最近頻頻有機會做飛車黨，各大商場都有小賽道俾小朋友一嘗做小車手心願！今次到數碼港The Arcade小車手嘉年華，除咗慶祝復活蛋有得玩掘蛋遊戲之外，仲有得參加小車手計時賽，而且仲有超多懷舊攤位遊戲同其他活動，玩足成日都玩唔哂！
一進入商場就先被這個由Wonderland設計的充氣賽道所吸引，真係想快D就可以落場玩！
一話影相兩個就自動識得行埋去搵番自己鍾意顏色嘅方程式賽車
因為較早前在網上預約的時間還未到，我哋就先玩玩旁邊的攤位遊戲，最傳統不過就一定係掉彩虹啦！
一如我所料，芊芊玩掉彩虹就好似倒錢落海咁，我一切期望就唯有放在哥哥身上，加油呀！
佢哋兩個分別掉中紅色(但係擲咗少少界)，但職員哥哥超好人，照俾番份小小禮物佢哋
單純的佢哋兩個，以為自己好利害，啱啱開始玩就已經可以贏到獎品
為咗唔打擊你哋嘅信心，個秘密等你哋18歲先至話番俾你哋知啦...
芊芊繼續好有信心咁用豆袋掉公仔！
掉中哂3隻獅子公仔可以得8個印(指定數量印花可以換到Little Adventures不同大小的可愛動物毛公仔)
哥哥掉到脷都伸埋出嚟
見到冇下一張相就知道剛才的攤位遊戲落了空，再玩多一兩個攤位遊戲之後，要佢哋停一停回一回氣，如果唔係一下子就掉哂我所有遊戲點數
在商場外海景臺有個巨型充氣裝置，不過今日天氣太熱，加上佢哋兩個冇咩興趣(因為仲一直對攤位遊戲念念不忘)，所以我哋就冇玩！
我哋行番去一樓的一個數碼互動遊戲專區，見裡面人少少咁，原來都有個小驚喜
這個專區需要5個遊戲點數，一入場就獲職員送我哋兩隻馬騮公仔！跟住見到一大個屏幕投射海底的影像，原來呢個叫「海底水族館」，小朋友將佢哋完成嘅畫作經掃描器一讀，自己的畫作就會即時進入畫面
哥哥呀芊都揀選自己鍾意嘅動物，填上靚靚顏色！唔同嘅海洋生物在畫面中會有不同的扭曲動作，真係幾似模似樣㗎！
呀妹先完成就去將畫作交俾職員哥哥去掃描！
見到啦！見到啦！呀芊畫個條蝴蝶魚入咗去海底啦
哥哥見呀妹條魚入咗去咁過癮，即刻加快速度完成埋自己隻螃蟹
哥哥搵緊自己隻蟹，唔知Scan完之後去咗邊度...
搵到啦，兩個分別搵到自己畫嘅魚同蟹，估唔到呢個小活動可以令佢哋咁開心！
隻蟹去到邊哥哥就一路跟住去到邊，不停叫我要同佢影相
另外門口有兩個觸碰式地板互動遊戲，不同的遊戲會出現在地上，兩個不停踩踩踩...超開心！就在這個互動專區不知不覺玩咗半個鐘！
然後我哋就離開商場上到去到4樓數碼廣場，途經天橋又有幾個攤位遊戲，佢哋條癮又返番嚟
先嚟個「足球過三關」，要踢入哂先可以拎到最多數量嘅蓋印
對芊芊嚟講就有D難，不過佢最後都可以踢入一球，YEAH!!!
咁多個攤位遊戲之中我認為最難玩的一個，就係呢個要用玩具魚竿將個玻璃樽釣起
呢個劍太居然可以喺限時之內釣得起個樽4次，贏咗10個印仔!
