親子室內

【親子好去處】MR. MEN LITTLE MISS夏日住宿計劃 @黃金海岸酒店

15 Jul, 17

MR. HAPPY、MR. BUMP、MR. TICKLE、LITTLE MISS SUNSHINE....嘩好開心呀！全部都係Mr. Men 同埋 Little Miss，黃金海岸酒店搵嚟 MR. MEN LITTLE MISS 同小朋友放暑假，超興奮可以接受黃金海岸酒店邀請，而且媽咪仲係忠實粉絲，超開心咁過咗2日1夜Happy Weekend！




一落車已經見到門口全部都係 MR. MEN LITTLE MISS，你哋又識得幾多個？哥哥同呀妹幾乎全部都識哂，因為佢哋差唔多煲熟哂屋企成套書！

今次係 MR. MEN LITTLE MISS 喺香港首次同酒店合作，帶嚟「夏日水上派對」


Check-in 咗之後就即刻收到 MR. HAPPY 的小背囊、尋找角色遊戲問題紙同埋水上遊戲通行證，未開始就已經收到禮物，氹到佢哋兩個幾咁開心


沿住地上的 MR. MEN LITTLE MISS 指示去搭升降機

一入到房兩個嘢就已經「嘩！嘩！咁聲」，就連媽咪都一樣咁高興，仲開心過見到宋仲基！


成間房都佈置得好靚！除咗一係嚟張 MISS LITTLE 地氈好得意之外，就係兩張主題床！仲有 MR. STRONG、MR. BUMP、MR. TICKLE同埋 LITTLE MISS CHATTERBOX 公仔，兩個第一時就係去攬住佢哋


仲有好多英倫標誌，真係每個角落都見到 MR. MEN LITTLE MISS








洗手間都一樣見到佢哋！無論照緊鏡、刷緊牙同沖緊涼，都有 MR. MEN LITTLE MISS 陪住你！






兩個轉眼已經變身著好哂泳衣，因為我哋趕住要去玩水，不過又好唔捨得咁快離開間房，所以就再留多陣影多幾張相



兩個話要帶埋隻公仔番屋企...梗係唔得啦


因為呢度所有 MR. MEN LITTLE MISS 的物件都唔可以帶走，有哂成個價目表喺度，如果有咩捐毁，就逐樣同你計！所以大家要好好愛惜房間每一樣嘢，等之後入住的客人都同樣可以享受到一個開心的旅程




唔駛著住件泳衣落番大堂出去泳池，只要按1樓便有指示帶你行小路直達

夏天，我哋嚟啦！


我地先去到黃金水動樂園濕下個身先，有得玩水，兩個就即刻精神哂！

最興奮係企喺呢度等上面嘅水一儲滿就直淋落嚟...爽呀！



 WOW! 由頭淋到落腳趾尾，有陣時我都真係唔鍾意夏天，不過諗起如果有得咁玩水又唔錯喎







D水咁樣撞落去哥哥個頭度，好似變咗頂帽好攪笑！



咁樣淋法芊芊就唔敢～

都係玩番D小學雞 Level 就最啱！



今期喺多用途活動場地，就有四款以MR. MEN LITTLE MISS為主題的戶外充氣水上遊戲

包括兩道滑水梯、夏日遊船樂和水槍對決戰(大家記住要帶埋通行證去口)

芊芊真係人小膽唔小，二話不說就自己跑去排隊上去玩滑水梯



1...2...3...出發...







哥哥又點會執輸

不過原來仲有一個再高D，咁哥哥就可以再挑戰更高難度

仲記得以前哥哥真係玩親咩都驚一餐，依家你睇佢咩都夠膽死

所以題外話，小朋友細細個 唔敢試呢樣嗰樣，各位爸爸媽媽真係唔駛話佢哋無膽，其實俾多D時間同耐性佢哋，佢哋慢慢大個觀察得多就自然會去嘗試

即便佢大個咗依舊唔敢試，都唔駛擔心，只要多鼓勵多尊重他們就可以，咁樣可以從小培養佢嘅自信，唔好成日打擊佢自信心(多數都係作爸爸的常犯的問題)


水花四濺...


芊芊見到有得划艇仔就自己一個人仔走咗去排隊，但係因為得你架船，每次玩8分鐘，所以都排得耐咗少少

不過呀芊都好有耐性乖乖的等咗兩Round，終於到佢上船啦


其實不知不覺佢哋都大得好快，對上一次划船仔芊芊都未敢一個人上船，依家四歲人仔排隊、上船、玩埋，都一手一腳自己攪掂




 哥哥玩完滑水梯就直接過嚟水槍戰

哥哥從未玩過咁大支水槍，今次發達啦佢，仲唔玩到癲

裡面仲有幾個大吹氣波可以用嚟掩護自己


太乍了...居然俾女仔隊冧...



 玩過哂咁多樣嘢之後，佢哋最鍾意都係番去泳池游水，今個暑假黃金海岸酒店特別全新裝修咗游泳池，真係巧靚靚！連我咁怕上鏡都要同佢哋影番張相Post出嚟


呢個哥哥咁趕拉住呀芊去邊...


