親子室內

【澳門親子遊】Planet J 冒險王國 真人RPG 全新體驗

11 Feb, 17

細個打機玩RPG玩得多,估唔到今日喺澳門這冒險王國,可以玩人肉RPG! 仲要Cosplay上身,超型呀! 我哋要去打惡龍奪寶石啦...!


我哋食過早餐後就嚟到金沙城中心金沙廣場3樓,一去到門口就野生捕獲冒險王國其中一個角色「雙子精靈公主」


然後魔法師哥哥出嚟帶我哋進入王國啦!




一入到售票處已經俾周圍嘅裝潢吸睛,地下呢個馬賽克砌成的「冒險王國」招牌真係好靚!





魔法師繼續帶佢哋兩個進場,未開始我都已經超覺得依家好似打緊機咁



呢度入場以人頭計算,每位$150。另外要租用一個本「
導卷」每小時$150,需要開始前在這裡選定遊戲玩法。
玩法分兩種:
1) 故事Mode:有劇情設定,跟據故事發展的每個指令去完成每一項任務+打大佬過關斬將
2) 遊戲Mode:直接選擇個別任務去玩
(文末會分釋兩種玩法的好處)



媽咪在登記領取「
導卷」時,魔法師先同佢哋兩個了解冒險王國的故事




登記完成,手上拎到「導卷」我哋嘅打機旅程將要開始啦!





仲記得細個每次打RPG嘅時侯,故事開始的場景多數都係會喺皇宮開始


剩係呢個開場佈景裝置已經「O」哂咀,真係好靚好認真!你話有乜可能唔當自己入咗遊戲世界裡面。


「幸福銅像」通常打機臨瞓前Save低第晚再玩嘅時侯,一開始就會係皇宮前嘅銅像位置或者係花園之類的場景發生,哈哈~


不過真係開始任務之先,一定唔少得嘅就係Cosplay打扮一下成為遊戲人物,呢度有好多唔同嘅服飾同武器任你揀,想扮戰士又得,扮魔法師又得!


頭盔武器樣樣有!




呀妹扮「魔石寶寶」,仲係「冒險王國」嘅主角,佢要帶領「冒險使者」去完成任務




我哋出發啦!



我同媽咪當然都要上場揀番個角色扮吓先得啦~(但係點解我覺得自己好似個魔術師咁)



兩個開始拎住「導卷」由第一關開始照住指令去完成任務



我估個故事大概係講王國的寶石被壞人搶奪然後仲落咗魔咒,要解取魔咒方法就係要集齊寶石同埋要打敗奸角先可以令王國回復從前面貌(一定係咁除非唔係)



場內嘅佈景全部都製作認真,仲有不同主題!





魔法師心想「佢哋兩個都係睇唔掂㗎啦,等我出馬幫吓佢哋兩個啦」





跟據指令每去到一個地方,先將「導卷」放進讀取器上,然後會有進一步嘅指引!





佢哋第一個任務就係要嚟「礦石村」搵「藍色礦石」





搵到之後將「導卷」放在上面Do一Do就攪掂,之後再繼續睇有咩任務...







任務有好多唔同變化,有時要去搵嘢,有時要玩小遊戲,當完成每一關指定任務之後就要去打大佬!點打呀...

















對於呀芊嚟講又未識好多字,反應又冇咁快,只可以一路跟住哥哥去做任務,拎住支鎗周圍射,同魔法師哥哥一路玩「澎澎澎」(不過都有D小任務係幾啱芊芊玩)






完成幾項任務之後就去打大佬啦,超正呀!全部係體感電玩,就咁徒手就可以當係把劍斬妖魔鬼怪,不過大家記住一定要企喺個魔法陣裡面,如果唔係就會連接唔到訊號





左手係盾右手係劍,超好玩!可惜我只可以企喺側邊睇>.<



每關大佬都有唔同打法,同平時玩RPG一樣,會一路升Level學會不同絕招



「成功」連哥哥打贏咗自己都好有滿足感(大家請放心,係唔會輸嘅,一定會俾你過到關)



話咁快第二關又開始啦!今次芊芊拎起「導卷」開始睇吓第一個任務要做咩


原來要去搵一包「南瓜能量種籽」,佢哋知道地點後,一去到就喺門口發現種籽,真係冇嘢難到佢哋!




之後再去到巨型大南瓜跟指令順序按動南瓜上甲蟲完成任務,呢個遊戲芊芊就可以一手包辦!







另外一個任務要去搵「火焰手套」,今次就搵得耐咗少少,因為場館實在太大,去到另外一邊比較陌生的地方



終於都搵到啦!


