又有新場啦! 位於九龍城廣場的Speedway Diner，集賽車及美食於一身的親子餐廳，可以算話真正的親子餐廳，點解? 因為大人同細路都可以一齊玩。但係點解賽車唔係搭美女嘅?!
Speedway Diner就開店於九龍城廣場四樓，只要一入到商場直上到 AEON 樓上，一上完扶手電梯望過對面就見到，佢面積差唔多佔咗全層1/3。
開店只係兩個多月，由於每日入場人數超爆，所以依家早上10:30就開店。
在店門口招牌底下就放咗架小賽車，可以俾朋友們打咭任影。
店內環境超大，空間感十足。
負責人話佢哋最注意的就係「賽車道上的安全」，不論賽車本身的防撞設備，以及小朋友配戴的保護措施，都非常謹慎去挑選配置，以避免有任何意外發生。
再加上一入場就會見到這個大大塊的「安全使用守則」，真係冇藉口話睇唔到！哈哈～
旁邊仲有好多部夾公仔機，每部收費3枚代幣(每枚代幣價值$2)。
再行入去就會見到點餐區及其他餐枱。
環境好乾淨好整齊，餐枱都係圍住整個賽車區，小朋友玩車時，家長可以好放心喺度食嘢！
餐廳最內位置竟然仲有個遊戲玩樂區，有扑傻瓜、夾珍寶珠、推氣墊球及射籃球機。
這個可供4個人同時玩的氣墊球機，如果玩起上嚟必定好刺激。要5枚幣，即係$10一局
仲有超好玩嘅籃球機，只係要3枚幣，即係$6一局
扑傻瓜都係要3枚幣，即係$6一局
雖然係一間餐廳，不過未食嘢前都係先講番主打的賽車
賽車道旁邊有Locker可以俾客人放行裝
賽車分有 2 款，包括Crazy Cart 每節 6 分鐘 $59 (身高 >120cm)，以及 Crazy Cart XL 每節 6 分鐘 $69 (身高 >140cm)，基本上成人及小朋友都玩得。
不過兩款賽不能在同一時段進行，即小朋友若玩緊Crazy Cart，大人想同一節一齊玩就只可以坐Crazy Cart玩，不能坐Crazy Cart XL。
職員先幫哥哥戴上保護裝備
玩車前戴頭盔是常識吧！大人都要戴，甚至見唔到的頭盔都要戴定呀「我未玩過㗎！」哈～
開始之前要先度度夠唔夠高玩先 (呀芊未夠高，所以今次冇預佢)
轉個頭坐埋上車，先聽職員細心講解賽車控制的步驟及注意安全的地方，不過我看哥哥眼神空洞，應該只係一心想快D踩油門衝出去。
整個餐廳佔地 13,316 呎，但係成個賽車場約佔 7,000 呎，都差唔多成個餐廳的一半。
終於踩油出發啦！
哥哥首圈先龜速試試，識得半踩油門都幾叻。
完成一個圈之後，哥哥開始發力，越行越快。
一入直路就Dump得特別快
賽車本身仲有支飄移桿，輕輕提高就可以來個飄移，不過其實賽車本身的軚盤靈活度很高，基本上唔駛用飄移桿都已經足夠入彎。
職員話飄移桿其實用嚟玩花式多！當然我都叫哥哥試幾下俾我睇，佢飄移就飄唔到啦，不停咁自轉轉到頭暈佢就做到，想知就睇片啦！
睇咗哥哥玩咁耐，當然我最後都有落場同佢一齊玩啦！
玩完之後我哋就開餐啦，咪以為人哋都係主打賽車，食物質素就會求求其其。我哋叫咗兩份餐，真係好好味道，唔錯唔錯！
先點個兒童套餐 (有卡邦尼鮮蝦長通粉、黃金雞寶、意式油醋沙律) 當然有很多選擇，「咩料」可以睇文末。
我就點咗個「賽車手套餐 Racer Combo A」(有芝士牛肉漢堡、意式油醋沙律、香脆洋䓤圈及拉絲芝士棒)
哥哥好少見到食物會食個不停，咁大家就知有幾好食！
老細仲專登介紹我飲呢杯花生醬奶昔
味道真係好特別，原來花生醬可以做奶昔！
食飽之後我哋就玩下其他遊玩設施，先到自助代幣兌換機，只要投入硬幣秒間就會自動跌出代幣，整間餐廳設有兩部。
咩都玩過下，都只不過用咗$50，最後哥哥點都想試下玩一次夾公仔，不出我所料，一夾起隻狗公仔，行咗幾cm就跌番落嚟，仲要差少少就可以中。之後哥哥叫住我俾佢試多次，我冒住無底深潭的危險，俾佢試多一次...
點知真係俾佢夾到喎！精采片段就睇片啦。
Photo by CANON 5D Mark IV, Len | EF 16-35mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
呀劍評分: 10分
呀劍評語: 有得賽車又有得食嘢！真係無得嘆！小朋友玩緊大人仲可以慢慢嘆，而且嘢食仲好正，真係值得再嚟。
An American diner where you can enjoy traditional diner-style food and race against your friends in special drifting karts!
地址
九龍城廣場4樓406-410號舖
營業時間
星期一至五 11:30am - 12am
星期六、日 10:30am - 12am
收費
Crazy Cart 每節 6 分鐘 $59（身高 >120cm）
Crazy Cart XL 每節 6 分鐘 $69（身高 >140cm）
https://www.facebook.com/pg/speedwaydiner
查詢
2718 2272
RELATED POST
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
26 Nov, 20
【親子好去處】Park Hotel 百樂酒店 「飲飽食醉悠哉」住宿計劃
哥哥同芊芊啱啱考完試，一於帶佢哋去酒店玩番轉，今次我哋揀咗尖沙咀的百樂酒店，點解？好簡單，因為真係超抵住抵玩。
31 Dec, 19
【親子好去處】悅來酒店 Panda Hotel 『大帽』險遊山食宿計劃
少林功夫＋足球就聽過，估唔到酒店住宿＋行山都有得諗，今次參加了悅來酒店 Panda Hotel 『大帽』險遊山食宿計劃，食完嘆完第朝早再去行山身心舒暢～今次悅來酒店特別推 【『大帽』險 遊山食宿計劃】，我哋選擇先入住，第朝食過早餐先去行山，大家可以自由選擇行山的時段。
26 Nov, 19
【親子食記】纜車主題茶餐廳 金牌老香港
究竟仲有咩交通工具未做主題餐廳呢？哈哈，位於山頂廣場內的金牌老香港，正係用上山頂纜車為主題的餐廳，唔止好睇，仲好好食～上得山頂就預咗會貴，不過唔知係因為平時食嘢貴咗，定係佢真係真平，我哋四個人食個Lunch都只係用咗二百幾蚊。
25 Nov, 19
【親子好去處】九龍酒店 玩轉海陸空 探索香港住宿計劃 The Kowloon Hotel
一次過玩盡海陸空的住宿體驗，新鮮感極高，玩過癲過仲可以番酒店嘆大餐，一家人入住真係超滿足。