 就係要玩呢個滑水梯，兩個嘢無限Loop住瀡咗好多次

仲要咩姿勢都試勻，向前、倒後、亂瀡一餐

古古怪怪嘅哥哥扮海豚俾呀妹騎喺上面


 走失咗條海豚...最後自己游走唔理個妹

玩咗成兩粒幾鐘水...番上房沖個涼換件衫，我哋就落嚟食自助餐啦！哥哥之前一直問我幾時有得去食自助餐，呢晚終於如佢所願。最近佢開始發育，日日都超大食(以前BB半支奶都飲唔哂)

 自助餐都有以 MR. MEN LITTLE MISS 為主題的甜品，不過可能我哋7點先開始食，所以頭一輪都已經俾人攞哂，幸好醒目媽咪仲拎到一件 LITTLE MISS SUNSHINE 造型蛋糕








食飽之後休息一陣，我哋就出發去「卡通時間」睇 MR. MEN LITTLE MISS 卡通，佢哋仲將頭先房嘅公仔放咗入背囊，話要帶埋一齊去睇卡通

經大堂門口落到去L1層的 Function Room 就到達「卡通時間」的場地


 除咗現場有一大屏幕喺度不停播放住 MR. MEN LITTLE MISS 卡通片

仲有橙汁汽水任飲，同埋爆谷雪糕任食

而且仲有兩個小小攤位遊戲，贏咗仲有貼紙送俾小朋友，真係好開心！



另一邊有個魔衣櫥拍照區，可以俾你扮吓公主超人，我哋一場嚟到梗係要扮番今次主題角色啦

呢兩個角色真係啱到冇得再錯...衫似主人型



呢個媽咪從來都唔會陪埋一齊癲，著呢D衫上身！今次居然自告奮勇，主動要求著住叫我幫佢影相


 之後呀芊就番埋位食住爆谷飲住橙汁慢慢煲劇


哥哥就兩頭走，一時過嚟睇，一時又過番去玩攤位遊戲，仲有個體感保齡球放咗係另一邊俾小朋友玩，兩個今晚好似放監咁，做咩都冇王管！




最後番房指定動作，影番張全家幅作為我哋今日行程嘅小結 Cheers! ~


第二朝我哋8：30起身，先同哥哥妹妹出發去玩「尋找角色遊戲」，問題紙背後就係簡單的酒店地圖，總共有8個地方要去搵，搵到之後再回答紙上嘅問題，答齊又啱哂就可以去鯊魚冒險島換小禮物

又搵到多一個啦！話啱快要出發去搵最後第8個


 都咪話易搵(咁又唔係超難)...其實細細塊板都要一定的眼利先見到(我哋都總共用咗30分鐘先至完成)

食過早餐 Buffet 後，我哋就預備參加11：00舉行的DIY工作坊，不過時間未到我哋就喺酒店附近影吓相



有個「照相站」可以揀鍾意嘅 MR. MEN LITTLE MISS 相框，然後影完張相就入Email俾番自己

酒店這個安排實在值得一讚，原來呢個工作坊只係俾小朋友入去，大人要45分鐘後再嚟接佢走

雖然時間好快過，但係呢個時侯俾家長們透透氣，或者番上房執行李係最好不過

工作坊第一份是做嘅係 MR. STRONG 名牌，第二份就係一塊屋型告示掛牌


你哋兩個玩得開心D啦，我就番上去補補眠，辛苦哂媽咪番房執行李！


話咁快時間到去接番佢哋！果然做得唔錯喎，離開嗰陣仲送多一張填色紙俾小朋友


 之後我哋喺閱讀閣睇一陣圖書，因為呢度齊集過百本 MR. MEN LITTLE MISS 系列圖書



最後壓軸我哋再去到鯊魚冒險島俾佢哋兩個放吓電

如果想睇鯊魚冒險島更詳盡介紹可以Click呢度 http://bit.ly/2mL5UoQ






















Photo by CANON 5D Mark IV, Len | EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

呀劍評分: 10分
呀劍評語: 總結今次黃金海岸酒店的 MR. MEN LITTLE MISS 主題嘅旅程，真係由開始開心到結束，有唔同節目又有咁多禮物。仲有不得不讚嘅係所有酒店職員，全部都好細心照顧周到，服務態度一流！所以真係好多謝黃金海岸酒店的邀請，俾呀劍一家過咗一個咁開心嘅Weekend!

 MR. MEN LITTLE MISS夏日住宿計劃 – 每晚由HK$1,488起
今個暑假，MR. MEN LITTLE MISS一眾角色將蒞臨香港黃金海岸酒店!。每晚只須由HK$1,488起(連2位成人及1 位小童自助早餐)，小朋友可獲贈MR. HAPPY背包外，更可暢玩為主題水上遊戲、尋找角色遊戲、手工藝坊、閱讀閣、烹飪班*及參與特備晚間卡通觀賞^，節目豐富，為一家大小帶來難忘回憶。

 每晚只需額外HK$500，便可入住MR. MEN LITTLE MISS主題客房，讓一眾角色伴你入睡!

 詳細資料

 活動時間表

 日期：2017年7月4日至9月3日

 費用：兩大一小入住由HK$1,488起

 電話：+852 2452 8833

 電郵：[email protected]

 網址：https://www.sino-hotels.com/hk/gold-coast/tc/offers/2017-summer-room/

(以上資料更新至文章當日)


Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

搜尋

標記

近期文章

文章分類

分區活動

舊文重溫

RELATED POST