去到「踏踏火山」任務係要隨地上六角形燈亮起跳在其上


佢哋兩個玩玩吓由起初踩燈變咗互踩對方!哈哈~











話咁快我哋又嚟到打大佬嘅時侯,今次叫魔石寶寶對付敵人,哈哈~


不過佢左右不分,幾時左手幾時右手都唔知,不過好在打大佬勝在一定會贏,劇情一定要發展落去!哈~





見到呢個對打場面係咪以為係遊戲嘅一部份呢?點解會突然同騎士打起上嚟?其實只係剛完成故事Mode,將要開始下一節的任務遊戲Mode,所以有個厠所位,兩個就玩起上嚟!



哥哥仲要成日想除咗騎士個面具


其實真係講都講唔完,場館大到不得了,好多唔同主題嘅房間,全部都整得好靚












完成咗故事Mode遊戲後,我哋出去Reception重新設定,今次改玩小遊戲Mode,因為故事Mode總共有7關,如果要一次過玩哂7關打爆機睇怕要玩成日兼唔食飯先得,不過大家可以放心,因為同打機RPG一樣,可以儲存起,到下次再嚟可以讀取記錄延續故事劇情繼續玩。

至於小遊戲Mode係咩嚟㗎?其實就係可以Skip咗故事劇情發展,直接去玩小任務!因為所有任務加埋上嚟有成200個,所以設定遊戲Mode去玩可以玩多好多小遊戲。

























玩玩吓嚟到呢個房間,發現有好多魔石寶寶,佢哋好開心呀,仲即刻捉住佢哋嚟影相!











嚟影張有型相先!OK,兩個都擺個姿勢遮番住自己!



其實喺呢度唔單止玩,周圍都係影相位!甚至有D裝置係會識郁,當你完成任務又會噴煙又會升高升低好利害!
 










其中一個我好鍾意嘅任務「礦物熔爐」,每完成一關寶石就會進一步被提煉,每關小遊戲都好簡單,芊芊都可以玩到!







佢哋兩個真係玩到唔捨得走,但係陪佢哋一齊玩嘅魔法師、騎士同埋女僕都已經謝哂,最後仲有真‧魔石寶寶出嚟同佢哋影相,開心到不得了,差D想帶埋佢番屋企(但係屋企放唔落魔石寶寶囉)




在冒險王國隔離都設有精品店,頭先見到嘅「橙皮兔」、「魔石寶寶」全部都可以買番屋企





「橙皮兔」就最鍾意飲橙汁,「魔石寶寶」最鍾意食薯片!





好多隻呀好多隻呀,真係好想全部帶哂番屋企



嘩!超大隻「橙皮兔」呀,仲大隻過芊芊呀




下次嚟澳門一定要Continue我個Save Record打爆機!




Photo by CANON 5D Mark IV, Len | EF 24-70mm f2.8L II USM


想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2

呀劍評分: 10分


呀劍評語: 如果第一次嚟我建議可以玩「Story Mode」,因為跟住一個一個任務咁玩,自己真係好似入咗隻Game裡面玩緊RPG咁,過關打大佬!當然玩嘅小遊戲唔夠「任務小遊戲Mode」咁直接玩得咁多。今次旅程好開心,亦完全超出我想像之中大,真係要行勻哂整個館至少要15-20分鐘。信我!絕對無介紹錯,真係好值得一家大細嚟玩。

Planet J Macau 冒險王國 簡介
全球首個「實況角色扮演」主題樂園 - Planet J冒險王國,開創業界先河,為玩家帶來更高主導性的遊戲體驗,開展互動家庭娛樂的新時代,為家庭及大小朋友提供最佳遊樂體驗!


地址
澳門路氹金光大道金沙城中心金沙廣場三樓

營業時間
星期一至五: 上午 11 時至晚上 8 時(最後入場時間為晚上 7 時) 
星期六及公眾假期: 上午 10 時至晚上 9 時(最後入場時間為晚上 8 時) 
星期日︰上午 10 時至晚上 8 時(最後入場時間為晚上 7 時)


入場費
$150 / 位 (全日) 
魔導卷 (租用遊戲裝置) $150 / 部 (60分鐘)

票務詳情

- 門票可於樂園售票處購買,或經由網上售票系統預訂門票。
- 3歲或以下小童需要一名購票成人(18歲或以上)陪同方可免費入園。

- 8歲以下小童需由至少一位購票成人(18歲或以上)陪同方可使用魔導卷電子裝置。


想親身體驗一次冒險之旅,別忘記隨身配備「魔導卷」電子裝置,有了「魔導卷」的引領,才可以將你們連接園內超過200個精彩遊戲,引領你們在冒險旅程中穿梭各個神秘區域。


每本「魔導卷」會接收不同任務,引領你們到各個區域闖關;如果同行的冒險使者另加一本「魔導卷」,便會體驗不同路線。若果你想與同伴一起進行冒險旅程,選擇一本「魔導卷」便最適合。


網址
www.planetj.com

查詢電話
+853 8791 6000


(以上資料更新至文章當日)





搜尋

文章分類

RELATED POST