仲記得眼鏡聰明豆、流水式汽水櫃、收銀吊筒嗎？一樣一樣記憶猶新...想當年......今日有幸認識Patrick同埋Kinson，喺美樂士多可以同小朋友一齊集體回憶
由荔枝角港鐵站B出口行大約8-10分鐘就到百美工廠大廈，上到嚟12樓打開𨋢門就見到懷舊味重嘅門面
其實美樂雜貨店一直都在，地方有一半都用作寫字樓，只是最近擴充單位內地方，新增這個「美樂士多」，老闆Patrick當然係士多愛好者，一直都有收集各式各樣老士多珍藏品，所以完了這個夢，將自己珍藏供諸同好
60's-70's 玩具有幾多件你曾經玩過，又有幾多件今日仲同緊個仔玩？話時話點解以前象棋個名叫「美術象棋」？同埋係用隻飛馬做盒面？陸戰棋大家又有冇玩過？
舊式扭蛋機，有冇人俾佢食過錢，然後要搵士多老闆出嚟拍拍部機
仲記得呢隻日本牌字電芯嗎？金X王、勁X都要行埋一邊
呢幾個懷舊掛牆鐘今時今日擺番出嚟一D都唔老土呀
今日大家部電視都去到超薄超大，以前膽機又有幾多人用過？仲記得以前開電話係用扭掣
嘩老闆！Mac Classic你都有，我真係甘拜下風...
任天堂枱機都有，全由日本空運到港！實在係Patrick嘅心頭好
呢張上海飛髮舖櫈真係坐得好舒服，仲記得以前呀爸帶我去飛髮嗰陣，老細拎住把剃鬚刀同我刮「的水」，痛到我每次飛髮都好驚！
十大武器之一摺櫈，呢幾款今日都越嚟越少見
老闆都係同我一樣係個好爸爸嚟㗎！
你嘅第一部日立雙門雪櫃幾時擁有呢？仲有呢部舊衣車唔知仲用唔用得呢？
特別要介紹呢部舊式磅重機，以前最常見都係喺戲院，不過多數都係紅色
每次磅重5蚊雞，老闆仲自製咗5款體重咭，每一款都可以在店內購物滿$50有回贈價值$1-5不等
講到士多，大家隨口噏又可以諗得起幾多樣嘢呢？
拜年必備：吉百利、麥提莎、瑞士糖...
以前這些蓋掩換贈飲，大家仲記唔記得？
還記得這些大抽獎嗎？
公仔紙有幾多人識玩呢？
可樂搖搖呀！想當年周街搵地上蓋掩，睇吓會唔會有人中獎唔知亂咁掉！我仲記得我換到金色同銀色可樂搖搖超興奮
呢個收銀吊筒真係無得頂，仲記得以前細個都唔明點解要將佢放到咁高，又要掛個鈴鈴喺度，依家先知點解！講個秘密俾大家知，筒裡面真係有錢㗎，老闆真係用佢嚟收錢㗎！
可樂味粉糖！鎖匙聰明豆！煙斗朱古力！問你死未...
仲有一款係眼鏡造型的，不過老闆話暫時未有貨
好開心你哋兩個可以同我一齊分享呀爸的童年時代
老闆Patrick於較早前聖誕都有推出期間限定，有自家製品牌產品
冰凍汽水櫃今日在香港勉強仲可以見得到，不過流水式的汽水櫃就真係買少見少
好似Patrick咁講，細個嘅時侯我都係成日打開個櫃門，乘機玩冰水多過真係要買汽水！
哥哥拎住嗰支係古董百事可樂嚟㗎！小心小心...跌一支少一支
最後壓軸出場當然唔少得舊時士多側邊的街機啦
呢兩部咁架勢嘅電玩真係由日本空運到港㗎！而且佢裡面原來真係一個膽機嚟㗎咋...
兩個已經入咗虛擬世界唔得閒理我...
「蕉...蕉...蕉...」你有冇見過「太空侵略者」呀？我見過，我真係見過，仲玩過㖭！
呀妹好鍾意玩PACMAN食鬼，其實都真係幾難玩㗎，我成日都避唔開幾隻鬼追殺我一個
感覺佢哋就好似時光倒流去番我童年時代，如果真係可以的話，唔知我的童年可唔可以同佢哋做到好朋友呢？哈哈
Photo by CANON 5D Mark IV, Len | EF 24-70mm f2.8L II USM
想跟我去體驗其他活動，快D報名親子團，同埋留意專頁公佈詳情啦！
呀劍評分: 10分
呀劍評語: 走進店內就好似返番去細個嘅時侯，重拾當年所有回憶！我即刻有D衝動想返去細個樓下個士多望吓，唔知仲喺唔喺度呢？
地址
美樂士多 簡介
舊式士多有大家很回味的人情味大家總會想起小時候在士多的不同快樂事情汽水零食小玩具等等美樂士多仿似是一間70年代士多再重現在今天的都市裏延續那種情懷。
開放時間
星期一至日 12:00 - 7:30PM
電話
2959 1327 / 9223 8538
2959 1327 / 9223 8538
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
01 Dec, 21
【親子好去處】AK都有玩 Sasuke Fitness Ninja Warrior 化身忍者挑戰關卡
平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。
25 Aug, 21
【親子好去處】Dunk Sports Training Centre 起躍體育訓練中心 全集中の訓練 信心と堅持
做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
30 Jul, 21
【親子好去處】暑假必到 Pixar 彼思動畫的科學秘密 @科學館HKSCM
上次去完 Pixar Fest，今次又來一個Pixar #彼思動畫的科學秘密，點可以錯過呀，真係今個暑假必到的好去處。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。