親子旅行, 親子飲食, 親子遊樂

【親子好去處】Strokes HK Mini Golf 迷你高爾夫

07 Jan, 18

兩個自小都跟我周圍去,參加唔同種類嘅運動,特別係打Golf,兩個特別冇興趣,但係見人玩又好想試吓,當一試打極都打唔到嗰陣,又冇哂興趣無限Loop。今日帶哥哥同呀芊到銅鑼灣 Fashion Walk 新開的 Strokes 再一次嚐嚐「嘗試 > 失敗 > 放棄 > 好奇」無限 Loop 之樂趣


新店就坐落於銅鑼灣已經優化的 Fashion Walk,現劃分為時尚生活區域 Kingston,裡面新店陸續開幕,Strokes 是其中一間。


Golf 呢個運動往往都要到外面去打,唔係咁容易方便就接觸到,雖然近年已推出些虛擬賽道的高爾夫遊戲,但是小朋友不夠力度還是很難控制。

Strokes 則以多條奇形怪狀的球道,最簡單的推桿技巧「Putt Putt」將球推入洞,雖然負責人也建議6歲或以上的小朋友較適合,不過即使比較幼小的小朋友,在大人陪同之下,還是也可以入場玩玩



我哋先入場搵個位置坐低,兩個都話有D肚餓,所以我打算先醫飽個肚再去打 Golf!

呢個位置雖然又靚又坐得好舒服,不過中間只有張小圓枱,我哋食飯就會比較辛苦少少,所以之後都係轉番去正常餐枱用餐。呢度較適合Happy Hour一齊喺度吹吹水呻呻苦!



Food and Drink Menu,想知有咩食有咩飲,可以去番官方網址慢慢睇!
https://strokeshk.com/eat/



用正餐位置不算很大,近窗邊的有沙發座,另外亦設有高腳Bar枱座及酒Bar位置,大家記住早D預約呀!



我哋點咗餐叫咗D嘢食,等嘢食空檔然後到要出去玩玩啦,喺餐廳門口原來都有一個小小高爾夫洞,可以俾大家 Warm up一下。





Set Lunch 有沙律菜跟餐湯,主菜有雞腿及豬枊,味道不錯!價錢也算中尚。










食飽飽後我哋就開始玩啦!場地共分為兩個區域 Coachella Valley 及 Palm Springs,兩個區域都分別有9個洞,以最少總桿數為之勝。



揀番支適合自己嘅球桿,我目測最短個支都適合呀芊 5歲呢個年紀(大概100-110cm高)。



如果大家真係想「鬥波」,可以在 Reception 拎番張計分咭 "9 Holes Score Card",遊戲規則係每個洞唔可以超過6桿,其實都好難!哈哈~




不過各位入場志在玩玩開心下,就唔駛下下計到咁盡,同小朋友嚟更加可以輕輕鬆鬆咁玩,所以其實你就算冇打 Golf 經驗,同小朋友一齊亂打一通,都可以好開心㗎!(係隔離有勁人望住嗰陣瘀D囉)



Coachella Valley 呢邊難度比較高,不過五顏六色好鮮艷,我哋都係睇外表唔睇內涵(哈哈~)所以都係揀呢邊嚟玩先。











驟眼睇好似好容易,真係落到場要推桿,真係好難㗎!仲話規則係要每個洞6桿以下,邊有可能呀!

不過相比起最尾幾個洞,其實又真係已經算容易。




第 7 個洞好特別,一定要打到上斜中間有個洞,翻牆到隔離置。呀芊打極都打唔到,但係佢好有魏力,不停嘗試差唔多十幾二十次,終於翻到牆!佢自己都好開心好滿足。



到第 8 個洞,係一個大迴旋的球道,呀芊當然打極都打唔到,開始公主脾氣又嚟啦!就係我一開始講的無限 Loop 嘗試,放棄,又再嘗試。



跟住每個洞的旗號由 1 至 9 順序玩,直到第 9 個即最尾一個洞,球入洞後就冇得執,唔會再出番嚟㗎啦





完成一區後,又真係差唔多45分鐘,然後再過去玩埋 Palm Springs,呢邊全以藍色為主調,雖然冇大迴旋球道咁高難度,不過都有好多高高低低及障礙物的球道,又唔算話好易!





呢個洞如果唔小心將個球推咗落去中間圓形凹下位置,就唔知點打番上嚟喇!



最後 9 號洞都跟 Coachella Valley 的好似!最難係推到上最高平台位置,因為球道係冇邊圍住,一唔小心又會將個波推番落去由頭嚟過。




餐廳內有一個好奇怪嘅位置,你會發現點解無端端會放個雪櫃喺度?



原來雪櫃門一打開,裡面係個活動室,可以用嚟開 Party 或者上 Workshop,不過還在工程當中,但係都八八九九就嚟攪掂!



設有酒Bar位置


隔離亦有一個小小空間可以一班朋友喺裡面密密斟



最特別係呢個 Event Room 內有兩個獨立浴室,負責人話將來會有D Yoga 班喺呢度進行就可以使用。





Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 9分


呀劍評語: 可以邊飲邊食邊玩算是不錯,當然這餐廳會較適合成人享用,若跟6歲以上小朋友日間來玩玩也不錯,可以吃個午餐或High Tea消磨一個下午。

Strokes HK 簡介
Strokes is Hong Kong’s premier Crazy Golf & Lifestyle club. Experience Crazy Golf, restaurant, bar, and workshops in the heart of Causeway Bay. We offer 9,000 sqft of event space, retro lounge offering Tex-Mex menu, cocktails, teas and coffees for walk-ins and bookings.

地址
銅鑼灣Fashion Walk 京士頓街9號1樓G2-3號舖

營業時間
星期一至四 11:30am - 1am
星期五 11:30am - 3am、
星期六 10:30am - 3am、
星期日 10:30am - 11pm

收費
Crazy Golf ticket 迷你高爾夫 每位收費$160/9洞 (45分鐘)
多用途活動室需向場地查詢

Food Menu
https://strokeshk.com/eat/

網址
www.strokeshk.com

查詢
2877 1800

備註
需要網上預約
12 月 31 日除夕營業至 2:30am,每位最低消費 $500(可用於 Mini Golf、食物及飲品),餐廳最後落單時間為 11:30pm

(以上資料更新至文章當日)






RELATED POST