兩兄妹今日嚟到奧海城體驗「錢家有道」的《未來事業所》，又可以有機會俾我同佢哋呻吓話「爸爸媽媽返工其實好辛苦㗎」！
「錢家有道」係2016年由投資者教育中心推出的一個獨立及持平公正的理財教育平台，免費提供金融理財資訊、教育資源及工具，以協助香港市民計劃及管理個人財務。
今次奧海城與「錢家有道」合作舉辦這職場體驗活動「未來事業所」係暑期限定。以前要山長水遠去到機場先有得玩職業體驗，今次咁近喺奧海城就有得玩真係爽。
呢個活動適合4-10歲小朋友參加，提供6種唔同嘅職業體驗，包括郵差、空中服務員、建築工人、警察、醫護人員及餐廳服務員。
場景佈置都製作認真㗎，加上小朋友着埋套醒神制服，真係好似置身於真實工作環境一樣，令佢哋勁投入角色。
今次活動的參加資格，一係你就係奧海城嘅Olympian Kids會員，又有500積分拎去換體驗券；一係你就喺商場搵兩個不同商戶消費滿HK$300，拎張發票去都可以換到體驗券，(細細聲話你知，留意住「錢家有道」Facebook可以玩遊戲贏飛架)。
入場先獲派一本工作證然後揀兩份工去打。
佢哋兩個話要打同一份工，叫佢自己揀揀完又問我好唔好。最後就揀D以前未打過嘅工做。
仲有每個入場小朋友會貼番張男仔/ 女仔嘅貼紙。
唔講你唔知，佢哋兩個知道有今次活動去嘅時侯，建築工人係鐵腳話咗一定要做。可能因為屋企附近成日都整路起樓，所以朝見口晚見面日久生情。
講咗咁耐，終於開工啦！兩個先嚟做建築工人，着齊裝備帶晒眼罩、安全帽真係有板有眼。
總共有3個 Tasks大家輪流交換做，哥哥先嚟砌安全指示牌 。
話都冇咁快，轉個頭已經砌好晒3個。
呀妹就好似砌Lego咁砌磚...
然後呀哥去咗砌水管，我幾鍾意呢個遊戲，因為要將不同長度的水管及接駁位，最後要啱啱好連接埋去到另一邊牆。
哥哥開咗認真Mode去駁(連大人都未必咁快可以砌得到㗎)。
加上支沙灘玩嘅挖泥耙耙，真係超可愛。
到呀芊去接駁水管，起初乜都唔知唔知點算。
後來姐姐幫咗佢一兩支之後，突然神速咁砌得好快。
最後仲俾佢完成到，佢開心到自發擺咗呢個Pose，叫我影佢。
然後放工，即刻又要去準備返第二份工喇。所有小朋友著好晒侍應裝，準備招呼番我呢個麻煩客人…餐廳經理先教所有小服務員，要點樣招待客人，「歡迎光臨先生幾多位」呢D一定唔少得。
芊芊過嚟幫我點餐後就返去廚房準備，玩法係將盒內的食物，排番跟相中套餐一樣整整齊齊就得。
睇見佢哋兩個服侍我嗰陣真係有少少感動... 雖然只係個小小體驗活動，同埋唔係真嘅食物，但係到佢哋雙手捧住個餐出嚟上枱嘅時侯，真係平時幾煩幾曳嘅畫面都抹走晒(暫時)…
妹妹冇人協助之下可以排到咁真係好厲害。
兩個咁辛苦獎你哋食番串假提子
(扮)食完之後就要收碟執枱將餐盤拎番入廚房。
再出番嚟抹枱，順水推舟「喂兩隻嘢唔該以後喺屋企都係照咁做」…
然後到佢哋最開心嘅時間(同埋平時都最想做) ，就係埋單收錢啦！枱上預先夾咗幾款唔同面值的紙幣。
最後小小餐廳服務員排隊等出糧，仲有張機遇卡抽呀。妹連續兩份工都抽到「加人工」，哥哥就抽到「減人工」，真係應景，完全反映出事實。
休息過後，佢哋兩個都話想繼續玩，但係佢哋今次就話想分開唔一齊返工：哥哥就揀咗做警察...但係唔知點解，就係覺得佢同其他人好唔同 (個個都唔知望咗去邊度)，十足十「無間道」咁…
你睇吓...似唔似「劉建明」…
打呢份工都幾好玩，Madam同各位小警察講，最近有單失竊案，叫佢哋幫手搵番個賊仔出嚟。有幾個疑犯，但係Madam只係得D唇印、指紋等線索…
個個都即刻變咗福爾摩斯一齊查案。
而呀妹就去扮郵差幫手寄信。幾唔留心...一陣肯定派錯信。
嗱...都話頭先唔專心依家要偷望隔離點分信。
將D信件磅完重之後就拎過去分區
然後再負責拎去寄，咁樣寄咗落去，之後又收番去分過類？哈哈…
(我明我明俾小朋友有番個概念嘛，好可愛！)
(我明我明俾小朋友有番個概念嘛，好可愛！)
成功寄咗信入郵箱好滿足
本來想玩埋呢外兩個職業，但係呀妹同哥哥兩個死都唔肯做空姐少爺，無佢乎！
不過好在都鍾意照顧BB，你睇吓BB都識望鏡頭呀！
每人打完份工有糧出，最後，拎住份糧去到銀行可以選擇儲起佢、洗咗佢或者拎去捐。
(如果將份糧攞$30出黎做定期，7日後就可以賺到$10利息，可以教小朋友如何將財富增值，延遲消費嘅慾望)
呢個咁重大嘅決定交俾佢哋自己。
頭先未開始，佢哋兩個一直嘈住，出咗糧要買「媽咪麵」同埋「魷魚絲」，估唔到佢哋都未知自己夠唔夠錢買嘅情況下，就好快決定每人要捐出$30做善事。
