【大嶼山營地大集合】露營車 ‧ 南非營 ‧ 蒙古包 ‧ 野外體驗

因為呢幾年到過大嶼山唔同嘅地方宿住或露營體驗，所以想介紹幾個好值得同一家人去玩的營地，包括YHA昂坪戴維斯青年旅舍、浪高長岸、塘福露營車及海迎灘。

【YHA昂坪戴維斯青年旅舍 Hassle-free camping】

我哋由東涌出發，坐昂坪360纜車入巿集！

今次仲可以坐到水晶車廂，開心到佢哋兩個！指定動作，坐喺玻璃地下睇住車廂下底嘅風景

到咗巿集順便去埋360舞臺同埋360影院，同埋....扮吓遊客影吓3D相

經過大佛之後就會見到指示牌，沿住小路一直行見到分叉路，再有指示牌轉右繼續行多大約10分鐘

見到呢個大金元寶就大約到達營地

轉埋上斜路就到啦！

跟住呢條好似迷宮咁嘅斜路樓梯就到啦

營地唔大一眼睇哂！在草地上只有幾個中小型的帳幕，最大的就係我哋個Bell Tent，隔離有辦公室及另外一面有燒烤場及宿營舍

營舍裡面有足夠設施及煮食餐具，廚房內有4個電煮食爐，而且有冷熱水機！

沙煲冷撐都齊全應有盡有，起初我仲擔心咁多人一齊Camping，夜晚煮起嘢食上嚟咪會爭爐用！首先今日追月晚上居然唔太多人入Camp，而且我哋6點幾就開始煮，都冇話同其他後生仔撞時間(就算7點後都係得兩三個人準備晚餐)，所以都冇咩問題！

仲有最緊要預備蚊香...在營外點上幾個，包你夜晚瞓得舒服！

另外可能對於比較少甚至冇試過Wild Camp的家庭嚟講，冇風扇冷氣會唔知點算，其實你只要揀啱少少秋涼天氣嚟，即使早上真係成33度咁熱，夜晚入夜後真係好凍...到凌晨時分仲覺得好凍要瞌被㖭呀！如果真係擔心的話自備個芭蕉扇都夠哂

到咗夜晚我哋佈置嘅舍地仲顯得特別靚，好多其他Camp友同職員都走過影相呃Like

攪咗成個朝早，執好行李放喺Camp Site，然後真係兩手Fing Fing去行山，我哋行去最近嘅心經簡林打個轉！

望去遠處嘅山覺得好靚好遼闊，其實有時間真係要多D去親親大自然，感覺真係好舒服！最後Check-out可以番回巿集食午餐再乘搭纜車回去。

【YHA昂坪戴維斯青年旅舍 Hassle-free camping】

地址
大嶼山昂坪

營業時間
開放時間 :上午7:00-晚上11:00
入住時間 :下午3:00 退房時間 :中午12:00

電話
(852) 2985 5610

電郵
[email protected]
[email protected]

地圖
http://g.co/maps/sh2es

網頁

www.yha.org.hk

░░░░░░░░░░░░░░░░░░░░░░░░░░░░░░░░░░░░░░░░░░░░░░░

【浪高長岸 Long Coast Seasports】

其實長沙下村有多家餐廳，亦有士多(只營業至6時)

到長沙下村(長沙警署下一個站)落車，落咗車行前兩步就見到長沙下村個牌，然後沿住斜路行落去停車場就會見到營舍Office

(*條斜路超斜，我非專業估計都有30度，大家要切記小心)

Checkin後跟住職員入去我哋今次要住嘅南非營 (特別感謝印巴職員單手抬起我哋個喼帶我哋行入Site)

呢度係Zone A總共有4個南非營，沿路再入仲有3個Zone，剛好我哋被安排在Zone A，最近沙灘同Office，所以非常方便！

這個是六人營，營地環境比我想像中簡陋，營外只有枱兩張枱幾張櫈，營內就得兩張吹氣床墊同埋兩張單人床褥，床舖要外收費$50一套枕頭連被，加埋部分體式冷氣，就係得咁多！

