverGoats

12 Jul, 18

RAW處未算RAW,我哋一家成日去農莊玩,越玩就越RAW,今次我哋兜口兜面餵羊、掘蚯蚓、擦火石、搵蜂后,同哥哥芊芊嘗試咗好多個「第一次」。


今次到這農莊名叫「河邊有隻羊」,個名係咪好得意呢? 其實這不是一個規模很大的農莊,反之只不過啤梨叔叔同姨姨的屋企。

姨姨的爺爺走了,佢哋為咗唔想荒廢了農地,所以希望繼續發展農田,利用這地方去跟大家分享,不是為了賺大錢,但求可以邊做自己喜愛的事,又可以收支平衡。相信你睇過我今次介紹,都會支持啤利叔叔一下吧!




在上水火車站上水廣場出口方向行(A4出口會比較近),就在廣場及港鐵站中間的綠色專線小巴站,乘搭57K(切勿上錯車,要搭往唐公嶺的),大概15分鐘,同司機叔叔講話過咗菜站的橋頭落車就得!


落車後會見到正前面係5號橋,我哋唔駛行過去,只需向左望就會見到一條小路(6號橋),一直向這方向行入去。






















呢度就係啤梨叔叔的屋企,佢同太太豬皮蛋姨姨同嫲嫲住埋一齊,由於爺爺早了點走,所以田地都冇好好利用,依家希望可以自給自足之餘,都希望可以跟大家及小朋友一起分享,咁就係佢最理想的生活。


唔好諗住呢度有好多玩樂設施去服侍班細路,呢度有的只係山、田、河,一切出於自然,我哋利用天父俾嘅所有,發揮少少創意就可以跟小朋友無拘無束咁玩一個下晝。





我哋settle down後,第一個節目就係先去餵羊,喺屋企隔離就有個羊圈,總共有11隻羊,最近先至有2隻羊咩仔出世。




我哋戴起手套,準備到田去摘葉同埋割草。




我哋先去摘楊桃葉,姨姨話D羊咩最鍾意就係食呢D葉。



之後我哋再落去割野草,芊芊拎住鐮刀一下一下割下草,可能家長們會擔心小朋友割傷自己,不過其實鐮刀都鈍哂,所以好安全,就算割到都最多只係皮外損傷 (同埋傷咗都可能係件好事,小朋友就會學習下次小心)



不過始終要信任小朋友,同埋俾佢哋嘗試下,最後兩個都做得好好完成任務。





我哋裝滿成桶雜草,準備番去餵羊咩啦!





因為見到遠處有一大舊黑雲嚟緊,所以我哋趕緊去割埋菲菜同摘一兩條辣椒,for我哋午餐包餃子用。



跟小朋友一起在大自然玩樂係來得最簡單最興奮啦!



呢個哥哥識少少就扮代表教呀芊應該要摘邊D先啱。




時間啱啱好,我哋將要摘完時,大雨就殺到嚟,我哋一齊跑番入屋避雨,大家狼狼狽狽但係都超開心。


然後我哋先準備自己的午餐,將啱啱摘番嚟的菲菜洗乾淨,再砌粒,用嚟包餃子。





全程大人撓埋對手,呢兩個細路就夾手夾腳準備埋俾我哋食。





跟住佢哋開始包餃子,雖然包到唔三唔四,出到嚟咩形狀都有,但係亮點不在於好唔好味。



而係佢哋又幾用心同幾享受整個過程。



一睇就知邊D係佢哋包!


原來姨姨一早就為我哋準備好,如果要等佢哋包,可能真係要變晚餐,哈哈~


等食過程中,芊芊就玩下身邊的木琴,自然拼出來的音樂真係最好聽。




哥哥呢邊當然係做D男人嘢去起爐啦!但係今次我哋好特別,係用枯枝樹葉去生火。




哥哥拎起擦火石,一下一下擦出火花,一D都唔容易,真係要好有耐性先可以做到。



每次都以為就得就得,點知又唔得。


但係等下等下,終於知道咩叫做「鐵柱磨成針」,最後成功啦!




當煮緊餃子嘅時侯,我哋就去餵羊啦,今次要走入去羊圈直接面對面餵,不過芊芊今次冇驚仲好大膽,同埋我哋一齊走入去餵。



不過話口未完...隻羊咩一衝埋嚟,又驚過!哈哈~




頭先摘嘅楊桃葉,終於知道用嚟做咩啦!