大家都換咗D Coins過去隔離有個捐款箱
平時我都有教佢哋兩個「施比受更為有福」，除咗買旗之外，如果見到街邊的乞丐，都會教佢哋可以隨心幫助。不過我唔會叫佢哋捐錢，我會教佢哋買麵包或食物捐俾佢哋解決即時需要，唔駛驚俾丐幫呃咗。
場內仲有一個 The Chin Family Market，個名真係啱，我哋因為芊芊就係叫 Chin。呢個士多有好多精品、零食同玩具可以買。
芊芊見到就流晒口水，佢可以拎住自己賺番嚟嘅錢，去揀自己想要嘅嘢食。
最後芊芊買咗包蝦餅，哥哥就買咗包媽咪麵，真係如佢哋所願。
除咗可以俾小朋友去做打工仔學識理財之道外，仲可以嚟到錢家有道攤位，用磁石場教導孩子分辨咩叫做「需要」同埋「想要」：毛公仔？電力？主題樂園？午餐？零食?
我諗芊芊會全部答係「需要」，哈哈~ (所以要襯呢個機會教教佢)
六款免費又有趣味性的理財工作紙，可以即場做又得，或者拎番屋企同小朋友一齊做，同爸爸媽媽分享一下打工之後感覺，同時又可以教佢哋應該點分配份糧同有關的金錢概念
呢個活動可以俾佢哋體驗一下大人工作，雖然感受同真實工作仲差好遠好遠，但係最少俾佢哋有一個概念，就係要去工作付出，先可以得到報酬。
然後再學識點樣用錢，當佢哋慢慢計數，自己冇咩錢，就要再去打工賺錢，同埋佢哋去士多買嘢嘅時侯，真係十五十六，諗咗好耐，證明佢哋知道有錢時要學懂珍惜，買前要格價，同埋用得適當。
Photo by CANON 5D Mark IV, Len | EF 24-70mm f/2.8L USM
呀劍評分: 10分
呀劍評語: 一個好有意義的體驗活動，小朋友除咗有得玩有得角色扮演，將日常生活所見職業帶進遊戲當中；亦可以俾佢哋知道要得到金錢係需要付出及工作，而且得到金錢後又要學識點理財，從小就培養佢哋，免得長大做咗大花筒！
《未來事業所》錢家有道 x 奧海城
日期
7月17日至8月31日
7月17日至8月31日
時間
12nn8pm（周一至五）、12nn – 9pm（周六及日）
12nn8pm（周一至五）、12nn – 9pm（周六及日）
(每項職業體驗大約需時30分鐘)
地點
奧海城2期地下主題中庭
奧海城2期地下主題中庭
對象
年齡4至10歲小朋友
年齡4至10歲小朋友
活動詳情
www.futureme.hk
www.futureme.hk
換取體驗券方法及活動流程
Step1. 憑奧海城最多兩間不同商戶之即日電子貨幣滿HK$300之發票 或 Olympian Kids會員500 Kids Points積分，可換領體驗券 1 張
Step2. 於指定登記時間到職業體驗登記處預約及領取工作證(如第一次參加，則可於登記時獲發工作證) 5分鐘前攜同工作證到達職業體驗地點
Step3. 穿上服飾及進行體驗(約25-30分鐘)
Step4. 完成體驗後將獲得機遇卡及薪金，最後可自由選擇儲蓄存款／到商店消費／捐款
備註：體驗券將依體驗時間順序換領，如最接近之體驗時段已滿，必須換領緊接下一個時段之體驗券，不可選擇其他指定時間。體驗券需即日指定時間使用，逾期無效。
每位參加者每次最多可預約2項職業體驗；每個體驗時段名額有限，先到先得，額滿即止。
(以上資料更新至文章當日)
Facebook專頁: 呀劍萬帥 kimfamilytravel
Blog網誌 : kimfamilytravel.blogspot.hk
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
01 Dec, 21
【親子好去處】AK都有玩 Sasuke Fitness Ninja Warrior 化身忍者挑戰關卡
平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。
25 Aug, 21
【親子好去處】Dunk Sports Training Centre 起躍體育訓練中心 全集中の訓練 信心と堅持
做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
30 Jul, 21
【親子好去處】暑假必到 Pixar 彼思動畫的科學秘密 @科學館HKSCM
上次去完 Pixar Fest，今次又來一個Pixar #彼思動畫的科學秘密，點可以錯過呀，真係今個暑假必到的好去處。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。