個南非營幾安全，有兩重拉鏈開關，營裡四面都有手捲窗簾連蚊網

行番出嚟沙灘我先去Office開番個Locker鎖番鎖匙銀包，始終南非營都冇門鎖，所以最好大家都將隨身貴重物品放入Locker

(其實營地都有提供渡假屋住宿，如果覺得南非營太過Wild都可以住番渡假屋)

一出營地就係海灘，最啱小朋友可以即刻衝出去玩！

長沙下村有幾家餐廳，都係以西式或Fusion為主！最近營地的這家叫"The Beach House"

呢間叫"Long Island"，幾家餐廳都喺隔離，可以一次過睇哂想食邊間！

再隔離有個雜貨店，如果入唔夠貨嚟玩，可以喺度補給㗎！一般零食汽水甚至游水滑浪用品樣樣都有！

如果同一班大朋友嚟都可以去再隔離呢兩個bar，呢家好有中國古典味道！

過咗呢條小橋有另一間叫"Stoep"

再行前就有個原住民開的士多仔，一個老婆婆睇檔，不過佢六點幾就會閂！所以有咩買要早少少啦

最後我哋揀番第一間"The Beach House"，玩完水一於食番餐豐富晚餐同埋食浪漫情調，坐喺沙灘邊的梳化位，吹住海風食嘢真係好舒服

第朝起身刷牙洗個面，直行穿過瀡滑梯就係洗手間同浴室位置

兩格浴室兩格厠所供四個營嘅朋友用，唔算太污糟，不過就細咗D，用得唔太方便，仲有垃圾筒冇人更換，直至到下一日入營前先會有職員清潔，所以有D污糟！

Office隔離間餐廳仲未開門(營業時間係10:00，之後知道老闆娘佢今朝去咗買餸所以遲咗少少)

全部小食價錢偏貴，一碗餐蛋麵都成$45蚊！其他餐廳又未開，又唔想走番出去東涌食再入番嚟，唯有谷住俾佢賺啦！(其實Office都有杯麵汽水啤酒供應)

個餐蛋麵唔係太掂有D求其，所以大家記住入定貨先入嚟Camp

小食店內仲有其他嘢賣！

我番去Office借咗兩塊Body Board俾佢哋玩(無須另收費，營租已包)

兩個都係第一次接觸Body Board，哥哥起初一路話唔敢行好出，只係在岸邊玩，但唔夠大浪！

但直至我掉佢出去深D試過一次之後，佢就上咗癮咁玩唔停

玩完Boby Board我再去Office借獨木舟Kayak！

記住所有設施都係冇教練陪住㗎，玩緊嗰陣自己一定要特別小心！出海前影番張有型相先

【浪高長岸 Long Coast Seasports】

地點

香港大嶼山長沙下村29號

開放時間
星期一至五：上午十時至日落
星期六、日及公眾假期：上午九時半至日落

交通
可乘坐11號巴士於長沙下村站落車，其他途徑請參考官方網頁

一般查詢、私人派對、預約課程、廣告及合作事宜

+852 8104 6222 (星期一至五上午十時至下午六時)

查詢有關風浪情況

+852 2980 3222 (上午十時至下午五時)

網頁

longcoast.hk

░░░░░░░░░░░░░░░░░░░░░░░░░░░░░░░░░░░░░░░░░░░░░░░

【塘福露營車 Caravans Hong Kong】

可能講出嚟會嚇親大家！真係差唔多一年前就book定呢次Camping(當然平日就未必Full)

首先要成為會員, 填好負責人email給你的registration form, 及ATM過數$100會員費, 選定你要的車輛後再ATM過全數(連入數紙whatsapp給他)!

如遇著天氣不穩定, 大家只有一次改期Quota, 但係需要於入營前兩星期(兩個星期前咁早都唔會預測到天氣係點, 所以多數如期出發, 聽天由命, 碰碰運氣!!)

