一直都有聽過鹽田梓這個地方，也希望找到時間可以嚟一次！今日終於可以夢想成真啦
早在兩至三個月前就已經預訂了這個鹽田梓參觀及竹筒飯製作！
起初以為暑假期間仲要係星期日，一定好難Book又或者已經Full哂，點不知都仲有位，整個八月的星期日都未有人Book，比我想像之中容易得多！
我哋Book咗船期10:00，但結果今日不幸遇上西貢消防局爆水管，攪到遲哂大到，今日係呀劍組團帶其他家庭去玩，所以都好對唔住各位！
話時話其實預備今次活動嘅時侯係要分開兩邊預約，先預約好竹筒飯DIY那邊的時間，然後再跟另一位約番船期(無特定時間，大約預計10-11:00上船，因為製作竹筒飯需要1小時多)
$45 船費＋參觀，另外切記 $150 竹筒飯DIY母須跟人頭收費，大家報名時衡量自己家庭食幾多個就報幾多個！如果一家4口只係想體驗一下的話可以報2個，另外在村公所叫些炒粉麵飯醫肚也可！
喺碼頭仲見到貓記個時間表，下次有機會都去地質公園行吓先，幾廿蚊就可以去玩一日都幾抵
船仲有幾分鐘先到，帶佢哋睇吓海鮮話俾佢哋知呢度食海鮮係最正...同埋最貴㗎！
差唔多11點15可以上船啦！起初媽咪都好驚會暈浪，不過原來架船都開得幾定喎！
不過未出發都先想走...因為今日實在太熱太熱啦，我哋大家都熱到HighHigh
不過吹吓海風都幾舒服...但係都仲係好熱呃唔到自己哈哈哈！
大概坐咗15-20分鐘度，見到鹽田梓碼頭啦
今日真係特別好天！但係我估都有35度，不過總好過落雨嘅！
落咗船梗係要影番張相！
喺碼頭太曬啦，我哋急急腳向前面行，快D搵個地方休息吓先
在碼頭望向遠處已經可以見到天主教堂，係鹽田梓嘅地標，一陣間就可以入去參觀啦！
轉彎繼續行上過樓梯級就到達我哋活動嘅地方啦！
沿途小屋嘅窗口都充滿特色，一陣話俾大家知點解會咁
上過樓梯後就到一個小茶座連士多，呢度賣好多特色飲品小食，相信今日佢哋一定賺好多，幾乎所有人都熱到一停買嘢飲，我離開時侯計過自己用咗百幾蚊買嘢飲嘢食！
茶座外放了多張枱櫈，我哋一陣就係喺度整竹筒飯啦
負責人陳先生一早預備好哂所有材料啦！仲有幾個學生哥喺度幫手，我估佢哋都係當地嘅原居民
佢哋兩個見到有隻汪汪狗，諗都唔諗就走去摸摸佢，雖然有人養都唔駛咁驚，不過佢哋真係唔怕死！可能由細到大我都帶佢哋周圍去，佢哋已經見慣不心
天氣熱成咁，我即刻買番支冰菠蘿俾佢哋，一支都$12！買完先知原來有圓形一片片嗰隻，仲要$5塊，呢支雖然大支但係好多根，所以建議大家都係買番一片片好了
一人揀咗一個竹筒，預備開始製作竹筒飯啦
陳生一連六日在巿區工作，星期日仲要番嚟幫手，真係辛苦！不過佢都話可以將傳統手作同大家分享又將鹽田梓呢個地方向其他人介紹，都係件好值得開心又有意義嘅事
好豐富嘅材料，有各式嘅菇，臘腸膶腸一定唔少得啦
最後要用錫紙包住整個竹筒放入石爐中燒
輪到大家郁手啦！我哋都開始啦...先用碗裝滿米先，因為時間關係用上普通絲苗米，如果用糯米的話相信會仲香仲好食
芊芊都裝好米啦！嘩小心倒瀉呀...
跟住要加番D水
然後就落自己鍾意嘅配料啦
我哋落咗好多好多臘腸臘肉！發揮香港人嘅怕蝕底精神放到成個竹筒滿一滿....
