親子戶外

【親子好去處】海迎灘 Welcome Beach

07 Aug, 18

我哋其實好鍾意去Camping,當然係Glamping啦!(其實唔係太捱得又怕熱)
特別係露營車喔,所以今年暑假我決定再同呀哥呀芊去多次。今次就揀咗上長沙的「海迎灘」。

依家去大澳嗰條線真係好方便,搭港鐵去到東涌,向昂坪360方向行就見到一大個巴士站。

大家記住睇開車時間表喎,差唔多半個鐘頭一班,雖然有其他線的巴士,但係11A係又平又快,如果miss咗搭11號就貴少少同耐少少。




我哋今次真係兩手Fing Fing,因為我哋訂埋營內的二人BBQ套餐,所以只係去東薈城Taste買少少水果同加多pad雞翼燒賣同第二朝早餐,就推住個大喼入去攪掂哂(打完先發覺唔係兩手Fing Fing...哈~)







在蝶崗站落車,向番後行3分鐘就會見到「海迎灘」塊Banner。





沿斜路向下行多一小段就看見營地。







終於到啦!由巴士站行過來也只不過5分鐘多路程。




營地總共有五款不同大小的營車

「情侶車」(2人)一張雙人梳化床 
「家庭車」(2-4人)」 一張雙人床+一張雙人梳化床 
「豪華家庭車」(2-4人)一張雙人床+一張雙人梳化床 
「尊榮家庭車」 和「 特色尊榮家庭車」(2-5人)一張雙人床+上下格單人床+單人梳化床

我哋入住嘅係「豪華家庭車」,星期日至四入住只需$2,100,若是同款營車於星期五、六或公眾假期(包括前夕),要加多$1,000。

如果第一次嚟好似我咁,就要Check-in時俾多$100(永久性)同埋要按營車數量俾定按金,所以要帶定足夠Cash喔!




營車內裡盡是黑白灰色,顯得很企理乾淨,而且職員每天於Check-out後也會收拾乾淨及消毒。




厠所空間都幾大,同埋整個營車內都有好多儲物櫃。




呢個係客廳 ^.^ 張枱仲可以調交至坐椅高度,變身做梳化床。




煮食用具都好齊全,有水煲、大鍋及電煮食爐。




車頭就係睡房,有張好舒服的雙人床。所有窗口都有齊遮光、防蚊裝置。




Check-in嗰陣職員會派發一籃餐具及手帶(用作識別住客,因為營地跟上長沙沙灘係相連的。)




呀哥呀芊都超開心,睇見小朋友咁開心,山長水遠嚟到再辛苦都覺得係值得嘅。



喺我哋架營車外面仲有張搖搖床,瞓喺度聽住隔離流水聲真係好好Feel。




我哋到步後就掉哂D嘢喺出面,要辛苦媽咪慢慢幫我哋執嘢。



我就同佢兩個換定泳衣準備出去玩水,不過都忍唔住要喺營地周圍先打吓咭。










周圍設備都用上粉紅、粉藍色,感覺好清新好年青!




有好多休憩設施,可以俾營友對住每敵大海景,坐低飲杯嘢傾吓計,真係好自悠自在。





仲有個AR程式恐龍效果,可以同小朋友喺度玩吓!




營地都有平衡車同滑行車,啱哂小朋友!



有個小小斜坡可以俾佢哋飛下車。







仲有個小賣部,可以喺度食Tea食早餐。



有出租水泡,太陽傘同埋沙灘𥱊。




由「海迎灘」行出去沙灘1分鐘都唔駛,好大個海呀!仲要幾乎一個人都冇。



D沙好幼好細,而且好乾淨,可以超放心俾小朋友點玩都得。


沙幼就梗係有埋「水清」啦!一件垃圾都冇之餘,仲要個海灘行到好出都仲係好淺。




兩個剩係玩浪都已經超開心。



食住買入嚟既水果,瞓喺沙灘曬住太陽,真係叉足電。


呢度嘅沙都偏黑,好似貝澳咁有好多蜆可以捉。(不過我就唔太支持,大家如果鍾意呢味嘢,就盡量大蜆先掘啦,太細隻又冇肉食就咪捉啦!)


哥哥叫呢D沙做「黑金沙」。


玩玩下水又俾佢發現到隻大蜆。







媽咪畫咗隻大青蛙送俾呀芊。



哥哥就自己畫咗隻獅子。


畫開就有條癮,結果畫下畫下,畫咗好多隻動物出嚟。









跟住玩玩吓又發現隔離有條由山水水流開的大水道。




全部都係淡水,仲有好多魚仔同蟹仔,兩個好似發現寶藏咁。








今日下晝天氣唔熱唔曬真係一流!




