今日818旺角朗豪坊嘅LEGO旗艦店開張啦，一路都期待呢日嚟朝聖！不過...
食完個Lunch送埋哥哥番學，就帶住芊芊行過嚟朗豪坊睇吓。嘩！我哋搭Lift上到L11，就見到條人龍...唔駛問呀貴肯肯定條龍係排緊去LEGO旗艦店
本來排隊襯墟呢D嘢都唔太啱我，但係今日都有D時間，又見到條龍去得好似幾快，所以就企埋去Feel Feel先，最多唔對路先走咯
排咗5分鐘真係去得幾前，所以再繼續排，點知後競無力排到龍頭都差唔多用咗20分鐘，以為有得入場原來喺門口又一個蛇餅，之後發生咗場公關災難
事源有個印傭姐姐排隊，排排吓有兩個家庭走埋嚟(大家都估到咩事啦)，跟住其他朋友就開始不滿，因為大家都排咗咁耐，突然以為就到自己入場，就插多幾個人入嚟，所以就好谷氣
雖然冇明文規定唔可以叫人代排，如果幫1-2個朋友排或者朋友去咗洗手間幫手排吓，我覺得都情有可願，好似排隊買演唱會飛，唔通我又可以幫人排隊咩？但係佢又實在係過份咗少少，一個排就差唔多8個人入！
之後有位先生就特別激氣，同職員理論咗好耐，但係職員(吳先生)只係由頭到尾講同一句「我哋好理解好明白...其實都係想大家開心啫！」
那位先生就跟後面的朋友說「大家唔駛排隊啦，我識得大家，大家係我朋友」
職員(吳先生)「人哋真係家屬代表去排隊，所以就批準佢哋入場」
(傻傻地) 咁即係只限家屬／工人可以代排，朋友就唔俾？
唉...於是我就安慰那位先生「算數吧！」然後入場 (因為那家人都已經入咗場，再爭論落去都冇用)
其實錯又不在那家人，只係在安排上失當，既然知道有咁多人排隊應該要有危機感，預期有這種事發生，結果除了那位先生勇敢走出嚟爭論，其他朋友雖然感到無奈但又唔想攪大嘅件事，唯有乖乖的繼續排隊...
喺門口有一幅LEGO維港景，
仲有幾個招牌吸晴LEGO產品，有甲蟲車、波子
前少少有幅由DUPLO 積木砌成嘅LEGO牆，主題橫跨南北極，大部份係森林動物！不過全部都係唔玩得只供拍照！
發現冇得玩拎唔到出嚟嘅芊芊眼神呆滯...
另一邊有個Play Table，一個小小的DUPLO專用LEGO區，LEGO比較大，適合年紀較細小朋友！
芊芊都好快手咁完成咗佢手上嘅作品...唔知係乜
有個大LEGO工人，砌得好精緻！梗係要同佢影番張相先啦
最矚目都算係呢個超大型的旺角街景模型，由亞皆老街至山東街一帶的彌敦道、西洋菜街及砵蘭街，不過我剩係認到西洋菜街，作品係用咗8個月差唔多70萬件LEGO完成
你又認唔認得以下街景？
條彌敦道又真係造得幾似喎！
除咗幾件招牌模型展出，都有好多其他唔同款式的LEGO產品模型
芊芊都唔執輸周圍影！
呢度有個自助Minifigure Zone！大家可以$99自行配搭3款Minifigure，真係未買就先玩！
唔同表情嘅頭任你揀！
今日真係多人到...飛起！
哥哥最鍾意嘅白兵呀！
最後嚟到收銀處後的Pick-A-Brick牆，係一個自助LEGO零件區，大家可以選擇大杯$199或細杯$119，然後揀自己想要嘅零件，裝滿後蓋上杯蓋就可以去俾錢！
我哋咩都執D好似夾糖咁！如果少D人或者多D時間，就一定會慢慢執同用盡杯嘅空位，不過好多人冇咩公德，一路揀唔同嘅LEGO零件，為咗想用盡杯嘅空間放得滿滿，但係滿到跌咗落地下，攪到一地都係俾人周圍踩，感覺超混亂，好似以前去自助沙律吧咁！
最後幾經辛苦都可以去排隊俾錢喇！
臨走前都過咗另一個LEGO Play Area玩多陣！
呢幅牆都係俾大家可以任砌LEGO，不過實在太多人所以小朋友根本行唔到過去玩
因為我發現好多個Display櫃塊玻璃都有兩個圈圈喺度，所以我最後門咗店員一個問題「點解要有兩個圈喺度？」
原來係想模彷番LEGO的結構！我就覺得有D多餘...阻住人哋影相
在店內個人最鍾意嘅LEGO作品！龍貓同貓巴士
今日辛苦咗小芊陪我排咗咁耐隊，一於請佢食雪糕等佢開心吓啦！
「準備食雪榚前...」
「KO雪榚後！」
Photo by CANON 5D Mark III, Len | EF 24-70mm f2.8L USM
想跟我去體驗其他活動，快D報名親子團，同埋留意專頁公佈詳情啦！
呀劍評語: 原來關公災難真係可以令一間店跌落谷底，當然今次屬於小事一則，而且大家都係對Lego不對人，所以都唔會影響大家買Lego的心情，但係大家真係可以唔駛咁心急一窩蜂去朝聖，另外4000呎嘅旗艦店又唔係真係好大！可能有少少貪心想咩都有，但係結果行得又迫又唔自在！(當然今日人多都係其中一個原因)
LEGO旗艦店 簡介
LEGO旗艦店 簡介
香港首間LEGO Certified Store，於8月18日(星期四)，在朗豪坊正式開幕，這間LEGO專門店勁大，超過4,000呎，仲有各式各樣的Lego作品及期間限定產品！
地點
朗豪坊L12
開放時間
11:00-23:00
開放時間
11:00-23:00
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
01 Dec, 21
【親子好去處】AK都有玩 Sasuke Fitness Ninja Warrior 化身忍者挑戰關卡
平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。
25 Aug, 21
【親子好去處】Dunk Sports Training Centre 起躍體育訓練中心 全集中の訓練 信心と堅持
做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
30 Jul, 21
【親子好去處】暑假必到 Pixar 彼思動畫的科學秘密 @科學館HKSCM
上次去完 Pixar Fest，今次又來一個Pixar #彼思動畫的科學秘密，點可以錯過呀，真係今個暑假必到的好去處。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。