入爐前簽番個大名先，如果唔係就會亂哂唔知邊個打邊個
之後就拎過去隔離村公所，原來佢係一個廚房嚟！大家如果嫌竹筒飯唔夠食，大家可以再喺度Order嘢食，不過佢僅提供幾款簡單炒粉麵飯
(大家都可以留意吓村公所旁的百年老樟樹，都係其中一個影相位嚟㗎)
喺村公所對出就有個磚爐，我哋將個竹筒飯遞俾陳先生，佢幫我哋放入去磚爐度焗！
陳生話D竹筒就係佢尋日喺度新鮮斬落嚟！我反而想睇佢斬落嚟呢個過程囉，我建議佢應該活動環節可以加插埋睇佢斬竹
竹筒度就未咁快食得，起碼要等番一個幾鐘頭，呢段時間大家就可以去周圍參觀啦，不過天氣真係好熱，大家都唔係好想郁，但係一場嚟到，都唔知幾時會再嚟，點都要去睇一睇！
行前冇幾遠就係聖若瑟小堂，沿住石級行上去先見到「登波小學」已改建為鹽田梓文物陳列室
裡面放住好多古時文物，同小朋友講解一下歷史，因為對於佢哋呢一代，所有物件都會覺得幾新奇！
特別話俾佢哋聽以前呢度係一間小學，設備幾咁簡陋，話佢哋依家學校幾靚幾新，但係佢哋都唔會覺得特別幸福！哈哈
呢度每一件物件都真係代表住每一個時代！非常有價值，其實每位只要加多$20就可以有導賞服務，不過我見小朋友還小，所以只是入內參觀參觀便可以了
離開了文物陳列室，再行上幾級樓梯就係聖約瑟小堂！兩個熱到傻呼呼的小傢伙拎住叔叔派的地圖在教堂日弓
差不多百多年前一批傳教士嚟到香港西貢，無意中發現到這個不足70人的小島，就在此落地生根了，所以這裡的古老大鐘，一樹一木，所有物件都象徵了當年的故事
當我哋踏入教堂的第一件開心事，就係......有冷氣呀！嘩，終於可以喺度避吓暑
教堂後面望上去有一個好靚嘅圓型玻璃窗，圖為耶穌同聖約瑟神父的肖像，耶穌叠住神父膊頭都幾攪笑
媽咪話俾佢哋知長櫈後呢塊木板係用嚟祈禱用之後，佢哋就即刻喺度祈禱啦，唔知哥哥為自己咩事去祈禱呢？
離開咗教堂之後我哋落番樓梯，手拎住地圖繼續向前出發
沿途都係一些荒廢咗嘅修院或祖居
又見到好有特色嘅造型玻璃窗！
行行下發現原來呢度有所軍訓學校，襯機會又嚇吓哥哥，話如果佢再唔乖我就會帶佢嚟呢度番學，
呢度嘅屋都荒廢咗好耐好耐，夜晚如果仲留喺呢度都真係幾恐佈！
呢度係副主教嘅祖居，但係依家只係得番一片空地
不過都應該有重新佈置過，有個十字架同埋副教師人像放喺度！
跟住地圖再向前行就會發現另一個景點古井
原來就只係咁樣...同佢哋影張相到此一遊就算數！
我哋去到呢度就行番轉頭，因為再行出去最後的景點「玉帶橋」都比較遠，同埋冇遮冇掩一定中暑
其實沿路都有好多好靚嘅植物，不過大家都唔好亂掂，因為或者會有毒性！
好啦！開估啦，一直話點解行吓行吓會見到D靚靚玻璃窗，其實係一設計學院的Project叫鹽繪，重新將破舊嘅窗設計添上新生命！
終於番到嚟村公所見到我哋自製嘅竹筒飯出爐啦，雖然天氣咁熱，但係都好想快D熱辣辣食
真係唔係誇張，一撕開錫紙嗰陣竹筒香飄哂出嚟，再近D聞一聞真係超香呀！
佢哋兩個食咗好多，我自己都一樣！雖然有少少部份未夠熟，但係我哋都唔理得咁多，因為實在太肚餓啦！
食完之後我哋行去茶座士多睇吓D大哥哥佢哋整茶粿，原來茶粿都有咁多隻色，你哋又知唔知每一隻色係代表咩味？
其實橙色就係南瓜，紫色係蕃薯，白色係杏仁，同埋黑色就係雞屎藤！
我哋叫咗兩碗凍豆花($12/碗)同埋兩件茶粿($7/件)食(仲有豆漿，冰凍五花茶，洛神花茶等都係$20-$25一支)
兩個飲到Yummy Yummy！幾熱都即刻唔記得哂！
茶粿通常係用花生或者紅豆做餡！我自己就覺得雞屎蕂味道最吸引，勝在夠特別！
哥哥一邊望就問叔叔可唔可以落手又試吓，哈哈！可能我帶佢去得太多地方玩，以為見到咩都一定可以親手試，可惜叔叔話唔可以，因為人哋真係做生意！所以只好就咁望吓
呀劍團友全部食清光！見到咁多竹筒放喺度真係壯觀
食得飽飽之後叉足電，我哋就臨走前落一落鹽田參觀吓，本來我哋冇報名導賞團，但係咁啱有好幾個旅行團下晝入到嚟，我哋就跟住喺後尾扮團友，聽住導賞員講解鹽田，慳番幾廿蚊！哈