搭咗15-20分鐘就到達塘福村啦! 一落車就會見到露營車個指示牌

斑馬線對面係「偉光士多」, 大家有咩兵糧短缺都可以嚟呢度補給, 夜晚10點先收檔

落車後一直行(唔駛過對面馬路)就會見到停車場, 其實樓梯口就喺圖中旅遊巴車尾及停車場中間

之後就會再見到指示牌(不過好高同好細塊, 差D見唔到)

有陣時停車場比較多車, 可能會遮住咗條樓梯口! 沿住樓梯行落去就會見到一大片草地

(唔好轉左)只要一直跟住石塊路行到尾就會見到間綠色鐵皮屋, 嗰度就係露營車營地啦!

塘福露營車個招牌都甩哂色，繞過個招牌行幾步就有個木欄，入到去就係營地範圍！

營地成(反轉)"L"字型，三架中型車在一邊，另外三架大型車同兩架小型車併列一起

每一架露營車外都有木枱櫈同埋燒烤爐

露營車入口左手邊的梳化，拉出支架可以變成一張雙人床！足足有6呎夠哂2個大男人瞓，而且車內好多櫃同暗格，包你一定夠位放嘢！

車內嘅窗全部有蚊網同遮光簾任意調交，望出窗外嘅樹景真係好舒服好寫意！

望上去仲有個天窗，如果好天夜晚可以坐喺度睇星星！

室內全部傢私都係用木製造，感覺充滿太自然氣息！下圖見有收音機同喇叭，聲音收得好清！仲有CD播放器(但係我覺得今時今日俾個USB頭駁電話播歌仲好囉)

門口的右手邊就係一張雙人床同洗手間，同樣有一個天窗同埋多個櫃

枕頭全係成人用, 如果有小朋友的話就只好唔瞓枕頭, 如果唔係就要自己DIY或者自備了!

厠所會有一卷全新厠紙同埋上手用剩的! 如果真係驚自己當晚一卷都唔夠用, 就最好預先問負責人拎多卷後備, 因為佢七點就放工架啦!

門口正前方就係廚房，所有餐具飯煲都準備齊全，針板菜刀都有，足夠應付日常煮食

唯獨是大家一定要記得預備食用油，如果唔係就煮唔到嘢食㗎啦！(大家可以到士多買或者用牛油代替)

由營地行去塘福海灘都係5分鐘，當你見到個海灘即刻有四個字出咗嚟...「水清沙幼」

大家在車外就可以BBQ，小朋友燒完嘢食就可以舒舒服服咁坐喺車裡面開餐

第朝一家人自己準備早餐，食完後再到海灘玩個！

【塘福露營車 Caravans Hong Kong】

小型露營車 Small Caravan x 2

(可容納2-4成人, 包括一張雙人床及一張可伸延梳化雙人床)

$1100(日至四; 假期前夕除外)

$1800(五,六或假期前夕)

中型露營車 Medium Caravan x 4

(比小型露營車大30平方尺, 同樣可容納2-4成人, 包括一張雙人床及一張可伸延梳化雙人床)

$1200(日至四; 假期前夕除外)

$2000(五,六或假期前夕)

大型露營車 Large Caravan x 2

(可容納4-6成人, 包括四張單人床及一張可伸延梳化雙人床)

$1500(日至四; 假期前夕除外)

$2500(五,六或假期前夕)

(A) 入住時間: 下午四時, 退車時間昱日二時 (2小型車, 1中型車及1大型車)

(B) 入住時間: 下午三時, 退車時間昱日一時 (3中型車及1大型車)

*提提大家需要預備的物品

✦ 盥洗用品

✦ 毛巾拖鞋

✦ 調味料(如食用油、豉油、糖等)

✦ 風筒(營地只有3個, 先到先得)

✦ BBQ用品(如炭, 炭精, 火機等; 營地有二手燒烤叉及燒烤網)

地址

香港大嶼山嶼南道270號塘福村

交通

東涌乘搭 11, 11A 或 23 號巴士至塘福站下車 (車程約 20 分鐘)，下車後步行 5 分鐘

電話

6296 8220/ 6371 1211

電郵

[email protected]

