親子室內

【親子好去處】落馬洲 洲頭村 傳統圍村小食工作坊＠傳統圍村文化之家

23 Jul, 16

大自然之行從來都係呀劍一家最喜歡的活動，今次仲可以喺圍村製作傳統小食就更加開心！


今個暑期重量級之旅第一炮就係去圍村玩！點解重量級～因為真係熱到抽筋

我哋在元朗西鐵站下底乘搭B1巴士往落馬洲，但係講個小貼士俾大家知，由於活動集合地點在洲頭牌坊，大家就唔好以為喺洲頭村站落車就最啱，其實要喺落馬洲轉車站(俗稱：黃巴站)落車再步行過去，大約行8分鐘就到！

仲有好緊要好緊要嘅係...大家等緊B1巴士嘅時侯，要留意到站的巴士是否停黃巴站，因為原來唔係架架都可以停黃巴站，正常情況下司機會放一塊牌在車頭玻璃顯示會停黃巴站，如果見唔到呢塊牌，就即係佢離開元朗YOHO之後下一個站就直接到洲頭村站，到時就真係喊！

所以最好都係去到B1巴士站問一問現場巴士呀叔(職員)，佢哋會好好咁解答你


落咗車之後行過呢條馬路再行多5分鐘就會到洲頭牌坊


如果自駕遊的朋友在沿路行過嚟嘅時侯就有一個小小的停車場，大家可以泊喺嗰度(但係假日都唔敢包一定有車位)


我哋見到負責人呀Mike之後，就一齊行入少少一個涼亭下休息補充一下體力


等齊人之後Mike就帶我哋入去圍村，沿途一邊講解一下圍村歷史同埋介紹植物種類



今日天氣實在太好，熱到大家都伸哂脷，不過點講都好過落雨嘅係咪～


呢個叫做番鬼荔枝，英文叫做Sugar Apple喎，個樣好唔似囉...平時喺街巿果欄都好少見到有得賣


番石榴呀！


穿過田圍後就係民居啦，唔少房屋都已經重新起過，真正保留得番原有建築嘅我諗都係得番Mike間祖屋


芊芊被太陽曬到紅都面埋...呆吓呆吓咁跟住行...其實好多人喺呢個時侯都會嗌辛苦，但係對於小朋友嚟講，係需要俾少少環境佢去體驗一下


未去到祖屋，中途遇見一個被大鐵網蓋着的水池，裡面養住幾隻大烏龜，小朋友都唔記得咗熱唔熱，停喺度好奇地觀察龜龜一舉一動！


繼續向前進發，冇幾耐就見到祖屋，就係我哋今日會製作砵仔糕的地方啦！


未入去前大家都匿喺大樹底下抖抖先



點知喺呢個時侯，呀Mike同我哋講話今日唔好彩，大屋停電....冇冷氣！不過出奇地大家都冇好驚訝嘅聲音，唔知係咪要忍住唔可以喺小朋友面前嗌辛苦呢！哈哈




首先大家就坐定定聽Mike介紹一下圍村唔同獨特風味嘅小食


最有興趣嘅係鹼水粽，呀Mike話原來坊間賣的唔係正宗鹼水，佢話人哋只係落一兩滴化學鹼水就去做個粽，原來最傳統的做法係用荔枝樹枝燒成灰，然後將灰用作過濾，把隔出嚟嘅水先拎去做粽

 但係啱啱過咗端午節，佢哋做粽又係期間限定，唯有等下年先嚟幫襯！



講解完之後就拎出碗同埋材料出嚟準備製作紅豆砵仔糕啦！


嘩真定假呀！D紅豆可以咁大粒嘅？




哥哥好似好專心咁聽緊，唔知一陣做嗰陣又會唔會雞手鴨腳


所有爸B媽Mi同埋小朋友好專心咁睇住姨姨準備做砵仔糕的漿，小朋友都話好似麥精


[video]