哥哥一直試都唔得，見到隔離媽咪咁勁，我都忍唔住要過去幫幫佢...但係實在太難啦，我最後都攪唔掂，哈哈~
再行過隔離攤位繼續玩，每局手上10個波，芊芊同哥哥都分別連拋入好幾個碗，旁觀朋友都睇到「嘩嘩聲!」
小朋友學嘢特別快，我哋冇理會佢點樣先可以掉得中，芊芊自己發現彈一下枱入碗係容易D，所以有陣時真係唔駛特別限制小朋友的創意
哥哥一樣咁利害! 剩係睇張相都見到有4個中咗
玩完又再玩，今次掉小圈落汽水樽！呀芊都一樣咁勁，掉仲一半贏到印仔
真係玩極都玩唔完嘅攤位遊戲，預備呢個遊戲都唔容易，因為如果有人飛鏢飛中整爆汽球，下一局又要重新吹過一堆汽球去Setup
所以我同哥哥講你不如唔好飛中咁多啦，如果唔係姐姐又要重新吹過一堆汽球好辛苦㗎！(進入遊戲狀態的佢當然冇理我啦)
嘩呀芊都一樣飛到，不過未夠力飛親落汽球都反彈番出嚟，哈哈～
玩完攤位遊戲我哋上到大草地平台，原來呢度又有好多嘢玩，點算呀！玩極都仲有嘅？
呢度都有一個小小朋友的彈床滑梯設施，唔知係咪兩個小朋友真的長大了，兩個今次嚟都對彈床毫無興趣！
彈床後面有個碰碰車遊戲區，大人細路都可以一齊玩！
仲有兩個小工作坊有姐姐教小朋友做復活節勞作
復活節梗係要玩吓掘蛋啦，每個小朋友先抽一個籘籃，內裡裝住一個英文生字，然後到大草地搵番所屬英文字母的七彩復活蛋
成地都係復活蛋好壯觀呀！
集齊英文字母復活蛋，又可以去換獎品啦！
旁邊有好幾個吹氣魚池，小朋友齊齊去拎番Set釣魚用具，真係咩都有得釣
兩個喺度比賽睇吓邊個釣得多
呢個哥哥成日都蝦呀妹，你大人三年梗係釣得快又多啦！
哥哥呢個四眼認真LOOK真係幾誘人，果然男人認真做某樣嘢嘅時侯係好吸引
好嘢！釣到成桶滿哂可以去換獎品啦...點知去到先知，原來無論你釣幾多都有獎品！不過當然無所謂啦，因為過程都好開心嘛
換獎品就係喺復活蛋池抽番隻復活蛋玩具，真係隻隻裡面都有唔同嘅小玩意！
最後我哋發現有個小遊戲唔知點解冇咩人玩，唔知係咪真係佢喺草地嘅另一邊，所以比較少人知道，我哋就行過去睇吓乜家伙
原來係人肉對對碰(個名我作嘅～) 最啱一家大細一齊玩，地下佈咗軟墊，小朋友抽起兩端就可以撞向對方
你哋平時一切恩怨今日就喺呢度了斷啦...我「啛」！
呀芊玩到瞓哂身！實行要撞低哥哥...
撞唔低哥哥，唯有去撞媽咪啦...(傻豬，媽咪仲難撞跌，因為...heee)
我就更加唔駛講啦，佢哋見撞落我度一D反應都冇，唯有番去同媽咪玩
呢個活動真係用嚟減肥都OK喎！玩完真係堅攰(我指佢哋...)
最後嚟番張大合照啦！留番個位俾我呀...
"YEAH!!!!"
玩咗咁耐仲未散...真係點解佢哋有咁多電！我哋落番去GT賽車計時賽場地
排咗一陣隊終於有得戴頭盔扮車神啦
嘩，真係成架一級方程式咁款，仲有個有型有款嘅頭盔喎
我哋先入場聽職員哥哥講解守則，戴上頭盔着齊裝備...
先影影相打打卡
上車啦！呀芊第3線，哥哥第但線，所有車手準備就緒，3...2...1 出發！！！
個氣氛好刺激咁，其實車速唔快仲好安全...每個職員哥哥跟住一個賽車手幫佢哋計時
芊芊中途要去維修站換過架車，我諗架車俾小朋友玩咗成朝都開始冇電喇(同我一樣)
真係估都估唔到，哥哥遲出發居然最快番到終點贏咗場比賽，不過佢都唔係全場總成績的第一，因為於當日有其他小朋友的時間比哥哥仲要快成分鐘
但係當然冇問題啦，哥哥呀芊有得玩電動車都已經好開心
最後妹妹終於埋站啦！包尾衝線...
