親子室內, 親子戶外

【親子好去處】 大澳 澳水漁風－大澳漁村生趣之旅 (足本 Full Version)

14 Aug, 16

大澳又叫「香港威尼斯」，相隔多年都未入過嚟，今日再嚟已經係一家四口，而且行程仲好充實更精采


今日十點正我哋搭23號巴入到總站，見到天氣都麻麻地...成舊黑雲喺頭頂，但係人都入咗嚟就希望盡量捱到個上晝啦！




今日係我帶隊邀請埋其他朋友仔入到大澳玩！呢個活動較早前在網上填報名表，唔需要學校團體或者非牟利結構，都可以自己組隊嚟



活動係由女青YWCA Y Eco Tour 大澳文化生態綜合資源中心舉辦，你可以選擇中心既定的活動行程或自選行程，活動有曬咸蛋／織漁網速成班／白豆粥／茶粿製作／糯米糍製作／豆腐花製作／曬咸魚工作坊／少林習武／社區探索／觀光船中華白海豚／文化生態導賞／棚屋體驗／扒沙白



工作坊及小食製作每項$40/位，另外導賞探索等活動則每項$28/位，唯獨扒沙白比較貴，要$100一位，咩叫扒沙白？我起初都唔知道，原來係俾個大耙你去泥灘度掘沙白(似蜆)，而且呢個活動係季節性，要夏天潮汐初一十五前後一兩天才合適




所以我哋冇揀到扒沙白的活動，我哋咁鍾意食嘢唔做嘢，所以揀咗糯米糍及曬咸蛋製作，同埋充滿特色嘅棚屋導賞



我哋一路向住第一個活動地點糯米糍製作嘅地點出發，沿途經過好多原居民嘅屋企，都非常簡樸，有陣時忙忙忙，都好希望過著這些簡單的生活...



轉個彎好快就嚟到景點藍色大橋







好鍾意行喺呢條街上面，俾兩邊都係攤檔包圍住嘅感覺，可以邊行邊月





呢間雜貨舖就係我哋整糯米糍嘅地方啦



糯米粉團同埋花生餡都一早準備好啦



首先老闆娘教吓我哋點做...不過其實咩都預備好哂，小朋友要做嘅就只係將花生餡放入糯米團裡面，如果可以多少少工夫俾佢哋做就好，例如搓吓糯米粉，撈吓花生餡咁！



呢度仲有好多鹹檸檬醃製品，唔係太貴$35-50就有交易





芊芊開始郁手啦，我諗佢當係泥膠咁玩！








每人可以包兩件，我同媽咪個Quota當然俾埋佢哋兩個啦！



望住芊芊雙手仔去包糯米糍真係好得意，賣相當然唔吸引啦，但係食番自己親手製作的糯米糍真係零舍好味！





呢張相影得好尷尬，因為本來朋友打算同我影張全家幅，但係當時老闆娘又過嚟幫手教我哋包糯米糍，所以就順便入埋鏡啦！但係效果都幾好呀，可以同當地原居民一齊合照



佢哋兩個食得幾滋味！我諗食完佢哋一陣間都食唔落晏晝...







呢個哥哥食完都仲未夠，仲要舔埋枱上面剩落嚟嘅花生餡俾我捉到...哈哈



今日難得帶埋芊芊同學仔都一齊嚟玩！大家都玩得好開心



但係估唔到佢同哥哥老友好多



之後我哋就向住新基橋出發，去下一個地點進行曬咸蛋活動



呢個大廣場位置我覺得好似澳門，如果要撳錢嘅朋友，呢度有HSBC ATM機，同埋都有公廁可以喺度作一個休息點



一班朋友仔邊行邊玩，真係特別開心！天氣又唔熱又落唔出雨，今日真係好舒服



齊齊嚟張大合照先！





差唔多我哋嚟到下一個活動地點啦，原來係去咗一個原居民棚屋裡面教我哋曬咸蛋





兩大枱嘅鴨蛋同竹筏放哂喺度！首先姨姨教我哋點樣敲打鴨蛋同埋拎出蛋黃





所有人一家大細就係喺這個棚屋內一齊製作曬咸蛋架啦！雖然天氣不似預期，不過至在享受過程，就算真係天氣好熱都唔會即刻曬到出嚟，其實最後姨姨都會送我哋曬乾後的咸蛋做禮物










哥哥都真係幾留心聽，如果平時番學上堂都係咁就好喇


姨姨示範完畢，到小朋友開始郁手啦！



剝蛋對粗心大意嘅哥哥嚟講，實在係一個好大嘅挑戰，而且剝完仲要拎個蛋黃出嚟又唔整爛佢，就難上加難！




估唔到第一隻就俾哥哥剝得咁靚，我真係太睇少哥哥，其實佢都可以做得好好



話口未完，哥哥第二隻就整爛咗！不過好在同頭先一樣，本來每人可以整兩隻，但係我同媽咪Quota都俾埋佢，所以佢哋可以慢慢整



將蛋黃掉落去水裡面，左手過右手，右手過左手，將蛋白除去



再加上少少鹽就大功告成！



呢度咁多隻當然唔係全部都係佢哋整㗎啦！



整咸蛋過程好玩好多！又可以順便探訪棚屋居民嘅生活


最後每人有兩個咸蛋做禮物，佢哋好直接就擺上眼晴扮咸蛋超人啦....





