【親子好去處】西貢漁農自然護理署獅子會自然教育中心 Lions Nature Education Centre

每當聖誕節人人都去行商場或參與大型活動

我哋一家反而揀咗去親親大自然 - 去咗獅子會自然教育中心

我哋搭港鐵去到彩虹C2出口轉1A專線小巴大約15分鐘就到

其實大家可以於北港巴士站落, 但係我哋揀咗係車路入口

步行5分鐘到達停車場

見到停車場附近有一行好靚既黃色花!

帶住屋企管理處送既聖誕禮物包, 裡面既面具!

難得地少人唔駛同人逼! 真係好舒服好興奮

我哋先喺停車場附近的山頭散步!

更亭姨姨話我哋知行上去山丘會見到幾隻牛喺度食草

所以我哋就先行上去會一會牛牛先!

行上去唔駛幾耐就已經見到佢哋啦!

大家可以放心, 因為佢哋都係有人養既, 唔係野生!

佢哋見到我哋行到咁近都冇咩反應, 我諗佢哋都慣!

佢哋真係好自由自在咁行, 我哋一路跟住佢哋!

行到入嚟呢個大草地! 呢度放咗好幾張枱櫈

如果近近哋入嚟野餐都幾好!

入到嚟梗係要做D Wild嘢爬吓樹啦

妹妹爬唔到樹就當然玩樹枝啦

佢仲執到支好長既樹枝tim!

之後仲喺度現場寫生呀! 難得可以對住D咁近咁近既牛畫畫

哥哥畫完之後仲行番落去送俾更亭姨姨

然後我哋去個廁所就繼續行上停車場對面既山頭

原來上面係個大平地, 有2,3個公公婆婆喺度晨運!

哥哥見到有少少沙地, 就提議執樹枝喺地上面寫字!

好感動哥哥寫咗「我愛你爸爸」送俾我! (起初以為係媽咪教佢咁寫)

芊芊唔知畫咗D咩, 哥哥好叻識得鼓勵芊芊, 讚佢畫得靚~

呢棵樹被斬後卻成為一個好靚既舞台!

我哋再喺呢度逗留多陣就繼續向前出發!

Hooooo行行吓仲出現藍天, 凍凍地又暖暖地, 真係一流!

穿過呢個隧道就見到獅子會教育中心同其他館

都未行到幾步又一個大平地, 所以又喺度停留咗一陣

佢哋喺度跑跑跳跳, 我就乘機坐低抖吓曬吓太陽!

芊芊見到成地都係雞蛋花就喺度執埋幾朵

見到呢張石櫈咁靚, 要喺度影番幾張相留念吓先!

古靈精怪芊芊拎住支BB樹枝(芊芊幫佢起名的)

喺度亂篤我個鏡頭!

最可惜既就係聰鳴茶座今日仲裝修緊

但係呢度寫住12月底...今日25號都未夠底咩? 居然趕唔切聖誕完工

嘩, 見到一大塊農田! 不過係迷你版, 你會見到細細塊田上面咩植物蔬菜都有D

(又要再提....真係好少人, 空氣都清新D)

我同芊芊落咗嚟農田, 我哋見到菠蘿, 火龍果同里木瓜!!

呢棵樹好多紅葉黃葉好靚呀! (不過就跌哂落嚟)

後面呢D黃色花都好靚呀! 好似係菜心嚟架...

呢個哥哥執咗D樹枝跟住扮擔子吊住個袋仔(裡面又係裝住好多支小樹枝)

我同芊芊繼續行去其他農田, 見到小荷花池, 同薰衣草!!

呢度仲有好多其他得意既植物同中草藥!

呢個農墟只係逢星期六、日先會開檔!

轉番上嚟見到聰鳴茶座! 睇個樣唔似2015年內可以整好囉...

呢度行上去係蕉坑自然教育徑

第日等茶座重開, 再嚟呢度同小朋友行吓山High吓Tea

睇完植物又有岩石睇!

不過哥哥見到石頭就只有爬嚟爬去! 都冇興趣睇吓唔同既石頭!

呢個花好靚呀! 好似紙巾做咁既

跟住我哋去到山邊些枱櫈休息一下, 食少少嘢! (好在媽咪醒目, 事先買咗D飽入嚟)

佢哋仲好開心喺度表演咗首歌我哋聽!

