親子室內, 親子飲食

【親子餐廳】荔枝角 大樹先生的家 親子空間 Mr.Tree @D2Place TWO

20 Oct, 16

今日係呀劍生日，我哋一家去咗台灣....最出名嘅親子空間《大樹先生的家》，終於嚟到香港啦！我哋去咗荔枝角D2Place TWO第一間分店食住玩


我哋搭港鐵幾個站就到咗荔枝角，D2出口向後行番去長順街，億利對面就係D2Place TWO



由於商場都係啱啱新開冇耐，好多商店仲喺度裝修緊！入咗門口直上扶手電梯


然後沿住呢條路行入去就會見到大樹先生㗎


我哋預約咗晚上時段18:30-21:00，職員先讓預約咗嘅朋友入場，如果walkin嚟嘅朋友，要等到有位剩先準入場！

我知道大家一路打電話都打唔通，不過真係要堅持一直連射咁打，最終係可以打得通㗎！

打通之後職員會好耐心同你約時間，佢會俾幾個最早嘅時間大家，如果咁啱撞正唔得，佢會慢慢同你約好時間，唔會趕住收線，真係值得讚！(不過可能呢個都係打唔通嘅原因^.^)


一入到場兩個就已經第一時間跳咗入波波池，呢個波波池真係好大好深，小朋友最興奮


呢個波波池叫大樹球池，原來每一粒波都係來自台灣，聽到唔係大陸貨係咪即刻玩得安心D呢？！


場外有一格格鞋櫃俾大人細路放鞋


大家要留意喎，瀡滑梯係唔俾大人玩㗎，好多大朋友可能為咗照顧小朋友安全會陪埋佢哋一齊瀡，但係其實會有一定危險㗎！



見到佢哋玩，自己都好想變番咁細個捐入去波波池裡面，可惜望吓自己已經番唔到轉頭喇



指定動作！跳入波波池影番張大特寫



自己未去過台灣嘅《大樹先生的家》，希望有機會下次到台灣可以去玩吓


在波波池裡的職員姐姐，原來唔係剩係為持秩序，仲會同所有小朋友玩，而且仲要玩到好癲㖭，可能場裡面較大個嘅係哥哥，其他都好似芊芊咁細粒，所以姐姐先有對象玩！



波波池隔離就係兒童遊戲區，有好多玩具、廚房仔、公主城堡同火車玩



芊芊見到超巿車就好開心咁推，因為佢好鍾意同我去行超巿買嘢


連廚房玩具都有好多個，唔駛驚同人爭



可能成日見住工人姐姐煮飯，所以有得玩煮飯仔芊芊超開心





喺遊戲區中間有個超大嘅樹型軟墊！上面仲有好多粒蘋果好得意





另一Corner有火車木製玩具


另一邊Corner就有好多個房屋玩具，每楝都有1-2隻公主公仔！


隔離有個0-24個月嘅遊戲區，適合2歲以下嘅朋友




小姐，你已經就嚟四歲啦！但係佢實在太鍾意打韆鞦，所以超齡都要入嚟玩一陣口




其實喺門口(即波波池對面)，仲有個沙池同埋呢部波波清潔器，平時見好多Playhouse都有聲稱自己店裡有一部，但係從來都冇見過

但係《大樹先生的家》呢度就成部機擺咗出嚟！真係家長見到都放心哂



玩咗咁耐都未開始食嘢，因為實在太多嘢玩，最後兩個係都要落埋呢個沙池玩先至得

呢個沙池用嘅沙又輕又細，全部來自台灣入口嘅頂級高爾夫球沙坑細沙，所以呢個都係《大樹先生的家》嘅另一賣點


當我一踩落去D沙度，就覺得好涼好舒服，可能你會覺得小朋友會玩到成身都係，又冇帶衫褲嚟玩，但係其實D沙好幼好滑，同埋場外有風筒提供俾大家幫小朋友吹吹身，所以都唔會太多沙，唔影響之後用餐！







兩個玩到唔捨得走(其實已經落咗單)，不過我都明白嘅！玩咗半個鐘就叫佢哋番去食嘢係唔夠喉嘅！





[video-sand]



唯一唔太方便就係店內冇洗手間，要出番店外到商場先有


差唔多7點，嘢食都送到枱面，要開飯啦！廚房好大，全開放式，可以清楚見到周圍的衛生程度，放心用餐！廚房外仲有個大風車造型不停轉動



隔離亦設有洗手盆，玩完波波池又玩完沙可以喺度洗洗手食大餐



店內空間好大，因為枱與枱之間都有一定隔離，所以大家用餐時都唔會覺得太過吵嘈



《大樹先生的家》的餐牌，食物選擇唔算話好多，而且價錢都比一般店貴(因為包埋遊戲區嘅價錢嘛)



先嚟個羅宋湯，好足料！


然後來一客雞翼拼豬仔脾！



鮮茄牛扒燴意粉，牛扒唔韌！



小食拼盤



安格斯牛肉漢堡，個賣相好吸引！個鐵藍仲有西瓜哈蜜瓜菠蘿各一片





食得幾滋味！



跟住再嚟一個全日早餐All Day Breakfast，黑松露菌好香！


最後仲有呢碟焗帶子西班牙海鮮飯口，隻帶子真心巨大！啱啱熟恰到好處



可能多客關係，反而最後先上呢個三文魚芝士沙律，好味道好清新！


最叫咗幾杯飲品，有梳打有Mocha，好好飲好好食好滿足呀！





唔講唔知道，原來呢度波波池嘅波係可以買番屋企㗎喎


去到最尾見到呢個情景都幾攪笑，就係小朋友去哂玩，大人留番喺度玩電話！呢個就係今日社會嘅情況，大家應該把握呢D時間同小朋友一齊玩享受親子時光



食飽飽再嚟過！！！！













本來仲帶咗個蛋糕嚟，點知飽到食唔落，最後只係同蛋糕影番副相就帶番屋企






Photo by CANON 5D Mark III, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！
呀劍評分: 10分


呀劍評語: 台灣最紅的親子餐廳大樹先生，有得食有得玩，不過一節兩個半鐘頭確係唔夠喉，最靚嘅係全藍色嘅波波池，而且夠深真係好玩！

《大樹先生的家親子空間》 簡介
堪稱台灣No.1、最具人氣的親子餐廳「大樹先生的家」，終於在香港開設首間分店了！超過6千呎的餐廳，除了用餐地方，亦劃分了多個為不同年齡、喜好的兒童特設的遊戲區，部分設施更是從台灣直送，餐廳亦非常注重清潔衛生，務求讓家長小孩玩得安心。

地址
香港荔枝角長順街15號D2Place TWO 1/F

交通
港鐵：荔枝角港鐵站D2出口，步行時間約3~5分鐘。

營業時間
9:30-12:00 早餐場
12:30-15:00 午餐場
15:30-18:00 下午茶場
18:30-21:00 晚餐場
6歲以上用餐最低消費：$120
6歲以下清潔費：平日$59；假日$79 
*超過6歲以上小朋友不可進遊戲區


預約電話
3184 0033

(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

搜尋

標記

近期文章

文章分類

分區活動

舊文重溫

RELATED POST