又真係幾似喎！



我哋呀劍萬帥親子團影番張大合照先，如果大家都想跟我周圍去，記住留意我幾時開團呀



影完張相我哋就解散自由活動搵嘢食，其實大家都可以報名中心的鄉村風味午膳，但係我略嫌太貴，所以都係同團友講不如自己搵嘢食仲開心，預期都係食咕嘍肉炒菜心，不如搵D地道小食仲好啦！






我哋搵咗間冰室入去食少少嘢，嘢食唔係話好特別，都係食三文治同雲吞麵咁，都係至在嘆吓冷氣抖一抖









食完仲霸埋人哋卡位繼續玩喺度畫畫，好在嗰陣冇咩人，如果唔係俾老闆娘趕走



其實下晝仲有一個活動就係棚屋導賞，但係仲有少少時間先集合，所以我哋都把握呢個機會周圍行欣賞吓大澳嘅風景

















好得意嘅飾物，究竟呢隻係咪真嘅雞泡魚整架呢？



番到嚟天后朝前廣場集合

佢係今日帶我哋導賞嘅榮叔，佢住喺大澳幾十年㗎啦，所以對呢度超熟悉




嚟過大澳嘅朋友一定見過呢個雪姑七友


呢對孖妹好得意呀....









佢哋兩個行行吓又會俾佢發現呢度有籠龜






榮叔特別介紹俾我哋知女青年會為大澳居民向政府申請並成功安設了呢個輪椅安放區！睇嚟應該花咗好多努力先爭取到，如果唔係都唔駛特別介紹Hahaa...








嚟到另一個大澳嘅地標－新基大橋，原來呢條橋都有段古，聽榮叔講當年係一班有心的原居民自己親手起，佢話如果等政府起的話就真係...所以大家每日放工番到嚟就夜晚拎幾個鐘出嚟幫手，真係聽到都覺得感動



聽埋榮叔講吓棚屋歷史後本來行程就完結㗎啦，但係大家嘈住希望可以去榮叔屋企望望，最後榮叔俾大家好嘈嘅熱誠打動了


打攪哂！



嘩，原來仲有用柴！(當然都見到有石油氣煮食爐有冷氣，唔係真係大家諗得咁落後)





榮叔屋企可以話係棚屋之中嘅豪宅，你睇吓仲有個咁大嘅後花園



真係風涼水冷好舒服！如果朝朝起身都可以見到個咁靚嘅山景，肯定即刻精神哂！





離開咗榮叔屋企，我哋仲約定下次入嚟再搵佢

我哋真係玩到唔捨得走，再去搵地方嘆個豆花！






大澳好多食店都係前舖後居，仲有個好靚好靚嘅露天茶座，可以喺度食住豆花飲紅荳冰，睇住一架一架嘅觀光船經過，真係無得頂呀





其實已經好飽，但係見到又忍唔住口....再嚟多個好出名嘅香妃卷











真係好好食呀，好似肉鬆蛋卷餅再加上平時我哋食粥落嗰D卜卜脆



臨走都送番樣大澳特色小禮物俾佢哋兩個，最開心係芊芊，不斷拎住嚟吹吹吹...


















下次再嚟唔知幾時lu...大澳再見！I'm be back



Photo by CANON 5D Mark III, Len | EF 24-70mm f2.8L USM

呀劍評分: 10分


呀劍評語: 始終搭車入大澳都仲係轉到你頭暈，希望政府可以開條直通路等多D人可以入嚟大澳方便 D！整個安排及活動內容也很適合小朋友，希望下次有機會再嚟，參加埋其他未玩過嘅活動！

澳水漁風－大澳漁村生趣之旅 簡介
讓更多社會大眾認識及欣賞大澳文化生態之餘，亦透過由大澳居民及商戶直接參與的活動如文化生態旅遊、示範特產製作等，為當地居民，尤其是長者、婦女及青年提供就業機會，繼續推動大澳的可持續發展。

地址
大嶼山大澳

交通
東涌乘搭 23 號巴士至總站下車 (車程約 45-50 分鐘)

電話
2985 6310 / 2985 6330

電郵
[email protected]

網頁
http://cerc.ywca.org.hk/

(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

搜尋

標記

近期文章

文章分類

分區活動

舊文重溫

RELATED POST