然後我哋就去咗隔離個昆蟲館望吓啦!

放喺門口呢隻大甲蟲都好靚!

館內唔算大同埋比較資料性同以標本為主!

相比起大埔海濱公園同埋屯門昆蟲館冇咁多真實昆蟲睇

呢個遊戲幾好玩, 大人都可以玩埋一份(眼明手快搵番隻昆蟲出嚟)

呢度有個視訊位置播住蝴蝶整個演變過程

離開昆蟲館我哋就去到漁館, 地質公園學習園地同貝殼館

亮點在上面.....漁翁撒網!!

佢哋真係好鍾意跳起影相, 一齊跳完之後仲要自己單獨影張跳起相

最後都差唔多要離開, 我哋又見番幾隻牛! 佢哋真係由朝食到晚

我哋由北港巴士站出口離開

跟住搭92號巴士到西貢巿中心

呢個時侯芊芊已經瞓著咗! 我哋繼續周圍行

見到海鮮餐廳但係覺得好貴都係唔敢入去食

然後去到碼頭坐低望吓人釣魚

好得意係見到好多艇仔泊喺碼頭邊

其實佢哋係賣緊嘢! 企喺碼頭邊既遊客就望落艇度睇吓有咩買

坐喺度見到有個叔叔同鸚鵡經過, 佢仲好識攞Pose俾我影咗張相!

我哋繼續喺巿中心周圍行吓, 順便搵吓有咩食!

沿途見到一間餅店咁多人排哂長龍

所以我又排吓先, 買番舊菠蘿飽同葡撻! (菠蘿飽 $9; 菠蘿油$15; 葡撻 $11; 凍奶茶要$20...)

菠蘿飽超厚脆皮好好食!

葡撻都好食過KFC...正, 唯獨係凍奶茶普普通通但係要成$20有D貴

Photo by CANON 5D Mark III, Len | EF 24-70mm f/2.8L USM

呀劍評分: 9分

呀劍評語: 如果有埋茶座我就俾佢滿分! >.<

呀劍貼士: 可帶寵物一同前往 - 假期可購買當造有機菜

獅子會自然教育中心 簡介

位於西貢蕉坑特別地區的漁農自然護理署獅子會自然教育中心佔地約 16 公頃，設有五個展覽館和多個戶外特色展區，為學校、機構及公眾提供各類自然教育、野外研習和自然導賞的活動，是一個老少咸宜的郊遊好地方。

地址

香港新界西貢半島對面海蕉坑

開放時間

星期一、星期三至星期日及公眾假期：上午九時三十分至至下午五時開放/ 展覽館開放至下午四時三十分。

停車場：上午九時三十分至下午四時三十分

星期二(公眾假期除外)及農曆新年年初一及初二休館

免費

交通

於北港巴士站下車，然後步行前往中心
92號巴士來往港鐵鑽石山站－西貢
1A號專線小巴來往港鐵彩虹站－西貢

電話

2792 2234

網址
http://www.afcd.gov.hk/tc_chi/country/cou_lea/cou_lea_ven/lions.html

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。

01 Dec, 21

【親子好去處】AK都有玩 Sasuke Fitness Ninja Warrior 化身忍者挑戰關卡

平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。

08 Nov, 21

【親子好去處】小白兔音樂農莊 New Bunny Wonderland 兔！全部都係兔

久違了農莊親子遊一段日子，今日終於可以再去親親大自然，而且今次都係久地重遊。

25 Aug, 21

【親子好去處】Dunk Sports Training Centre 起躍體育訓練中心全集中の訓練信心と堅持

做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。

16 Aug, 21

【親子好去處】STEM Carnival @ Cyberport 大玩編程 DJI無人機 RoboMaster 參觀智能農場餐廳

今個暑假不單只同陽光與海灘玩遊戲，有時靜靜地鍛鍊一下大腦玩玩編程都很好，今次由Ask Idea 和 DJI Education 舉辦的「ASK Idea呈獻：STEM嘉年華」就在數碼港 Cyberport 同大家一齊開心玩啦。

04 Aug, 21

【親子好去處】悅來酒店 Panda Hotel 熊貓夏祭食宿套餐扮番鄉下の旅人

又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。