由於羊咩鍾意食楊桃葉多過草,所以就可以用佢嚟引羊咩表演企起身。



但係玩得羊多終遇...羊飛踢!羊咩一企起身食葉嗰陣,對前蹄就踩落去哥哥個心口度,佢就好痛,我哋就笑到肚痛。




都係乖乖地餵佢哋安全D。






最近羊媽媽仲生咗BB喔!超可愛





想羊咩乖乖哋同你打咭,你就要學佢哋一手拎葉一手摸住佢哋背脊咁影啦!






無意發現呢個楊桃BB,真係手指尾咁細粒咋,好得意!




餵飽羊咩之後就到我哋自己去醫肚,我哋自己飽嘅餃子終於出爐有得食啦!



哥哥食到七情上面,只不過因為啱啱煮好熱過頭。




真係自己包的水餃特別好味,足足食咗兩大碗水餃,就連湯都飲哂乾乾淨淨。



食飽之後當然又要起動去幹活,不過今次我哋又有新體驗,就係去掘蚯蚓。



媽咪之前一聽到都毛管戙,但係佢哋兩個反而好興奮,好似小朋友有這份童真真係好,其實我哋大人都好應該向小朋友學習一下。




兩個跟住啤梨叔叔一齊掘,叔叔先用大鋤頭翻鬆泥土,然後他倆再用小鋤頭去搵蚯蚓。




芊芊搵到第一條蚯蚓啦!超開心好似搵到寶物一樣。(媽咪在旁邊打冷陣...)



另一邊的哥哥更積極的去掘。




佢搵到條又大條又肥美的,超興奮!





捉到20多條喔!如獲至寶


剛才都仲係戴住勞工手套去捉,依家居然同條蚯蚓Friend咗,拎上手玩!



呀芊見哥哥有樣學樣,都一齊拎上手慢慢玩,有哥的妹真係好。



見佢個樣好似想擺入口咁...




唔好以為告一段落,一大盤咁肥美的蚯蚓,原來係用嚟釣魚㗎!



我哋就在旁邊的魚池去釣魚,用蚯蚓做魚餌真係新鮮到不得了。





從來未試過咁有滿足感,真係一放魚竿落去唔夠一分鐘就有魚上釣,睇嚟D蚯蚓真係好好味(對D魚嚟講)。


可能大人會覺得釣魚係應該俾小朋友學習等待,唔應該俾佢咁容易釣到!不過偶而一次也無妨,俾佢哋感受更多成功感。(之前在碼頭垂釣已經常常學習挫敗感。)



芊芊看見呢兩條魚,話佢哋KISS緊!哈~


真係節目好豐富,釣完魚之後我哋都放番入魚池,然後休息一陣就過咗去睇蜜蜂箱。




睇蜜蜂當然唔係第一次,不過平時我哋都見唔到嘅蜂后,今次我哋可以見到啦,連我自己都興奮。




喺邊度?喺邊度?






有一隻黑黑的大大隻,原來就係蜂后啦!



有冇發現呀芊唔喺相中出現,因為佢睇咗陣之後,唔知點解俾隻蜜蜂針到手臂,番咗去坐低休息一陣。(少少腫冇咩事)

跟住我哋番去坐低,啤梨叔叔就拎出自家產品,分別逐一介紹同俾我哋試下。


的確係試得出有分別,有D比較甜,另外有D就甜得嚟好fresh唔涸喉。



哥哥就最鍾意呢隻冬蜜!


芊芊就食個唔停。



姨姨再開杯蜜糖水俾佢哋飲,真係大熱天時飲番杯好舒服。



如果你都想同我哋一樣去體驗「河邊有隻羊」就快D inbox我,等我帶你一齊去玩啦!




[video]


Photo by CANON 5D Mark IV, Len | EF16-35mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10


呀劍評語: 絕對係我咁多次農莊體驗最Warm最有Heart的一次,除了真的是以家為主去經營農莊,也真心希望不辜負爺爺留下的一塊田地。再者,所有活動都以小朋友為先,由他們出發去進行每一項活動,是一次真切的原野農莊體驗。

河邊有隻羊 簡介
我們是住在上水雙魚河邊的五隻小羊,我們最鍾意吃草,大家有時間來探我啦。

地址
唐公嶺雙魚河六號橋

(以上資料更新至文章當日)





                 

RELATED POST