親子戶外

【親子好去處】錦田 雷公田村 農場鮮奶有限公司

28 Aug, 14

農場鮮奶你可能聽過未飲過, 元朗大坑渠隔離有間士多, 專賣農場鮮奶! 當然佢唔係話新鮮到好似啱啱喺隻牛度乍出嚟啦, 其實都只不過係一個品牌啫! 起初我以為呢度係一個農場, 原來只係一個有養龜有養羊既一個士多茶座! 雖然係咁, 但係FOR一個短TRIP嚟講, 都不失係一個值得去既地方!




(網上圖片)

呢日係屋企食完晏晝, 因為係平日, 所以媽咪要番工, 我就同埋工人帶埋2個小朋友, 

我哋去到泰衡街(即大榮華旁邊)坐72號綠VAN到總站, 大約30分鐘, 落咗車之後馬路都唔駛過, 

背後就有條小路, 可以行入去, 行唔夠2分鐘, 只係轉個彎就可以有條小溪河流睇吓, 又有魚仔, 水好清! 

繼續行可以見到燒烤場, 跟住好快就見到目的地!








(網上圖片)

上到去就見到左手邊有2隻巨型盾臂龜, 最好笑係見到佢哋KISS, 唔知係真定假! 

跟住再過去羊羊個邊, 老闆事先聲明同我講, 話唔知羊幾時會出嚟架, 

所以唔似其他農場咁一定有得餵, 個老闆都有少少唔自在, 態度有D差! 

幸好我哋見到羊羊走出嚟食草, 跟住就買一札草俾Hysan去餵, 

又係俾錢幫人餵, 其實應該佢俾番錢我差唔多!



Shutter Speed | 1/100 s
Aperture | f/2.5
ISO/Film | 160










跟住我哋又係車房門外影番幾張「到此一遊」相, 

職員話呢間房以前係養牛, 係度乍牛奶, 依家變咗車房, 外牆油咗牛牛pattern! 

所以一定要係度影番張



Shutter Speed | 1/400 s
Aperture | f/2.5
ISO/Film | 160






我哋叫咗薑汁撞奶, 燉奶, 餐蛋麵, 燒賣都唔放過, 

當然農場鮮奶都有叫, 務求唔知幾時先再嚟既心態, 

所以叫得幾多得幾多! 咩都試一試, 價錢唔係特別貴! 

食落其實同去義順冇咩分別, 格硬講就因為有埋個環境好似好食d咁, 

度有燉奶芒果布丁, 不過只係期間限定星期日!






其實就係得咁多架咋, 唔好以為好多嘢, 可能你會覺得「唔係呀嘛」

但係如果你住開元朗附近, 以短途TRIP嚟講都OK, 可以行吓山睇吓水, 

嚟到就可以睇吓龜同餵羊, 大人又可以坐低食吓燉奶同撞奶! 

如果食完LUNCH嚟行個圈影吓相, 5-6點就番到屋企準備晚餐, 都OK架! 




在地上執到小花帶上個頭度問我哋「靚唔靚呀?」

回程途中沿路見到得意倒吊花花, 話要影相俾媽咪睇!


Photo by CANON 5D Mark III, Len | EF 35mm f/1.4L USM

呀劍評分: 7分


呀劍評語: 呢個分數唔係因為佢裡面好多嘢玩所以咁高, 如果以短途TRIP嚟講, 易去, 落咗車又可以行吓山, 沿途有小溪河流小水壩睇! 係裡面好清靜好舒服, 小朋友可以餵吓羊, 睇吓大龜, 周圍跑吓, 大人唔駛太睇住佢哋, 可以坐下吹水, 食薑汁撞奶或者食碗餐蛋麵, 真係雙贏架!

呀劍貼士: 如要去廁所, 要行番3-5分鐘出番去BBQ場個公廁, 都尚算乾淨! 因為少人用, 雖然呢度冇咩特別, 一眼睇哂, 但係有機會都會再去!

農場鮮奶有限公司簡介
是一個有牧場的露天茶座, 牛奶由內地的「農場鮮奶」牧場入貨,並供應自家製的薑汁撞奶、芒果燉奶、燉奶、熱鮮奶和鮮奶咖啡等。

地址
新界甲龍村雷公田78號

交通
從泰衡街(大榮華旁邊)坐72專線小巴到總站,落車後沿住小路(就在總站旁邊)行入郊野公園燒烤場, 大約20分鐘就到!


電話
2832 9218

網址
www.farmmilk.com.hk


(以上資料更新至文章當日)




RELATED POST