今日星期天親子日我哋去咗天后一間叫101肉燥飯專門店食個Lunch，叫得肉燥飯, 唔止食到肉, 我哋仲食到好"燥"!!! >.<
佢位於天后港鐵站A出口左手邊! 我哋差唔多1點幾入去, 唔駛等位!
店內環境乾淨(可能因為新開啦! 半年後就唔知變成點), 間隔成打直長方形, 通道有D窄, 行過都驚撞到人哋
牆上掛住餐牌! 其實佢同枱上既餐牌一樣! 只係放大成張野印番塊Foamboard出嚟貼喺度
D字細到飛起, 因為佢比例上同枱上張餐牌一樣, 佢哋應該要知道貼咗喺牆上面就會唔同架啦!
呢度有散叫也可以叫套餐, $62起跳有主餐+小食+特飲! 都係嗰句, 如果好食就唔算貴!
最值得讚係有個籐籃喺每一個櫈底度! 可以俾人放低個大書包大袋, 呢吓都幾細心! 當然佢都唔想有人用個袋霸住個位啦
我哋叫咗一個香茅豬扒轉咗川粉(似上海麵) 同埋一個套餐, 醬汁燒雞扒滷肉飯+小食鹽酥雞+朱古力牛奶雪香
一般台灣特飲, 杯朱古力同一般茶餐廳凍唂咕差唔多, 只係上面加咗雪香片!
香茅豬扒都真係有香茅味既! 同埋好「林」唔難咬, 個麵都唔太差, 只係個賣相求其咗D
跟住個小食鹽酥雞就得兩隻, 少咗D! 用酥炸方法但唔夠脆, 有D油唔夠乾身!
叫得係肉燥飯專門店, 梗係要試吓佢D肉燥, 食落唔太差, 唔係一般街食到的, 香口!
講完嘢食啦終於! 跟住要彈既係佢既服務態度, 你可以話食幾廿蚊嘢要咩服務態度呀!
係! 我唔駛你笑住咁對我, 但係又我入嚟想叫嘢食到走, 都真係暫時唔會想入多次嚟食
首先我第一次嚟人生路不熟, 問第一句隨口噏自言自語「呢度點叫架呢?」佢就好冇Hea咁話「都係咁叫架啦, 一係睇餐牌叫, 一係叫套餐!」跟住問佢咩叫川粉...等問題都係好唔想答咁答我
跟住哥哥坐得唔舒服落一落地推埋D張櫈, 撞啱個呀姐又拎住嘢食放隔離枱, 就話哥哥「唔好亂咁郁呀....」(仲有, 不過唔Exactly記得係講咩) 一D愛心都冇, 我本來都可以因為佢好忙體諒吓佢, 但係間舖一D都唔多人, 唔係最忙既時侯! 可能佢M到啦(如果佢仲有既話)
不過可能係個別例子, 我戥間舖既老細唔抵有個咁既員工!
Photo by CANON 5D Mark III, Len | EF 24-70mm f/2.8L USM
呀劍評語: 求求其其, 非常油膩! 可去可唔去, 都係經過唔想諗先食既一間嘢! 除非食得開心囉, 如果唔係都唔會專登再去
地址
天后留仙街1-5號地下B號舖
開放時間
星期一至日: 12:00-23:00
RELATED POST
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
26 Nov, 20
【親子好去處】Park Hotel 百樂酒店 「飲飽食醉悠哉」住宿計劃
哥哥同芊芊啱啱考完試，一於帶佢哋去酒店玩番轉，今次我哋揀咗尖沙咀的百樂酒店，點解？好簡單，因為真係超抵住抵玩。
31 Dec, 19
【親子好去處】悅來酒店 Panda Hotel 『大帽』險遊山食宿計劃
少林功夫＋足球就聽過，估唔到酒店住宿＋行山都有得諗，今次參加了悅來酒店 Panda Hotel 『大帽』險遊山食宿計劃，食完嘆完第朝早再去行山身心舒暢～今次悅來酒店特別推 【『大帽』險 遊山食宿計劃】，我哋選擇先入住，第朝食過早餐先去行山，大家可以自由選擇行山的時段。
26 Nov, 19
【親子食記】纜車主題茶餐廳 金牌老香港
究竟仲有咩交通工具未做主題餐廳呢？哈哈，位於山頂廣場內的金牌老香港，正係用上山頂纜車為主題的餐廳，唔止好睇，仲好好食～上得山頂就預咗會貴，不過唔知係因為平時食嘢貴咗，定係佢真係真平，我哋四個人食個Lunch都只係用咗二百幾蚊。
25 Nov, 19
【親子好去處】九龍酒店 玩轉海陸空 探索香港住宿計劃 The Kowloon Hotel
一次過玩盡海陸空的住宿體驗，新鮮感極高，玩過癲過仲可以番酒店嘆大餐，一家人入住真係超滿足。