親子遊樂, 親子戶外

【親子好去處】零碳天地ZCB 全新「氣候變化與智慧城市」體驗館 (足本 Full Version)

02 Jul, 17

一直都好想去的零碳天地,不過因為妹妹太細個,又撞唔啱時間,但係今日終於有機會參加導賞團,參觀全新的「氣候變化與智慧城市」體驗館,仲要係完全免費架(暫時)


零碳天地外的戶外草地廣場,都嚟過好多次,雖然呢度周圍都係商業中心,但係勝在好少人,如果唔介意的話,帶個帳幕喺度野餐同小朋友玩玩,在大草地上跑來跑去都幾正!

而且玩攰了又可以到隔離商場行吓街嘆吓冷氣,可以由下晝Hea足大半日到夜晚


零碳天地採用可再生能源就地發電,整個頂部都安裝咗太陽能光伏板,但我一直都好奇究竟這一排太陽能板,可以供應到幾多電俾整個零碳天地

所以我就問咗職員哥哥,原來有40%電力來自吸收太陽能發電。另外60%以利用廢棄食油煉成的生物柴油發電。



體驗館現暫時免費預約參觀(直至另行通知),所以大家要把握機會啦

但係當我未入去體驗館前,見到.......說好的無人駕駛電動車...嗚嗚!!!!!



仲有報導介紹個「零碳仔」機械人導賞員,在體驗館門外唔見影!!! 好失望囉....

我哋預約咗16:00-17:30廣東話導賞,準時在門外等侯便可,會有職員出來登記入場



成個導賞團有5-6個職員負責帶大家參觀,整個團大約有20人(連小朋友在內),姐姐們先介紹全新體驗館的由來

館內設有四個主題展區,包括:「氣候變化」、「智慧城市及可持續建築環境」、「智慧生活」及「健康生活」



原來全球暖化真係越嚟越嚴重,未來十年平均最熱溫度日子多到成160日。

但係其實真係好茅盾,又想慳電,但係環境同社會又真係好難令人去實行(當然有好大決心就可以做得到,可惜我真係冇,又怕熱!)





唔講唔知道,成日開口埋口講「智慧生活」,起初都唔知咩嚟,直至見到呢個館就知這道!

原來成個館都採用咗優化天然採光及通風設計,個館裡面係冇冷氣㗎,只係靠場館內幾把巨型高流量低轉速的吊扇但係我哋一個二個一入到嚟就一路以為有冷氣...直至職員講解嗰陣我哋先知道




雖然係好難做得到,但係希望帶小朋友嚟多認識,影響到下一代細細個就有這個意識去保護地球


姐姐們邊講解會邊發問問題,當然呢個時侯小朋友就要舉手搶答啦,答啱咗會有印仔吸!吸得最多原來真係有小禮物㗎喎





場中間這個智慧城巿,有D窗口裡面藏住好多智慧生活小貼士





中間有一段時間俾各位可以自由活動,參觀及試玩各樣裝置



來自各個研發公司,創造出新的科技去對抗能源短缺等各種問題,雖然好多都仲未面世,但係希望將來有一日呢D新科技都可以幫助到人類的生活





呢個超立體投射景像好特別,小朋友見到都問點解座大廈可以飄浮喺半空



仲有好多個印仔俾小朋友喺度打咭



除咗T.Park源區,其他相關地區裝置都仲未去過,期望第日有機會帶住兩個小朋友唔係成日跑商場,而係去多D有意義的地方認識更多



一路參觀其實見到地下有好多個好似坑渠的圓形位,係哥哥話我知呢度有風出,我先知道原來呢個係一個可變風量空調系統,真係好高科技呀!


排出的風量雖然好微弱,但係可能有好多個的關係,就令到成個場館內一D都唔覺得熱





跟住不得不提就係呢個裝甲Iron Man戰衣,在報導中都有介紹過。發明原因係因為工人好多時都會在工作期間搬呢樣搬嗰樣閃親條腰,呢副裝甲就可以利用機械原理保持工人的腰在正確姿勢之下


呢個時侯又要出動媽咪親身去試一試,着上去嗰陣都幾麻煩,左啪右啪好幾分鐘先着好件裝甲


但係原來副裝甲都幾大力,如果你踎低身搬嘢姿勢唔啱,個機械就會即刻Chok你條腰變番直,我個人建議一把年紀的千祈唔好試,一不小心真係本來冇事都攪到有事

芊芊去咗另一邊就試試VR啦,平時我都唔會俾佢哋兩個用部手機玩VR,只係有時參加活動先順便俾佢哋試玩一下



呀哥又試吓另外一個VR玩法,今次呢個逼真好多,佢玩到好似真係置身現場一樣嗌到「嘩嘩」聲!





