究竟仲有咩交通工具未用嚟做主題餐廳!? 哈哈~ 一個以十四座位紅Van做主題的茶記，充滿50-60s年代的特色! 大人細路+公公婆婆都食得好開心!
超懷舊特色的門面，好似太平館等舊式餐室的裝潢
相信老闆為咗裝潢都花咗唔少心思，睇番資料先知原來喜喜冰室由前址位於加寧街店搬到現在百德新街的新址
冰室內左手邊已經見到十四座小巴造型的卡位啦!
冰室內有這一排單邊座位，如果小朋友喺出邊玩，大人可以坐這邊看着出邊情況
一放低所有嘢喺座位上便急急腳同小朋友出嚟玩玩
落雨都唔怕濕淋林，可以將把傘放在這裏。
在冰室門外旁邊已經有架很特別的兒童步行汽車，芊芊坐入去啱啱好，哥哥就...
仲有懷舊汽水冰櫃，上次喺美樂士多都有介紹過!
嘩! 連康樂棋都有得玩，不過呢個唔知係新款定舊款，唔係我細個玩開嗰隻，枱腳要自己攞平衡先企得水平，仲有棋係紅白綠子!
開波啦!
妹妹未夠高，打起枱波上嚟姿勢好攪笑!
雖然呢個張波枱實在好吸引! 但係攪到佢哋唔捨得入去食嘢，哈哈哈~
(大人舒舒服服喺入面開餐)
「歡迎扣殺，謝絕喧嘩」好句好句
仲有「飯後抽幾板，返工無撞板」，如果我老細都係咁諗就好喇!
呢個芊芊玩唔停，打完枱波再去篤...康樂棋!
冰室裡這個十四座小巴造型真係好靚! 不過大家一定要帶住WideWide地既鏡嚟影，如果唔係就有機會影唔到上面個假天花啦!
我估全部都係老細私人珍藏，有D舊到呢我都未出世!
呢度除咗小巴係主角之外，都有其他懷舊集體回憶場景，轉個頭見到隔離有個中學Science Room
真係咩都番哂嚟，仲記得以前同同學一齊劏牛眼同埋玩「賓伸Burner」!
以前學校用的Locker...成件事好「那些年」呀!
「唔係嘛，廁所都影」因為廁所入口附近都有好多特別裝飾值得介紹
撥輪式電話，以前老豆覆機必用!
仲有幾個保齡球比賽獎牌，似乎係真架喎!
廁所裡面仲播住保齡球場的環境聲
放在收銀處呢幾隻紅豬隻，當年細個時我都有一隻，當時啤出嚟完整紅色塑膠豬，仲要在外上色，所以每隻都係獨一無二!
另外一系列更加懷舊的卡式錄音帶，同埋呢座巨大卡式錄音機，當年人人去沙灘都好似枱米咁枱住一大部卡式錄音機係膊頭Funk機!
這個鐘由舊店搬到嚟新店!
舊式啫喱及蛋糕雪櫃
冰室另一側有間8-10人房，你如果想坐呢間房就搵番咁上下朋友一齊嚟食先至得啦
估唔到老細都會有爛GAG
舊式吊扇
用咗差唔多一半篇幅去講裝潢同設施....真係自己都覺得有D誇張
講咗咁耐終於講到嘢食! 如果唔講真係以為一直介紹緊博物館
就連餐牌都設計得好有心思，連呀刨叔都要走出嚟介紹呢個花膠撈丁，一於叫呢個！
設計得好似以前小時侯的習作簿!
我哋點咗好幾款食物，但係值得介紹一下這個雞批浮台，由經驗老到師傅做的雞批，浸在整碗由青豆、洋葱及薯仔煲成的湯，食落唔乾身又夠熱辣辣。
起初以為味道怪怪，點知食落原來又幾夾喎! 因為雞批偏鹹，當佢夾埋淡淡地的綠豆湯又幾好食
黑白多士賣相吸引，味道亦係預計之內!
食公仔麵可以有幾豪，配住花膠咁食你又試過未!
呢個芊芊專登食到成口黑媽媽污卒卒
哥哥食菠蘿焗豬扒飯都幾好食架!
錦鹵雲吞，小朋友見到脆卜卜就最開心
雖然我今日唔係坐呢個小巴卡位食嘢，但係冰室都好歡迎我哋隨便影相
嘩！飯後甜品 - 雪糕啫喱！真係感覺好懷舊
走到冰室外有個大燈箱招牌，點可以唔同佢打張卡呀！睇吓燈箱海報上的舊招牌，大家又去過幾多個？碧麗宮戲院？大丸？松坂屋？
如果有朋友要出嚟抖抖氣，都可以坐喺外面呢度吹吹水
大家一於放假過嚟同小朋友一齊懷一懷個舊！
Photo by CANON 5D Mark IV, Len | EF 24-70mm f/2.8L USM
呀劍評語: 冰室裝潢已經贏哂！加上食物質素味道都OK，價錢中尚唔算貴，剩係嚟食完影相呃Like都抵番哂！
營業時間
星期一至日:08:00-23:00
地點
銅鑼灣Fashion Walk百德新街57號地下C&D號舖
電話
2868 0363
星期一至日:08:00-23:00
地點
銅鑼灣Fashion Walk百德新街57號地下C&D號舖
電話
2868 0363
(以上資料更新至文章當日)
Facebook專頁: 呀劍萬帥 kimfamilytravel
Blog網誌 : kimfamilytravel.blogspot.hk
RELATED POST
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
26 Nov, 20
【親子好去處】Park Hotel 百樂酒店 「飲飽食醉悠哉」住宿計劃
哥哥同芊芊啱啱考完試，一於帶佢哋去酒店玩番轉，今次我哋揀咗尖沙咀的百樂酒店，點解？好簡單，因為真係超抵住抵玩。
31 Dec, 19
【親子好去處】悅來酒店 Panda Hotel 『大帽』險遊山食宿計劃
少林功夫＋足球就聽過，估唔到酒店住宿＋行山都有得諗，今次參加了悅來酒店 Panda Hotel 『大帽』險遊山食宿計劃，食完嘆完第朝早再去行山身心舒暢～今次悅來酒店特別推 【『大帽』險 遊山食宿計劃】，我哋選擇先入住，第朝食過早餐先去行山，大家可以自由選擇行山的時段。
26 Nov, 19
【親子食記】纜車主題茶餐廳 金牌老香港
究竟仲有咩交通工具未做主題餐廳呢？哈哈，位於山頂廣場內的金牌老香港，正係用上山頂纜車為主題的餐廳，唔止好睇，仲好好食～上得山頂就預咗會貴，不過唔知係因為平時食嘢貴咗，定係佢真係真平，我哋四個人食個Lunch都只係用咗二百幾蚊。
25 Nov, 19
【親子好去處】九龍酒店 玩轉海陸空 探索香港住宿計劃 The Kowloon Hotel
一次過玩盡海陸空的住宿體驗，新鮮感極高，玩過癲過仲可以番酒店嘆大餐，一家人入住真係超滿足。