親子飲食

【親子好去處】九井壽司 Kokonoi Sushi Restaurant

25 Feb, 18

得知MegaBox開咗間人氣新幹線壽司店,今日經過九龍灣順便到此一食,用列車速遞壽司唔係新鮮事,到底食物質素又掂唔掂?


位於MegaBox L9的「九井壽司」,店子簡單用上全木的裝橫,感覺非常日系,門外有個車廂打卡位,身後的車窗位置係個大電視播放住餐牌推介。


同其他連鎖壽司店一樣,都係按下人數攞飛等位,同時都擺放咗少少繪本同雜誌,俾大家等位冇嘢做可以「打書釘」。





牆上有一JR新幹線路線圖的設計及天花上有四個扶手吊環燈,感覺都幾特別。





好快就搵到個卡位坐,當然兩個細路一定要坐埋邊,可以點餐同近距離見到新幹線。



呢個妹最鍾意就係食三文魚籽同蟹籽壽司,但係唔食D飯囉...再唔教好佢一陣培養咗個「港女」出嚟。



哥哥就八年如一日(因為得八歲) 蟹柳壽司仍然係佢至愛。




皇帝蟹捧壽司 $16



蟹籽軍艦 $26



列車車軌上都有小告示,提示大家唔可以放手喺上面。



亦有叫「乘客」請勿超越黃線,幾攪笑!



剛好今日嚟到正做緊限量「海膽三色迷你丼」($20),先到先得㗎!真係抵到爆。




呢度款式唔算多(相比起元仔同板仔),不過有個好特別名字嘅兒童餐,有「太陽號」、「月亮號」同埋「星星號」。


兒童餐係用下面的輸送帶運送。


我哋叫咗個「月亮號」($42) 不過佢哋第一件事係爭住飲支益力多。



小朋友真係好愛食蟹籽,我就最鍾隔離嘅炸魷魚鬚。



睇下呢個芊芊食到幾枱都係蟹籽。



列車繼續送上刺身!



(圖為官方照片)

呢個三文魚加州卷 ($28) 好好味,食到我淨番最後一件先記得影相。



牡丹蝦刺身 $35 見到都流哂口水


 

火灸芝士熟蝦壽司 $22

不得不提這個「迷你烏冬」,因為係 Menu 搵唔到,我哋因為見到其他客人叫,新幹線載住碗烏冬喺我哋旁邊經過,所以先知道!職員話呢碗烏冬係「隱藏餐牌」哈哈~




最後埋單問過我先知原來唔係咩「隱藏」,只係原本碗烏冬只係喺午餐同下午茶餐跟餐有埋,但係因為覺得太多人叫,所以將來都會列入餐牌當中,只係未可以及時更改新版本。



每次 Order 最多可點選4款食品,但係如果你想見多幾次新幹線,可能你要逐樣逐樣叫先得,不過都唔係每款食品一定會用新幹線運送。

我今日食的「月亮號兒童餐」就唔係囉。



Photo by CANON 5D Mark IV, Len | EF 16-35mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 8


呀劍評語: 價錢中尚唔算貴,食物質素OK,新幹線雖是賣點,但又唔係好特別,某連鎖店更有3層幹線運送食物,不過新店企理乾淨,侍應服務態度也好,也可以到此一吃。

九井壽司 簡介
主打壽司、刺身、丼飯、日式套餐等,顧客只要用平板電腦落Order後,美食就會由一架新幹線列車送到客人面前,店內設計更塑造成新幹線列車車箱,小朋友及一家大細一定鍾意!開業期間6:00pm後堂食更可以HK$20享用海膽三色迷你丼,快D去試下啦!

地點

九龍灣宏照道38號Megabox9樓25號舖

開放時間

11:30 - 22:00

電話
2761 9188

Facebook
https://www.facebook.com/KokonoiSushi/

(以上資料更新至文章當日)






RELATED POST