【親子好去處】尖沙咀 E Cube Club 智游天地 @iSQUARE

因為哥哥要溫習測驗，今天同芊芊來個小暢遊！早前還有些E Cube Club的換票証，所以教會聚會完了就帶芊芊去iSQUARE分店玩一個下午

先嚟到丸龜食D嘢！叫了碗芊芊最鍾意嘅烏冬食，食飽飽先再上去玩盡佢

快食店始終質素麻麻哋！不過但求醫飽個肚就OK

去到5樓扶手電梯一上到嚟轉個彎就見到E Cube Club

入口旁邊有個小小濕平區！

指定動作戴上手帶除鞋放入櫃，噴過消毒潔手液就衝入場玩喇

呢個場超級多車，大又有細又有，不過全部都冇入電，所以要辛苦爸媽推住嚟行

求其影張相都影到咁多部車，大大話話有十幾廿部！

推到攰叫芊芊搵架自己踩的！

場內迷宮都幾大，分一邊係波波池，對面係充氣瀡滑梯！

門口位置則是一巨型Lego遊戲區，跟住隔離就係適合較小BB兒童玩的小型波波池同軟墊區

E Cube Club嘅特色當然唔少得呢個閃燈舞台，腳下燈泡隨住腳踩上位置會閃亮及不同時間會呈現不同形狀及效果

中途玩玩吓其他嘢都會走番去坐車(平時芊芊坐真車係會頭暈嗌救命)

去到大人細路都鍾意嘅波波池啦，呢度波波五顏六色好靚呀，再加上一條急瀡旋轉滑梯

指定動作：到我哋有一日去勻全港波波池嘅時侯，可以拎番哂咁多張相出嚟拼埋睇，估吓邊張相喺邊個波波池影嘅

始終今日少咗哥哥，芊芊自己一個玩迷宮有D冇癮

看似好危險嘅繩網陣，其實網下有網非常安全

無限重覆波波池->迷宮->繩網陣，跟到我有氣冇掟抖

如果覺得波波池個旋轉瀡滑梯太激或者驚太細小朋友會被哥哥姊姊撞親，可以選擇連接迷宮的三條垂直瀡滑梯比較安全

嗱！我都話㗎啦，毛啦啦又出番去玩車！

今日係Halloween前夕，所以場內都有唔同POPS供大家影吓靚相應節

芊芊入到嚟BB區好鍾意跳入呢個波波池，我問佢頭先嗰個大D，點解唔喺嗰邊玩！佢唔應我

但係我估到，因為私人細池點都好過喺大池同人逼

iSQUARE分店其實由今年7月起就調整咗營業時間，大家嚟之前記住上網望真D

仲記得上次氣墊球一役，芊芊大增信心！今次主動要再挑戰我，其實呢個遊戲真係幾好用嚟訓練大小肌肉，同埋小朋友嘅反應距離感！

不過呢度需要大家先付$50按金，到你交還工具時就可以原銀奉還

坐咗咁多架大車之後，就嚟到舞台旁邊揀吓D BB車嚟坐吓玩吓

其實呢度都設有儲物櫃，大家可以俾$10就有得用

反轉頭又玩充氣瀡滑梯

瀡完落嚟又可以當彈床跳

最特別俾我發現呢度有個吊環，好多間室內兒童遊戲室都未見過有，平時搭親港鐵都一定要我抱起佢去玩，呢度佢可以玩番夠本

完美落地！

仲有個小籃球架可以練吓準繩度

最後又係番嚟玩車，估唔到最後佢最常玩係呢架！你睇佢發炆憎...因為佢叫緊我快D推佢

Photo by CANON 5D Mark IV, Len | EF 24-70mm f2.8L II USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 9分

呀劍評語: 室內遊樂場去過咁多，最多車玩都算係呢個場，而且跟住商場有好多唔同食肆，所以喺度玩到攰食嘢都好方便

E Cube Club 智游天地 簡介

全港最大室內兒童遊樂場，佔地面積近八千平方呎，可以於同一時段內接待約300人。特色玩具零售區、實戰賽車預習場、可人兒體驗學府、精靈BB體適能訓練營、攀石鍛鍊區、至激動感槍炮陣、飛越賽車迷宮、華麗互動舞台、唯美公主館、疾風賽車場及中央花園

地點

九龍尖沙咀彌敦道63號 i-SQUARE，國際廣場5樓501-502號舖

營業時間
星期一至四：11:00-20:00
星期五至日及公眾假期或特別日子：11:00-21:00

入場費

星期一至五(公眾假期除外)

小童(12歲或以下) + 成人 | 日票: $140(會員$125) [額外成人 +$45]; 黃昏入場票(下午六時後): $120(會員$95) [額外成人 +$45]

特別日子(詳情參閱官方網頁)

小童(12歲或以下) + 成人 | 日票: $150(會員$135) [額外成人 +$45]; 黃昏入場票(下午六時後): $130(會員$105) [額外成人 +$45]

星期六, 日及公眾假期

小童(12歲或以下) + 成人 | 日票: $180(會員$165) [額外成人 +$45]; 黃昏入場票(下午六時後): $140(會員$125) [額外成人 +$45]

電話
2151 1306

網頁
http://www.e3club.com.hk/

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。

01 Dec, 21

【親子好去處】AK都有玩 Sasuke Fitness Ninja Warrior 化身忍者挑戰關卡

平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。

08 Nov, 21

【親子好去處】小白兔音樂農莊 New Bunny Wonderland 兔！全部都係兔

久違了農莊親子遊一段日子，今日終於可以再去親親大自然，而且今次都係久地重遊。

25 Aug, 21

【親子好去處】Dunk Sports Training Centre 起躍體育訓練中心全集中の訓練信心と堅持

做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。

16 Aug, 21

【親子好去處】STEM Carnival @ Cyberport 大玩編程 DJI無人機 RoboMaster 參觀智能農場餐廳

今個暑假不單只同陽光與海灘玩遊戲，有時靜靜地鍛鍊一下大腦玩玩編程都很好，今次由Ask Idea 和 DJI Education 舉辦的「ASK Idea呈獻：STEM嘉年華」就在數碼港 Cyberport 同大家一齊開心玩啦。

04 Aug, 21

【親子好去處】悅來酒店 Panda Hotel 熊貓夏祭食宿套餐扮番鄉下の旅人

又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。