親子室內

【親子好去處】香港玩具傳奇 @香港歷史博物館

05 Mar, 17

今次全宇宙都洗版嘅盛事，香港歷史博物館香港玩具傳奇，真係諗唔到有咩理由唔去，只係冇諗過要第一個假日去啫！真係多人到好似行花巿咁


早一個星期前已經在網上勁洗版，全條樓梯都係白兵，攪到大家個標題都係「白兵，全部都係白兵」，當然就唔係只係白兵咁簡單啦！




今日得我同芊芊兩個去朝聖，明知星期日係開幕第一個假日，一定逼爆！但係我哋呢D在職爸爸冇得揀，所以我都好醒目11:00多DD就去到場館，先喺樓梯同白兵影吓相(因為我知道再遲少少，可能到時連白兵都見唔到)


原來所有白兵心口都有個掣可以撳，仲有聲出!







試吓去到後面另一個角度影吓先，呀芊扮白兵企到直一直好攪笑




我哋快快手影多幾張相，就去排隊買飛，呢個時侯買全年通行證嘅朋友就係王道啦，佢哋可以即時就咁兩手FingFing入場！不過我哋都早，所以排2轉蛇餅大約10分鐘唔駛就可以買到飛入場啦～



大人$10，小童只係$5，真係抵到爛！大算去到在5月就完嗰陣同媽咪哥哥再嚟多次！(一張飛仲可以去埋香港故事館)



喺時間緊逼又多人嘅時侯，究竟應該睇咩先係最好呢？等我教吓大家點行最精明啦！



首先入到場，先俾飛工作人員同埋領取小小禮品玩具車一架，揀就冇得揀㗎啦，不過見到有人見到呀寶貝唔鍾意，要求換過另一架車車，你如果真心唔鍾意又唔怕瘀就試吓同工作人員講聲啦！但係我覺得都係順其自然，欣然接受安排，等小朋友學習下都好


起初呀芊見到兩架車，呀哥唔喺度就梗係揀咗架自己鍾意嘅先啦，另一架成隻蜘蛛咁好怪雞，我預計呀哥收到一定又嘈話唔鍾意，我即刻駛出我浮誇嘅演技話呢架車車係Spiderman嘅座架，呀芊咁鍾意Spiderman梗係即刻放低手上嗰架靚車，搶番架蜘蛛車啦(其實Spiderman仲駛乜揸車呀)




當你入到場見到人山人海場面心情已經好混亂，心裡面一定有好多疑問，呢個時侯應該去邊度玩先好？唔知行咗過去有冇得番轉頭？離場後有冇得入番去？

其實都可以慢慢嚟！我先同芊芊去哂廁所飲啖水，然後慢慢行慢慢睇，我哋冇停留喺玩具遊戲區內，第一時間去咗另一邊睇變型金剛Ironman同黃色小鴨


由橋上望落去地下見到好多好多黃色小鴨呀



過咗條橋先見到高達，原來就得一隻咁多，之後上一層係變型金剛，落地下就有Ironman、美國隊長、忍者龜同黃色小鴨，我哋原本想落咗去先，但係等架架向下升降機都爆滿，所以我哋先上上層睇變型金剛。




誰不知又係得一隻咁大把...呢個區域扶手電梯只有向上冇向下，想落番下一層一定要搭升降機，或者你可以通番去香港故事館度落一層(仲煩)，不過等升降機其實都唔會太耐，因為有好多人冇咩耐性，同埋其他入場嘅朋友都會同你一樣咁中伏有上冇落，所以升降機都好快有位落番去地下


影完幾個大人物之後就行出去庭園草地搵黃色小鴨影相，點知行出一步踩落草地就即刻有保安姨姨警告唔準行入呢個範圍，因為話說好多人行入去，特別係小朋友鍾意手拎起D鴨仔玩，攪到設計師要日日落場排番好D鴨仔(不過其實都好難怪...)但係就難為了保安姨姨，大大聲咁嗌，幾乎每個人都會唔覺意踩咗入去












所以如果想正面同黃色群鴨影相，就要好似我咁排完隊叫芊芊留喺大鴨身邊，我就跑番出嚟正面影過去先影到呢個角度





快快咁行過呢3層之後，我哋先行番入去遊戲區玩咗陣，雖然係勁多人，但係好多父母同仔女都係到此一遊咁玩，每樣嘢玩兩玩就叫佢哋去試玩另一樣，所以都好快就有空檔插入去玩。至於影相就難避開人入鏡，唯有真係要夠眼明手快，要喺半秒間有人離開鏡頭又要叫小朋友望住鏡頭仲要唔手震咁影，不過好在呢方面我好有經驗！













