【親子好去處】美樂士多 @朗豪坊 The Unforgotten Mei Lok

『美樂士多』進駐朗豪坊呀！自上次去過雜貨店，咩童年回憶都番哂嚟，之後就一直都好想再去懷念下，不過因為唔就腳就冇再去。但係依家可以隨時隨地行去朗豪坊，都可以買支綠寶飲啦！

自長沙灣美樂雜貨店開張，到荃灣千色有Popup Store之後(至28/9)，今次新店坐落於朗豪坊10/F 33號舖，一轉彎行就見到『美樂士多』個大招牌

哥哥一見到Patrick叔叔就同我講「又係呢度？」估唔到佢陪咗咁耐仲記得

我同佢講「係呀！呢度係Patrick叔叔最新嘅『美樂士多』，以後可以多D嚟玩啦！」

見到Patrick周圍騰就知道新舖開張有幾忙

店裡面依然有住嗰陣『老』味

我最鍾意嘅『綠寶』樽，記得細細個成日飲到唔停得口

店內好多擺設都係由雜貨店那邊搬過來

9月3日才正式開張，依家還在試業階段

一個一個籐籃裝住各種唔同懷舊零食

芊芊一入舖第一時間就係喉住D糖

哥哥就一路指住話「我想要呢個...呢個同...呢個」

同美樂雜貨店一樣，大部份懷舊糖果一次見哂，啱哂OL們落嚟入貨！

『眼鏡聰明豆』大家仲記得佢嗎？上次去雜貨店都仲未有貨

特別推介『印水紙香口膠』，成盒買有八折呀！記得細個買嚟食，最緊張就係睇下印水紙咩圖案

芊芊仲鍾意呢個威化雪糕筒

睇完零食行過隔離，見到幾款懷舊玩具，兩個又新屎坑走埋去玩玩

呢幾款上鍊鐵皮玩具，唔知大家又玩過未呢？

呢個紅A牌燈罩吊飾，係Patrick為朗豪坊店專登設計，真係整得幾靚喎！除咗紅罩燈，仲有其他紅A產品，好似『浪口鐘』、啫喱杯、水壺等

最得意係另一邊有個現代水晶吊燈，簡直形成一個大對比

西瓜波都有得買！聽聞製造西瓜波的廠商都逐漸減產，真係要快D買番個留念至得

美樂士多仲有自家果籃同埋月餅賣

月餅盒面設計都超懷舊，好似以前小學課本D角色咁

果籃都係以前鐵線+玻璃紙嗰款，仲有冇印象呢？

Patrick仲將雜貨店個冰凍汽水櫃搬咗過嚟

當然要揀番支『綠寶』飲啦！

Patrick仲推介我飲佢嘅至愛，喺日本空降到港嘅玻璃樽烏龍茶

最後壓軸就係呢部懷舊扭蛋機，只係$2就可以扭一次，扭蛋裡面係D小匙扣小飾物

兩個最開心就係可以有得扭蛋，$2一次，真係俾佢哋扭多幾次都冇所謂！

臨走前同Patrick叔叔影番張相，對比番上次雜貨店張相，大家都冇乜點變喎！哈哈～

大家記住去到朗豪坊，要上去幫襯下！

Photo by CANON 5D Mark IV, Len | EF 24-70mm f2.8L II USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 10分

呀劍評語: 自上次去過長沙灣的美樂雜貨店後，一直都好懷念舊(屎)，不過始終喺工業區唔係成日順路經過，但係依家開咗喺朗豪坊，就可以得閒就走去集體回憶回味一下！

地址

旺角朗豪坊10/F -33鋪

美樂士多 簡介

舊式士多有大家很回味的人情味大家總會想起小時候在士多的不同快樂事情汽水零食小玩具等等美樂士多仿似是一間70年代士多再重現在今天的都市裏延續那種情懷。

開放時間

11:00AM - 11:00PM

電話
9223 8538

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。

01 Dec, 21

【親子好去處】AK都有玩 Sasuke Fitness Ninja Warrior 化身忍者挑戰關卡

平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。

08 Nov, 21

【親子好去處】小白兔音樂農莊 New Bunny Wonderland 兔！全部都係兔

久違了農莊親子遊一段日子，今日終於可以再去親親大自然，而且今次都係久地重遊。

25 Aug, 21

【親子好去處】Dunk Sports Training Centre 起躍體育訓練中心全集中の訓練信心と堅持

做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。

16 Aug, 21

【親子好去處】STEM Carnival @ Cyberport 大玩編程 DJI無人機 RoboMaster 參觀智能農場餐廳

今個暑假不單只同陽光與海灘玩遊戲，有時靜靜地鍛鍊一下大腦玩玩編程都很好，今次由Ask Idea 和 DJI Education 舉辦的「ASK Idea呈獻：STEM嘉年華」就在數碼港 Cyberport 同大家一齊開心玩啦。

04 Aug, 21

【親子好去處】悅來酒店 Panda Hotel 熊貓夏祭食宿套餐扮番鄉下の旅人

又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。