【親子好去處】九龍灣 MaBaLAND 親子空間遊樂園@牛下新城得寶商場

最近九龍灣新開咗一間兒童室內遊樂園MaBaLAND，波波池玩得多, 但係好似水浸咁高既波波池都係第一次見!

由石硤尾搭港鐵到九龍灣站只係10分鐘, B出口沿天橋淘大方向行到對面

落到地面向前行多一條街轉右就會見到「得寶商場」

入到去商場轉左見到惠康, 再向前行就見到

整個遊戲室都以木為題, 所以好易認出! 同埋門口放咗兩隻大小青蛙!

場內有一個幾大既地方俾人除鞋同等侯進場

星期一至四全日任玩只係$80, 只要戴住條手帶可以無限次入場

場內主要分做6大區：兒童攀石/ 海洋球池/ 跳躍彈床/ 攀爬樂/ 積木樂園/ 親子派對樂

場內四圍大部份都用實木木材做裝橫, 對新一代的家長們都會較為受落

最受小朋友歡迎既第一區就係「兒童攀石」同埋「海洋球池」

波波池裡既波真係好多, 係我去過咁多個場之中第一個咁多波波既波波池!

而且波波都有好多唔同顏色!

呢一條瀡滑梯都好好玩, 45度斜而且表面仲好滑, 所以瀡落嚟既時侯好刺激

但係都要注意安全, 因為好多小朋友瀡咗落去波波池之後唔識即刻走, 上面準備瀡落嚟既小朋友又唔理喺下面啱啱瀡落去既小朋友, 所以大人要好好咁睇住自己小朋友

跟住在波波池裡面有個攀石牆, 一般5歲以上小朋友都應該爬到冇難度!

不過要注意一個地方(特別係男仔) 因為好多小朋友爬上去按完鐘後, 就咁跳番落波波池度

如果咁啱下面有小朋友玩緊的話就一定會撞傷! 所以家長一定要睇住自己小朋友, 叫佢哋踩番石牆落嚟!

呀芊同哥哥玩到唔捨得走, 仲當自己喺個波波池度游緊水!

隔離就係「攀爬樂」區, 裡面有住好多唔同既設施俾小朋友玩

老闆都好細心, 呢度每一條柱都用膠墊好好咁包住(甚至有D位應該唔會撞到的都會包住), 避免小朋友撞親!

真係周圍都會見到有好多波波! 職員都好勤力咁每隔一個時間就會用網嚟裝番D波波過去池度!

喺「攀爬樂」區外面有個繩網陣! 起初芊芊都唔敢玩, 話驚會跌落去, 之後見到哥哥玩就冇咁驚

場內另一邊有一個充氣彈彈床, 成個設施好特別, 整個彈床係已經預先充氣, 同埋用咗透明物料做牆身, 等家長們可以清楚見到自己小朋友!

而且佢比起一般彈床安全得多, 因為彈力唔會太高, 小朋友容易控制彈跳力避免互撞

我哋慢慢玩到入去核心既內圍, 就係「積木樂園」區

故明思義, 就係玩砌Lego啦! 全部Lego都係屬於大型的, 同埋都係軟身唔驚會有小朋友亂掉!

仲有一個小小的火車積木區同埋兒童廚房, 呢個區域可以俾較細既小朋友玩

最邪惡就係呢個積木區既另一邊就係美食廣場, 老闆只係用咗塊玻璃隔開!

呢班小朋友「可遠觀而不可褻玩」真係好慘, 唔知有幾多家長屈服之後帶佢哋入嚟玩呢! 哈 ^.^

佢哋兩個起咗個Lego圍城圍住自己! 妹妹話呢個係佢新屋, 哈哈!

喺積木區望番過去美食廣場, 時間尚早仲未好多人!

場內最尾的位置就係「親子派對樂」區, 呢度都設有育嬰室同埋一個小洗手盆方便各位

不過洗手間就要離場上到一樓商戶用洗手間!(其實同層都有一個公共洗手間, 但好污糟好多人煲煙好臭) 記住問職員拎鎖匙!

跟住佢哋玩吓玩吓, 唔覺唔覺就玩咗兩粒鐘! 我哋準備過去隔離Food Court食嘢

我哋喺牛下新城都行咗個圈影吓相! 商場新裝橫新開張, 所以未有好多商戶進駐!

整個商場都充滿牛頭角下邨特色! 當然不及當年真風味

其實周圍環境都有少少似香港歷史博物館

最有特色係商舖既鐵閘同招牌!

仲有飛機欖, 當年連我都未出世!

我幾鍾意呢幅用象棋砌出嚟既「象」字

美食廣場唔大, 都充滿七八十年代風格, 街巿紅燈, 小販木架, 懷舊招牌等!

因為撞啱食飯時間又係假期, 所以我哋都等咗10-15分鐘先有位

呢味雜錦串燒睇落又幾正喎! (散叫架!)

呢一檔好得意, 你只需拎住個筲箕夾自己鍾意既餸

之後佢會幫你拎去煮! 再加上佢特製醬汁就食得, 咁就開開心心玩咗半日! 好滿足

Photo by CANON 5D Mark III, Len | EF 24-70mm f2.8L USM

呀劍評分: 9分

呀劍評語: 「麻雀雖小, 五臟俱全」雖然場地唔算大, 但係各樣設施特別! 賣點係波波池同埋充氣彈床, 不過特別留意假日多人時侯要好好照顧自己孩子! 牛下重現, 商場特色裝修懷舊做影相景點!

MaBaLAND 親子空間遊樂園 簡介

Mabaland Kowloon Bay 即將開幕！全新好玩又安全的兒童室內遊樂場，讓小朋友可以健體，又可以開派對，培養社交能力，透過「玩」來發展成長。
我們的理念 - 對孩子來說，遊戲不單是生活的一部份, 也是重要的事情。他們從遊戲中的經驗學習成長。但只是遊戲是不夠的，應該從真實體驗中獲得，在MABALAND，就能夠真實體驗到孩子活力，通過我們提供的設備和環境，為他們的健康成長一齊努力。

地址

九龍灣得寶花園地下TBG mall (牛下新城) T138舖

營業時間
Mon-Fri: 12:00 pm - 9:00 pm
Sat-Sun: 11:00 am - 9:00 pm

網頁
http://www.mabaland.com/

電話
3709 2004

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。

01 Dec, 21

【親子好去處】AK都有玩 Sasuke Fitness Ninja Warrior 化身忍者挑戰關卡

平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。

08 Nov, 21

【親子好去處】小白兔音樂農莊 New Bunny Wonderland 兔！全部都係兔

久違了農莊親子遊一段日子，今日終於可以再去親親大自然，而且今次都係久地重遊。

25 Aug, 21

【親子好去處】Dunk Sports Training Centre 起躍體育訓練中心全集中の訓練信心と堅持

做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。

16 Aug, 21

【親子好去處】STEM Carnival @ Cyberport 大玩編程 DJI無人機 RoboMaster 參觀智能農場餐廳

今個暑假不單只同陽光與海灘玩遊戲，有時靜靜地鍛鍊一下大腦玩玩編程都很好，今次由Ask Idea 和 DJI Education 舉辦的「ASK Idea呈獻：STEM嘉年華」就在數碼港 Cyberport 同大家一齊開心玩啦。

04 Aug, 21

【親子好去處】悅來酒店 Panda Hotel 熊貓夏祭食宿套餐扮番鄉下の旅人

又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。