之後我哋就行入去展覽區(只要手持入場飛就可以隨時番去遊戲區或者庭園那邊)，呢度全部嘅玩具由三十年代起，真係老過你呀爺！全部只可以睇唔可以玩，同埋只可以影相，唔俾拍片！(不過我都見到有人唔守規矩...😠)


相信大家都係嚟集體回憶之餘，又帶小朋友嚟睇吓自己以前細個玩嘅玩具係點。聽到最多人邊睇邊講嘅說話係「我有呢個呀！」「我細個都有呀！」「到依家我仲Keep住架！」真係好有共鳴







仲記得小學雞嗰陣日日都會同同學鬥劍仔，特登將D劍拗彎佢然後可以叠住其他劍仔贏佢番嚟，依家諗番轉頭原來以前細個已經識得屈機



呢度舊式玩具真係多過哂樂富同油麻地個玩具博物館!



























展覽中會有D短片播放五六十年代工廠式製造玩具的過程





呢個槍陣居然發現一支近代最新款的















去到女仔專屬玩具區Barbie啦!



有D如果夜晚放喺大廳都幾恐怖架....



















其實展覽區都有D小屏幕，可以睇到每件玩具的資料介紹







每個人都必定玩過這玩意兒!















































你有過邊幾部?











最後睇埋近代玩具Figure公仔後，我哋就離開展覽廳，一出去就係剛才排隊見到的Thomas小火車影相位，大家可以離開前喺度影埋靚相！仲有力嘅可以番去香港故事館行個圈都仲得(我哋經過發現幾乎冇人，想感受包場參觀影靚相可以襯玩具傳奇呢個展覽期間2/3 – 15/5/2017)












Photo by CANON 5D Mark III, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

呀劍評分: 10分
呀劍評語: 真係一次過經歷幾個年代，好似走進時光隧道，好多集體回憶! 同自己小朋友一齊嚟重溫這些回憶特別有意思，遲D等哥哥考試後必定再來!

香港玩具傳奇 簡介
香港這個彈丸之地，曾經是全球最大的玩具出口地，這裏生產的玩具質優價廉，吸引國際品牌來港尋找工廠從事生產；亦有本地廠商憑藉無比實力建立品牌，產品進佔海外市場，將香港玩具帶到世界的殿堂。這個地方原本名不經傳，產地標記寫着「香港製造」的玩具甚至會被退回，不過隨着香港玩具逐漸建立信譽，「香港製造」反而變成質素的保證。

 當香港為世界各地的孩子生產玩具，本地孩子接觸的玩具則來自世界各地。這裏有完全開放的市場，玩具各式各樣，不同門類的玩具在此留下了歷史軌跡，是完整展現玩具製造及潮流嬗變的絕佳舞台。透過觀察這些玩具，你會發現很多玩具縱然經歷歲月洗禮，基本意念卻是歷久常新，繼續以屬於這個年代的方式為孩子帶來歡樂。 

 正因如此，香港歷史博物館與香港玩具協會及香港玩具廠商會聯合籌辦這次展覽，透過展示約二千件（組）香港人熟悉或香港製造的玩具，探索不同玩具近百年的轉變，以及本地工業家如何以敏銳的觸覺，將香港打造成為玩具王國。展覽亦會探討動漫及影視等娛樂產業如何影響玩具潮流及生產，以及香港在此扮演的角色。此外，展覽同時闡釋玩具除了玩樂以外的功能，以及玩具如何適應時代的變遷。展覽場地還設有玩樂區，讓孩子玩得忘形之餘，亦可思考玩具的意義。 

 公眾導賞服務將於3月6日起提供，全程約1小時，每團名額30人，先到先得。

地址
香港九龍尖沙咀漆咸道南100號（香港科學館側）

 入場費
逢星期一、三至日
標準票價：港幣10元
優惠票價(適合於全日制學生、殘疾人士(及一名同行照料者)及60歲或以上高齡人士)：港幣5元團體票價(20人或以上購標準票者)：港幣7元
博物館通行證持有人免費

 香港玩具傳奇展覽期
2017年3月2日至5月15日

公眾導賞服務時間表
http://bit.ly/2mznfSa
電話
2724 9042

網址
http://hk.history.museum


(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk


搜尋

標記

近期文章

文章分類

分區活動

舊文重溫

RELATED POST