小朋友負責幫手倒入碗中，有D唔鍾意紅豆有D鍾意加到成碗滿哂！


雖然屋裡面冇冷氣，只係得把風扇(從外面拉拖板入屋)，但係小朋友都投入製作砵仔糕，熱唔熱一於少理




攪掂哂！


Mike預備好灶頭，小朋友逐個幫忙將柴枝掉入灶裡



姨姨幫我哋將每碗砵仔糕慢慢放進鑊中蒸


望望廚房周圍，見到有火水爐呀！我記得細個嗰陣好鍾意幫媽手倒火水入去，好香會聞上癮㗎！



當砵仔糕繼續蒸緊嘅時侯，呀Mike就帶我哋去學習打井水，途中經過以前的學校，大家都同自己小朋友講「以前學校就係咁㗎啦！你睇吓你哋依家幾幸福！」


其實只係時代唔同啫！反而我覺得以前嘅小朋友幸福D，雖然設備簡陋，但係讀書冇壓力，著重學習非考試



嚟到打井水嘅地方啦！唔知大家細個嗰陣又有冇試過打水呢？


對今天嘅小朋友嚟講，都唔知咩叫地下水，只係覺得有人倒D水入去個井度同埋諗住有得玩



Mike示範一次打井水俾大家睇，然後大人小朋友都有得試打，估唔到D小朋友都幾大力喎






到妹妹打井水啦！Mike叔俾咗個小筒佢，起初以為芊芊實唔夠力，原來佢都好大力，所以唔好睇少小朋友，要俾佢哋多D嘗試




打完一筒水上嚟又倒番落去lu...

 仲有一樣好攪笑嘅事，每當小朋友打咗一筒水上嚟之後，就會全部小朋友走過嚟洗手(其實係玩水)，其實對於小朋友嚟講，佢哋真係玩得好開心！



打完水又到下一個環節啦！Mike叔帶我哋去睇佢嘅小田園，呢度種咗好多植物


有好多唔同果實，大家估吓黑色膠袋包住嘅呢樣係咩嚟？


原來係大樹菠蘿嚟㗎，因為怕俾害蟲破壞同埋風吹雨打，所以要包住佢！





芊芊摸住D果實，覺得個質感好得意，因為果實上面有D絨毛


好啦！我哋起程番去睇吓製成品啦...全部砵仔糕出爐啦


D紅豆真係好大豆呀！


大人細路都食得好開心，同街外買嘅好唔同，雖然感覺有少少「鞋」，但係食完先覺得街外嗰D好膠好啫喱


食完再食，每人最少都可以分享到兩舊...之後小朋友食完就出去大空地度放電，大人留番喺屋度吹吹水，同埋繼續食砵仔糕，食到我飽哂！




最後當然要影番張大合照，今日天氣雖然好熱，大家都大汗叠細汗，但係短短兩個半鐘頭，大家都玩得好充實好開心


芊芊都冇哂電，係時侯要回程lu


 我哋沿路行番出去，去番洲頭牌坊出馬路轉左，行2分鐘就會見到76K巴士站出上水，就算打的都只不過$30





Photo by CANON 5D Mark III, Len | EF 24-70mm f2.8L USM

想跟我去體驗其他活動，快D報名親子團，同埋留意專頁公佈詳情啦！

呀劍評分: 9分
呀劍評語: 最傳統最原始的活動我一家就最鍾意，雖然辛苦D但係都係值得，說真的，讓小朋友捱少許苦是對他們好的！而且活動也豐富不悶場有得食有得玩....係衰在冇得拎

傳統圍村小食工作坊 簡介
製作傳統圍村小食是本工作坊最重要的一環, 目的是讓參加者透過親眼觀看, 親手製作, 親口品嚐來加深對小食的認識。
地點
新界元朗新田洲頭村

 報名時段
上午 (9:30 – 12:00) 或下午 (2:00 – 4:30)

費用
個人預約 $100位(大小同價)
團體預約 $80位(老師免費；只限NGO)

電話
9131 8116

網頁
https://waichuenculture.wordpress.com/

(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

搜尋

標記

近期文章

文章分類

分區活動

舊文重溫

RELATED POST