網頁

http://caravans.com.hk

░░░░░░░░░░░░░░░░░░░░░░░░░░░░░░░░░░░░░░░░░░░░░░░

【海迎灘 Welcome Beach】

我哋入住嘅係「豪華家庭車」，星期日至四入住只需$2,100，若是同款營車於星期五、六或公眾假期(包括前夕)，要加多$1,000。

如果第一次嚟好似我咁，就要Check-in時俾多$100(永久性)同埋要按營車數量俾定按金，所以要帶定足夠Cash喔！

營車內裡盡是黑白灰色，顯得很企理乾淨，而且職員每天於Check-out後也會收拾乾淨及消毒。呢個係客廳 ^.^ 張枱仲可以調交至坐椅高度，變身做梳化床。

車頭就係睡房，有張好舒服的雙人床。所有窗口都有齊遮光、防蚊裝置。

露營車外有餐桌餐椅，空間十分闊落。

另外營地有好多個休憩位置都好靚，本來想立即到海灘游水都要即刻停低打打咭先。

休憩設施可以俾營友對住每敵大海景，坐低飲杯嘢傾吓計，真係好自悠自在。

營地都有平衡車同滑行車，啱哂小朋友！

仲有個小賣部，可以喺度食Tea食早餐。

由「海迎灘」行出去沙灘1分鐘都唔駛，好大個海呀！仲要幾乎一個人都冇。

晚上仲可以在營地BBQ，我哋兩大兩小預訂咗個2人套餐$400

(蒜蓉豬扒 (2件)、黑椒西冷牛扒 (1件)、BBQ雞扒 (1件)、椒鹽金沙骨 (2件)、咖哩魷魚翼 (2件)、雞中翼 (可選椒鹽/咖喱/蒜香) (6件)、美國廚師牌雞肉腸 (4條)、雜錦丸 (12粒) (新加坡白魚丸,台灣花枝丸(墨魚丸),貢丸,牛根丸，脆皮芝士腸) 包炭一包，蜜糖一樽，叉2支，汽水兩罐，餐具及燒烤爐免費提供。)

燒烤場隔離有小賣部，開到夜晚12:00，所以大家都唔駛擔心有咩唔夠。

兩個食飽後就番營車開床睇電視。

第朝起身一家準備早餐，然後就可以再到海灘玩個夠。

【海迎灘 Welcome Beach】

平日（星期日至四）場地價目:
情侶（2人）$1400
家庭（2-4人）$1600
豪華家庭（2-4人）$1800
尊榮家庭（2-5人）$2000
特色尊榮家庭車 ( 2-5人 ) $2200

假日（星期五、六、公眾假期及公眾假期前夕）場地價目:
情侶（2人）$2200
家庭（2-4人）$2600
豪華家庭（2-4人）$2800
尊榮家庭（2-5人）$3000
特色尊榮家庭車 ( 2-5人 ) $3200

平日收費星期日至四 ( 公眾假期及公眾假期前夕除外 )
由7月1日至8月31日
情侶代用劵（2人） $1500
家庭代用劵（2-4人）$1900
豪華代用劵（2-4人）$2100
尊榮代用劵（2-5人）$2300
特式尊榮代用劵（2-5人）$2500

假日收費 ( 星期五，六，公眾假期及公眾假期前夕 )
由7月1日至8月31日
情侶代用劵（2人） $2300
家庭代用劵（2-4人）$2900
豪華代用劵（2-4人）$3100
尊榮代用劵（2-5人）$3300
特式尊榮代用劵（2-5人）$3500

經東涌巴士總站：
乘11，11A，23，A35，N35(通宵)號巴士，約20分鐘車程到長沙蝶崗站下車。以上從蝶崗站下車後，往梅窩或東涌方向步行（即反方向）約1分鐘後右轉沿石矢斜路向下步行2分鐘即可到達本場地。沿路亦有＜海迎灘Welcome Beach＞指示標誌指示方向，如在東涌或梅窩乘坐的士到達海迎灘場地，車資費用大約$100。

經梅窩巴士總站：
乘1，2，4，N1號巴士，約20分鐘車程到達長沙蝶崗站下車。以上從蝶崗站下車後，往梅窩或東涌方向步行（即反方向）約1分鐘後右轉沿石矢斜路向下步行2分鐘即可到達本場地。沿路亦有＜海迎灘Welcome Beach＞指示標誌指示方向，如在東涌或梅窩乘坐的士到達海迎灘場地，車資費用大約$100。

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。