我哋仲發現咗隻擱淺嘅魔鬼魚。







哥哥就最鍾意捉蟹仔。





玩到差唔多7點,番去沖番個涼準備好BBQ啦!



我哋兩大兩小,就預訂咗個2人套餐$400 (蒜蓉豬扒 (2件)、黑椒西冷牛扒 (1件)、BBQ雞扒 (1件)、椒鹽金沙骨 (2件)、咖哩魷魚翼 (2件)、雞中翼 (可選 椒鹽/咖喱/蒜香) (6件)、美國廚師牌雞肉腸 (4條)、雜錦丸 (12粒) (新加坡白魚丸,台灣花枝丸(墨魚丸),貢丸,牛根丸,脆皮芝士腸) 包炭一包,蜜糖一樽,叉2支,汽水兩罐,餐具及燒烤爐免費提供。)














燒烤場隔離有小賣部,開到夜晚12:00,所以大家都唔駛擔心有咩唔夠。




佢哋兩個當然好快就話食飽,然後就番營車開床睇電視。(終於可以有機會同老婆撐枱腳)






因為夜晚落咗一場雨,所以大家都瞓得超好,瞓醒第二朝都已經差唔多9點。



一起身又繼續玩!我同媽咪兩個工人就要準備早餐。




當然唔會俾佢哋得呈啦,所以點都要佢哋兩個幫下手。












食食下覺得有D曬,我同芊芊就轉移陣地。





食飽飽就繼續下半場,我哋問Office借咗個波嚟踢。









臨Check-out前我哋又再換泳衣出海灘又玩過。






雖然Check-out咗,但係我哋都繼續留喺海灘玩,玩到差唔多2點(當然唔可以再到營地範圍),跟住留喺小賣部外面食埋尋晚BBQ食剩的,再幫襯小食車食番個丁麵同雪條。








超感恩喺我哋走嘅時侯,先至落起大雨上嚟。多謝神俾我哋有咁開心盡興嘅兩日一夜。



Photo by Sony A7III FE 28mm F/2

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10


呀劍評語: 真心係一個好舒服好自在的好去處,露營車設備齊全,而且一秒就到沙灘。兩日一夜的旅程,冇行程冇計劃,隨玩隨食!希望每年暑假都可以嚟一次。

平日(星期日至四)場地價目:
情侶(2人)$1400
家庭(2-4人)$1600
豪華家庭(2-4人)$1800
尊榮家庭(2-5人)$2000
特色尊榮家庭車 ( 2-5人 ) $2200

假日(星期五、六、公眾假期及公眾假期前夕)場地價目:
情侶(2人)$2200
家庭(2-4人)$2600
豪華家庭(2-4人)$2800
尊榮家庭(2-5人)$3000
特色尊榮家庭車 ( 2-5人 ) $3200

平日收費星期日至四 ( 公眾假期及公眾假期前夕除外 )
由7月1日至8月31日
情侶代用劵(2人) $1500
家庭代用劵(2-4人)$1900
豪華代用劵(2-4人)$2100
尊榮代用劵(2-5人)$2300
特式尊榮代用劵(2-5人)$2500

假日收費 ( 星期五,六,公眾假期及公眾假期前夕 )
由7月1日至8月31日
情侶代用劵(2人) $2300
家庭代用劵(2-4人)$2900
豪華代用劵(2-4人)$3100
尊榮代用劵(2-5人)$3300

特式尊榮代用劵(2-5人)$3500

經東涌巴士總站: 
乘11,11A,23,A35,N35(通宵)號巴士,約20分鐘車程到長沙蝶崗站下車。 以上從蝶崗站下車後,往梅窩或東涌方向步行(即反方向)約1分鐘後右轉沿石矢斜路向下步行2分鐘即可到達本場地。沿路亦有<海迎灘Welcome Beach>指示標誌指示方向,如在東涌或梅窩乘坐的士到達海迎灘場地,車資費用大約$100。 

經梅窩巴士總站: 
乘1,2,4,N1號巴士,約20分鐘車程到達長沙蝶崗站下車。 以上從蝶崗站下車後,往梅窩或東涌方向步行(即反方向)約1分鐘後右轉沿石矢斜路向下步行2分鐘即可到達本場地。沿路亦有<海迎灘Welcome Beach>指示標誌指示方向,如在東涌或梅窩乘坐的士到達海迎灘場地,車資費用大約$100。


(以上資料更新至文章當日)







                 

搜尋

文章分類

RELATED POST