玩咗成日，最後拎住吸滿印仔嘅場刊去換公仔啦
總結今次數碼港商場舉辦這個復活節活動，真係超好玩！電動賽車就不在話下，十隻手指都數唔哂的攤位遊戲，真係玩到佢哋兩個食完個Lunch都話要Encore!
Photo by CANON 5D Mark IV, Len | EF 24-70mm f/2.8L USM
數碼港商場x Wonderland－「GT小車手嘉年華」 簡介
打造全港首個「戶外兒童電動GT賽車競技場」 同場設獵蛋尋寶、創意數碼水族館、童樂碰碰車、奇趣保齡球、反斗充氣彈彈跳，超過10個經典攤位遊戲贏取豐富獎品歡渡開心假期
數碼港商場 x Wonderland「GT小車手嘉年華」 (已完結)
日期：2017年4月14日至2017年4月17日 (共4天)
時間：上午 10 時至下午7時
地點：數碼港商場L2全天候廣場及 數碼港2 座4樓數碼廣場
票價：遊戲證$200 (包含15個遊戲點數)
活動查詢：2376 4978
🎈戶外兒童電動GT賽車競技場
地點：數碼港商場L2海景臺
節目內容：全港首個戶外兒童電動GT賽車活動，為小朋友帶來刺激及令人振奮的駕駛體驗。 遊戲適合身高90厘米至120厘米兒童參與，需預先登記，詳情請留意www.wonderland4kiz.com
🎈獵蛋尋寶遊戲 地點：數碼港2座4樓數碼廣場
所需遊戲點數：3個遊戲點數
節目內容：在戶外草地上讓家長和小朋友於假日休閒的時光，體驗一下大自然的清新空氣，於廣闊的草地上奔跑的感覺！精心設計的「復活蛋」將分散藏於戶外草地各個地方，大家可根據所提供的指示展開尋蛋之旅。
🎈數碼互動遊戲專區
地點：數碼港商場1樓105號舖
所需遊戲點數：5個遊戲點數
節目內容：數碼互動遊戲專區設有兩個投射互動專區，分別為創意水族館及觸碰式地板互動遊戲，適合好動好靜的小朋友，激發他們天馬行空的創意。
🎈童樂碰碰車
地點：數碼港商場L2全天候廣場
所需遊戲點數：4個遊戲點數
節目內容：迷你版碰碰車為小朋友建立屬於他們的遊戲天地，讓小朋友感受到碰碰車的刺激，享受不一樣的駕駛之旅。 *身高90厘米或以下兒童需要家長陪同下才可參與遊戲。
🎈奇趣保齡球
地點：數碼港2座4樓數碼廣場
所需遊戲點數：3個遊戲點數
節目內容：為小朋友度身訂造了四條保齡球賽道，來個掃瓶全中的滋味，親身感受一下保齡球中的樂趣。
🎈反斗充氣彈彈跳
地點：數碼港2座4樓數碼廣場
所需遊戲點數：4個遊戲點數
節目內容：今次的嘉年華設有兩款反斗障礙彈彈屋的充氣遊戲，適合身高90厘米至140厘米小朋友參與。
🎈經典攤位遊戲
地點：數碼港商場L2全天候廣場及 數碼港2座4樓數碼廣場
所需遊戲點數：2個遊戲點數
節目內容：超過10個好玩經典攤位遊戲，還有可愛的Little Adventures得意動物公仔系列作遊戲禮物，讓大家帶回家。
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
01 Dec, 21
【親子好去處】AK都有玩 Sasuke Fitness Ninja Warrior 化身忍者挑戰關卡
平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。
25 Aug, 21
【親子好去處】Dunk Sports Training Centre 起躍體育訓練中心 全集中の訓練 信心と堅持
做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
30 Jul, 21
【親子好去處】暑假必到 Pixar 彼思動畫的科學秘密 @科學館HKSCM
上次去完 Pixar Fest，今次又來一個Pixar #彼思動畫的科學秘密，點可以錯過呀，真係今個暑假必到的好去處。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。