然後我哋就上到一樓另一層繼續尋寶





上層主要都係一些智慧家具及生活用品介紹,先見到呢塊唔係魔鏡魔鏡,而係智能鏡

塊鏡睇落平平無奇,其實連接位腳下的磅重機,計算你BMI、脂肪含量、水含量、肌肉密度等等。

智能鏡仲有日曆、時間等顯示,仲可以看戲!(會唔會太浮誇 ) 每朝刷牙照鏡時唔會耐到可以睇套戲卦



當然仲有一開始在館外有得睇冇得坐嘅智能車













館內仲有其他體驗,好多都係關於醫療用途,好似復康機械臂及手機助聽Apps,當然大家都唔希望用得着,但係一試體驗一下都無妨



復康機械臂係用嚟幫助有傷患朋友訓練肌肉早日康復,利用機械臂模擬遊戲內夾公仔

咁咪即係瀨尿牛丸個Friend,其實咪係一個打機手掣,哈哈~







旁邊見到有間黑房,原來係用瞳孔測糖尿,只需要拍攝眼底照片就可以準確咁測到,仲即時有報告!




原來我對眼珠底係咁嘅樣!好在...報告結果得出我都仲係屬於正常(仲幾高分喎)



助聽APP當然係幫助弱聽人仕,其實原理利用APP去filter走一些雜音,好似以前唱K會用Software將原聲退走一樣(當然人哋PRO D啦) 聽講話可以有效減低七成環境噪音。

只要用有mic的earphone就可以,雖然簡單D同埋只不過將收到mic的聲音擴大播入耳機,不過成本低好多,仲人人都輕易用到





哥哥分別在三個不同環境情況之下,測試助聽APP的效果





然後就到失明人仕用的APP,這個APP就好似GPS原理一樣,只係GPS安裝咗喺一支盲人杖上,利用它點到地上的凹凸標記,APP就會讀出你身處位置

當然這個還在測試階段,現在只在一所老人服康中心試用,若將來成功伸延至整個香港,可以幫助到各位失明人仕就好喇!





哥哥試吓用腳感受一下地上的凹凸標記,其實着住對鞋都真係唔係咁容易感受到凹凸紋







最尾有個繪畫區,其實就係利用咗AR技術,將大家畫的北極熊畫,投射出3D圖像在電話中







哥哥先完成這個花花北極熊,跟住到呀芊都攪掂啦,我哋一齊試用電話Scan,果然有隻識行識走擁有自己親手畫的北極熊喺電話裡面走動




最後都有個承諾區,希望各位可以寫上自己在那一方面減廢節能,然後貼在牆上立志實行








被媽咪強逼底下寫出的志願咭



最後如果大家在館內任何一個地方影過相,就可以上載Post喺facebook或instagram,即刻送你一塊木製書纖




最後就這後門離開,整整個半鐘頭導賞就完結啦!完咗行過去隔離Megabox仲可以食番餐先走!(啱啱先學完低碳生活,即刻轉頭就唔記得哂,睇嚟要即刻再預約嚟多次先得)











Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 8

呀劍評語: 低碳、低碳、低碳,重要嘅嘢要講你3次,全球暖化真係講咗咁多年越嚟越嚴重,香港就嚟冇冬天㗎啦,參加這個新體驗館的確又再認識不少,再次重溫愛惜地球的重要。

零碳天地「氣候變化與智慧城市」體驗館
體驗館希望透過科技去介紹氣候問題,讓公眾認識環保不一定要降低生活質素,同時反思如何在生活上保護環境。體驗館共有4個主題展區,包括氣候變化、智慧城市及可持續建築環境、智慧生活及健康生活。展覽除了環保教育,還有用於日常生活及建築工地上用到的高科技電子零件體驗!

日期
即日起至31/12 入場票(包導賞)

收費
即日起免費,直至另行通知;之後收費成人 $20、學生$10、長者及傷殘人士 $5 

地址
九龍灣常悅道8號

備註:必須預先網上預約 
查詢:2100 9803


(以上資料更新至文章當日)





搜尋

RELATED POST