呢個位置就喺村公所向前行又未到小教堂樓梯前，沿住樓梯向下走就到啦！
呢度有D紀念品賣，收益都係為慈善同埋活動經費之用，其實鹽田喺百多年前就已經停止了，唔會再真係利用呢個地方製造食鹽，只係熱心村民、教會同捐款者一齊努力，重修了一個實驗性鹽田，俾人親身體驗傳統曬鹽之用！
如果真係咁曬先得嗰少少鹽，真係唔知要做幾多盆先至夠用
穿過鹽田仲有紅樹林，因為呢度都係一片濕地低窐地區，所以當小朋友見到小蟹同彈塗魚就最興奮不過！
最後我哋搭3:15船離開鹽田梓，大家吹住海風，小朋友全部冇哂電冧哂覺覺豬lu...最辛苦係所有爸媽要抱住佢哋落船番歸了(包括我>.<)
Photo by CANON 5D Mark III, Len | EF 24-70mm f2.8L USM
想跟我去體驗其他活動，快D報名親子團，同埋留意專頁公佈詳情啦！
呀劍評語: 比想像中少嘢睇！如果唔係有DIY竹筒飯，可能整個旅程都會比較沉悶，因為全部都係參觀欣賞活動為主，不過整個旅程都幾有特色，值得到此一遊！
鹽田梓 簡介
鹽田梓 簡介
香港少數充滿天主教特色的客家村落，有近三百年歷史，曾為陳姓客家人居住，全村信奉天主教，村中建有百多年歷史的教堂聖約瑟小堂，是全港保存最妥善的鄉村教堂。這所獨具特色的鄉村教堂零六年更獲得聯合國亞太區文化部頒發的“文物優異獎”。
預約電話
9642 9603 陳先生
地點
西貢鹽田梓
來往鹽田梓村街渡服務時間表
星期六、日及公眾假期：
西貢通記酒家碼頭開出：10:00；11:00；12:00；13:00；14:00；15:00
鹽田梓碼頭開出：12:20；14:20；16:20；17:20
電話
2791 6226
來回船票
$45
*註：另團體預約需要20人起計，可參加$45/位的環島遊／大自然修和之路／專題探究 或 $20/位的導賞服務
網頁
www.yimtintsai.com
竹筒飯製作
需要另外預約，$150/個；毋須以人頭計算(例：3人去製作一個竹筒飯也可)
來往鹽田梓村街渡服務時間表
星期六、日及公眾假期：
西貢通記酒家碼頭開出：10:00；11:00；12:00；13:00；14:00；15:00
鹽田梓碼頭開出：12:20；14:20；16:20；17:20
電話
2791 6226
來回船票
$45
*註：另團體預約需要20人起計，可參加$45/位的環島遊／大自然修和之路／專題探究 或 $20/位的導賞服務
網頁
www.yimtintsai.com
竹筒飯製作
需要另外預約，$150/個；毋須以人頭計算(例：3人去製作一個竹筒飯也可)
預約電話
9642 9603 陳先生
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
01 Dec, 21
【親子好去處】AK都有玩 Sasuke Fitness Ninja Warrior 化身忍者挑戰關卡
平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。
25 Aug, 21
【親子好去處】Dunk Sports Training Centre 起躍體育訓練中心 全集中の訓練 信心と堅持
做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
30 Jul, 21
【親子好去處】暑假必到 Pixar 彼思動畫的科學秘密 @科學館HKSCM
上次去完 Pixar Fest，今次又來一個Pixar #彼思動畫的科學秘密，點可以錯過呀，真係今個暑假必到的好去處。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。