親子室內

【親子好去處】鑽石山 全港首個滑步車安全城 追風學堂 Strider小車神滑步遊世界 @荷里活廣場

01 Jun, 16

今日好開心可以應Sunday KISS的邀請，參與荷里活廣場舉辦的《Strider小車神滑步遊世界》這個活動

今次活動總共分咗三大區，有「追風學堂」，「滑出彩虹」潮拍館同埋「手繪童夢坊」

「手繪童夢坊」只需要在商場內消費任何金額憑單一收據，就可以喺度設計自己戰車心愛車牌，但係記住每節最多16個人




「滑出彩虹」潮拍館係免費嘅，同平時一般展覽場景唔同，呢度係需要排隊，每一組人只可以有2分鐘在場內任何位置影相，呢個安排好特別，可以避免有人入鏡，又唔駛爭場景影相，不過問題係你要喺2分鐘內KO(當然商場職員姐姐都好手鬆嘅！)




可以披上象徵世界冠軍的「彩虹戰衣」




着得衫嚟影番張型仔單車相，我估都用咗一分鐘




跟住擾嚷咗喺呢個頭盔度，一路都戴得唔好！嘥咗D時間，哈哈！




最後扮吓冠軍先！支香檳倒轉咗喎小姐




個獎盃都有少少重㗎！見今次幾好玩又安排得好，拎番支旗仔幫呢個活動宣傳吓先




見仲有少少時間，同芊芊去個洗手間，順便影番張Top Shot！




終於入得場啦！我哋排隊一對一對親子組合入去玩啦




因為細碼頭盔冇咩得揀，外國人助教揀咗佢粉紅色頭盔俾芊芊！都幾襯你喎！




然後去揀番架愛駒先，芊芊話要揀番架佢最鍾意嘅藍色！(睇吓佢過咗今晚聽朝問佢仲係咪鍾意藍色)



開始嘅時侯大會邊等齊人邊俾小朋友自己踩！(教練都企埋一邊食番D嘢醫醫肚)


呢個芊芊小車神起步啦！START~



芊芊第一次踩呢款滑步車，未係好識掌握平衡，所以踩到好似行緊路咁！







今次嘅賽道設計都好有特色，模擬咗三大公路單車賽的比賽場地及附近著名地標




我哋先到達「法國」！嘩～巴黎鐵塔呀




跟住嚟到「意大利」！




再嚟到「西班牙」！




最後到自己主場「香港」！




前香港單車隊成員──1998年曼谷亞運落山單車銅牌得主Brian Cook及前香港單車隊代表仇多明──主理「追風學堂」，佢哋兩個一齊傳授滑步車竅門，教導小朋友如何控制滑步車及引導家如何半幫助他們而不是全幫！哈哈




望住芊芊個樣都唔知佢聽得明定唔明



Brain教我哋只要輕輕扶住小朋友的「格肋底」就可以，唔駛扶住部車！



整裝待發，教練一吹雞成班小朋友就開車啦




芊芊企最前一起步就得番佢一個喺最後，哈哈哈！




跟在後面小朋友：「你行快D得唔得！」(設計對白)

雖然芊芊行得好慢，但係佢自得其樂，從來冇介意！仲就不時同我講我快咗好多



任何時侯都慢人成個圈，所以影相唔會影到其他人



踩咗幾分鐘又番去起點，教練要教佢哋第二樣嘢啦！今次叫小朋友可以嘗試一起步將對腳微微離地，練習平衡




我又估唔到，呢個妹原來頭先真係有聽教練講嘢，佢周不時喺冇咩人嘅時侯，就會自己試吓拎起對腳學平衡！




學咗幾個Round之後，最後教練俾小朋友自由踩多一個圈就完喇！而且每個小朋友仲有一張證書㖭！教練好好，一見我同芊芊影相就自己走埋嚟一齊影(本來見佢咁忙都唔敢叫佢一齊影)

除咗張證書，大會仲送咗一罐星球大戰版嘅珍寶珠！有10支咁多，開心死佢！




一離開冇耐就嘈住要食第一支，真冇佢乎！



Photo by CANON 5D Mark III, Len | EF 24-70mm f2.8L USM

呀劍評分: 9分


呀劍評語: 滑步車對芊芊嚟講係第一次嘗試，本來都好擔心同場有年齡較大的男仔會容易撞親受傷，又估唔到D男仔飊車都幾有安全意識，有幾吓差D撞到芊芊都識得停！
總括來講幾好玩，又有證書又有珍寶珠送！正，不過有點覺得時間太短，只舉辦5日，而且每次消費HK$50(平日)／HK$100(假日)先可以玩5分鐘，唔知有幾多個小朋友因為唔夠喉扭計喊住走！

滑步車安全城 簡介
鑽石山荷里活廣場聯同由前香港單車代表創辦的Strider Early Learning Program，在6月1日至5日攜手呈獻【Strider小車神滑步遊世界@荷里活廣場】。
廣場變身成面積近5,000呎的「全港首個滑步車安全城」，模擬三大公路單車賽的比賽場地及附近著名地標，讓小車神有如穿梭於環法自行車賽、環意自行車賽及環西自行車賽的賽道，同步加入滑步車安全知識元素，讓小朋友感受安全而飆速的滑行快感，從小培訓單車騎士的道路安全意識！

日期及時間：
6月2 – 3日 (中午12時至下午3時)；6月4 – 5日(中午12時至晚上8時) 

參加辦法：
家長於6月2 – 3日憑場內消費滿HK50或於6月4 – 5日憑場內消費滿HK100之即日單一機印發票，可為孩子輪候參加一節，每節可供一名幼童借用滑行車一部於場內滑行約5分鐘，名額有限，額滿即止。

對象：2至8歲幼童 

地點：鑽石山荷里活廣場一樓明星廣場（鑽石山港鐵站C2出口）

客戶服務熱線： 2118 8811 

網址： www.plazahollywood.com

其他活動
i) 追風學堂 
日期：6月1至3日 
時間：下午4時及5時 
參加辦法：家長憑場內消費滿HK100之即日單一機印發票，於活動當日下午2時起，可為一名孩子報名參加其中一節，學習滑步車的入門知識和技巧。完成活動後可獲頒發「小小駕駛執照」榮譽証書一張，以及獲贈限量版星戰系列珍寶珠一罐 (共10支，價值HK$20)補充體力。
每節名額15個及長約40分鐘，名額有限，額滿即止。
對象：2至8歲幼童 

ii) 手繪童夢坊 
日期及時間：6月1日 (下午4時至7時)；6月2至5日 (下午1時至7時) 
參加辦法：家長憑場內即日單一機印發票 (任何金額)，可為孩子報名參加工作坊一節，親手繪製滑步車車牌，每節名額16個及長約40分鐘，完成後可將自製車牌帶走，名額有限，額滿即止。 
對象：2 – 14歲小朋友 

iii) 滑出彩虹潮拍館 
日期及時間：6月1日 (下午4時至7時)；6月2至5日 (下午1時至7時) 
參加辦法：免費進入場館拍攝一次，限時2分鐘。館內以世界三大公路單車賽區為背景，備有滑步車、頒奬台、花環、香檳、奬盃等小道具供拍攝用，另有彩虹戰衣服裝及頭盔讓小朋友試穿及體驗得奬一刻。 
對象：2至8歲幼童

(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

搜尋

標記

近期文章

文章分類

分區活動

舊文重溫

RELATED POST